Mu divulu dia 1 Kolindo 6:1-8, o phoxolo Phaulu ua zuela ia lungu ni kuambata phange, phala ku mu fundisa ku jinguvulu. Muéne ua luualele mukonda saí jiphange mu Kolindo kioso kiambe, ‘akexile mu kuambata jiphange kuia ku funda na-u bhu pholo ia isueia.’ (Velusu 1) Phaulu ua bhana itendelesu ku jiphange, phala ku batula o maka mudiâ mu kilunga, mu veji dia ku diambata ku afundixi a mundu. Tua-nda di longa maukexilu alondekesa se mukonda diahi muéne ua bhana o itendelesu íii, ni ku xinganeka mu maka ki tu a sange mu itendelesu íii.

Se tu kala ni maka alungu ni uenji ni phange mu nzumbi, tua tokala ku batula o maka iá mu ibanzelu ia Jihova, kana mu ibanzelu ietu. (Jisabhu 14:12) Kála kia londekesa Jezú, kima kiambote ku batula o maka ni lusolo, phala o maka iá ka di bandekese kiavulu. (Matesu 5:23-26) Maji saí Jikidistá, a kala ni ibanzelu ia jinvunda, katé muene ni kuambata o maka ku afundixi a mundu. Phaulu uambe: “Kiene ue kisemu, kuila mu’axaxe kenu mu kala ni madimanda mudienu!” Mukonda diahi? Mukonda kuambata phange ku afundixi a mundu, ku tena ku bhangesa kuzuela kia iibha o kilunga, ni dijina dia Nzambi ietu i tua mu bheza. Mukonda dia kiki, tu xinganeka mu kibhuidisu kia Phaulu: ‘Mukonda diahi ki mu ehelela o ku mi bhanga kia iibha?’—Velusu 7.

Phaulu ua londekesa ué kuila Nzambi ua solo athu mu kilunga, phala ku kuatekesa ku batula o maka. O tufunga athu ala ni unjimu, mu kuijiia o kidi ki tu sanga mu Bibidia, Phaulu uambe kuila ene ala ni kutena kua ‘ku fundisa . . . jiphange,’ kioso ki tu zuela ia lungu ni “ima ia muenhu iú.” (Velusus 3-5) Jezú ua longo maukexilu atatu, a tokala ku a belesela phala ku batula o maka alungu ni kiluezu  kionene, kála o kuzuela makutu alungu ni mukuenu, ni ku nhana: kia dianga, ku batula o maka mudienu; kaiadi, se o ukexilu ua dianga ki u bhana, uixana mbangi jiiadi, katatu, se ki bhu bhana, ambata o maka ku tufunga mu kilunga.—Matesu 18:15-17.

Mu kidi, o tufunga, ki afundixi a mundu, mba athu a uenji, ka bhingi ku kala kála afundixi a mundu. Ene ka bhana itendelesu ku jiphange phala ku batula o maka a uenji. Mu veji dia kiki, ene a kuatekesa oso ku belesela o itumu ia Bibidia, ni ku di tendela mudiâ. Se bhu moneka maka a dikota, a tokala kuzuela ni kafunga ka ilunga, mba ku Betele ia Jimbangi ja Jihova. Mu kiki, kuene maka ka a zuela mu itendelesu ia bhana Phaulu. Itendelesu iebhi?

Saí ithangana, ki tena ku kala ngó kima phala ku batula maka ku jinguvulu kála, o ku batula maka alungu ni ukaza, ua ku kamba ku dikila o muiji, ku langa o tuana, ku futa o kikalakalu ki ua bhange, ni ku soneka mukanda ulondekesa kuila se ufuá, o mukanda u kuatekesa o muiji ku kala ni jimbote. Ki tena ué ku kala maka a phange, ua mesena ku dilanga phala ka kale ni maka ni afundixi a mundu. *

Se o muthu u sota kikuatekesu kia mufundixi ua mundu, mu ukexilu ua ku tululuka kuoso, nange o ukexilu iú, ki u bhangesa o muthu ku xibhaka o itendelesu ia bhana Phaulu. * Mu kienhiki, o Kidistá ua tokala ku dianga ku xila o dijina dia Jihova, ni ku kuatekesa o kilunga ku kala ni paze, ni ku tululuka. O akaiedi a Kristu, a ejiia mu kulondekesa o henda, o ‘henda . . . ki iene ku sota ngó o ibhangelu iê.’—1 Kolindo 13:4, 5; Nzuá 13:34, 35.

^ kax. 2 Saí ithangana, nange o Kidistá u bhanga kia iibha kua mukua—kála o undumbu, ujibhangânga, mba ku nhana. Mu ithangana íii, ki kima kiambote kuzuela o maka enhá ku maungana, né muene se o maka a bhangesa phange ietu ku mu fundisa.

^ kax. 3 Phala kuijiia dingi, ia lungu ni maka enhá, tanga A Sentinela ua 15 ua mbeji ia Katanu ua 1997, mu jimbandu ja 17-22, ni ua 15 ua mbeji ia Katutu ua 1991, mu jimbandu ja 25-28.