1. Mukonda diahi tua bhindamena itendelesu?

O ijila ia Bibidia i tu kuatekesa kiebhi phala ku di langa ku iluezu?​—JISÁLAMU 36:9.

O Mubhangi uetu ua beta-kota mu unjimu, etu ndenge. Kála o tata ia henda, muéne u tu langa. Muéne ka mesene kuila etu tu di tumina ngó mudietu. (Jelemiia 10:23) Kála o mona-ndenge u bhindamena o itendelesu ia jitata jê, etu oso tu bhindamena o itendelesu ia Nzambi. (Izaia 48:17, 18) O ijila ia Bibidia i tu bhana itendelesu, uene ujitu ua Nzambi.​—Tanga 2 Timote 3:16.

O itumu ia Jihova ni ijila iê, i tu longa kiebhi ki tu tena ku kala ni ukexilu uambote ku muenhu lelu, i tu londekesa ué kiebhi ki tu tena ku tambula o mabesá a kalelaku ku hádia. Mukonda Nzambi muéne ua tu bhange, tua tokala ku xikina o itendelesu iê.​—Tanga Jisálamu 19:7, 11; Dijingunuinu 4:11.

2. Iebhi o ijila ia Bibidia?

O ijila ia Bibidia, kidi kia beta-kota, i tu kuatekesa ku muenhu. O itumu i sidivila mu ithangana ia tokala. (Matendelelu 22:8) Tua tokala ku xinganeka mu ujitu uetu ua tu bhana Nzambi ua ku banza, phala kuijiia se o maka enhá a bhingi ku kumbidila o ijila. (Jisabhu 2:10-12) Mu kifika, o Bibidia i longa kuma o muenhu ujitu ua Nzambi. Kijila ki tena ku tu endesa mu ikalakalu, kubhata, ni kioso ki tuenda njila. Ki tu kuatekesa ku di langa.​—Tanga Ikalakalu 17:28.

3. Iebhi o ijila iiadi ia dianga?

Jezú ua zuela ijila iiadi ia beta-kota. O kijila kia dianga, ki tu londekesa se mukonda diahi o athu ala ku muenhu​—o kuijiia Nzambi, ku mu zola, ni ku mu sidivila. Tua tokala ku xinganeka mu ijila íii mu ima ioso i tu sola. (Jisabhu 3:6) O muthu u bhaka o ijila íii ku muxima, u kala ni ukamba ni Nzambi, ku zediua ku muenhu, ua-nda tambula muenhu ua kalelaku.​—Tanga Matesu 22:36-38.

O kijila kia kaiiadi, ki tu kuatekesa ku dibhana kiambote ni akuetu. (1 Kolindo 13:4-7) O ku belesela o kijila kiki, ku lombolola ku kaiela o phangu ia Nzambi, ia ku dibhana ni athu.​—Tanga Matesu 7:12; 22:39, 40.

4. Kiebhi ki tu kuatekesa o ijila ia Bibidia?

O ijila ia Bibidia i longa o miji kiebhi kia tena ku di zola mudiâ. (Kolose 3:12-14) O Mak’â Nzambi a langa ué o miji, mu ku a longa ijila​—kuila o ukaza ua tokala ku nangenena.​—Tanga Dimatekenu 2:24.

O ijila íii ia Bibidia, i tena ku tu kuatekesa ku kala kiambote. Mu kifika, o jixefe a mesena akalakadi a belesela o ijila ia Bibidia, kala muthu ua kidi, ni muthu u sakamana mu ikalakalu. (Jisabhu 10:4, 26; Jihebeleu 13:18) O Mak’â Nzambi a tu longa ué kuma tua tokala ku sanguluka ni ima i tu bhindamena, ni ku beta ku bhana valolo ku ukamba ni Nzambi, o jimbote ndenge.​—Tanga Matesu 6:24, 25, 33; 1 Timote 6:8-10.

O ku belesela o ijila ia Bibidia, i langa o sauidi ietu. (Jisabhu 14:30; 22:24, 25) Mu kifika, o ku belesela o kitumu kia Nzambi kia lungu ni uhôlua, ki tu langa ku mauhaxi a jibha, ni mu iluezu iavulu. (Jisabhu 23:20) Jihova ka tu fidisa kunuá uhôlua, maji ua tu tendelesa kunuá ni kilunji. (Jisálamu 104:15; 1 Kolindo 6:10) O ijila ia Nzambi ki i kuatekesa ngó ku di langa mu ima i tu bhanga, maji i tu kuatekesa ué ku langa o ibanzelu ietu. (Jisálamu 119:97-100) Mu kiki, o Jikidistá ja kidi, ka belesela ngó mukonda a-nda katula-ku mbote. Ene a bhanga kiki, phala ku bhana kijingu kua Jihova.​—Tanga Matesu 5:14-16.