Ku bokona mu madisá

Ku bokona mu madisá

 DISÁ 8

Mukonda Diahi Nzambi Uehela o Kuiibha ni Jiphaxi?

Mukonda Diahi Nzambi Uehela o Kuiibha ni Jiphaxi?

1. Kiebhi kia mateka o kuiibha?

Nzambi ua bhana kithangana ku athu, kia ku di tumina mudiâ, phala kulondekesa kuila mudiâ ene ka tena ku batula o maka a ngongo

O kuiibha kua mateka kioso Satanaji kia dianga ku tanga o makutu. Ku dimatekenu Satanaji uexile anju ia iuka, maji “mu kidi ka nangiê-mu.” (Nzuá 8:44) Muéne ua mesenene o ubhezelu ua tokala ngó kua Nzambi. Satanaji ua tange o makutu a dianga kua Eva, iú ua bhangesa ku mu belesela mu veji dia ku belesela Nzambi. Adá ua bhukumukine ué Nzambi, mu kuívua Eva. O ku bhukumuka kua Adá kua bheka hadi ni kufuá.—Tanga Dimatekenu 3:1-6, 19.

Kioso Satanaji kia bhangesa Eva ku bhukumukina Nzambi, muéne ua kexile mu xonguena o ungana ua Nzambi, mba ku bhânga ni Suke-ku. Saí athu ene mu kala ku mbandu ia Satanaji mu ku dituna Nzambi kala Nguvulu iâ. Mukonda dia kiki, Satanaji ua kituka “o sobha ia mu tumina mu ngong’umu.”—Tanga Nzuá 14:30; 1 Nzuá 5:19.

2. O kuila o ibhangelu ki i iukile?

O ikalakalu ioso ia bhange Nzambi ia iuka. O athu ni ji-anju a a bhange kua Nzambi ni kutena kua ku belesela Nzambi ni ku iuka kuoso. (Matendelelu 32:4, 5) Nzambi ua tu bhange ni ufolo ua ku sola mu ku bhanga o ima iambote ni ia iibha. O ufolo iú ulondekesa o henda ia Nzambi.—Tanga Tiiaku 1:13-15; 1 Nzuá 5:3.

3. Mukonda diahi Nzambi uehela o hadi katé lelu?

Saí kithangana Nzambi uehela o ungana uê ku u xonguena. Mukonda diahi? Phala kulondekesa kuila se-ku muthu u tena ku tumina kiambote o athu, sé o kikuatekesu kiê. (Ndongixi 7:29; 8:9) Mu ku bhita 6.000 ia mivu, tuene mu mona kuila kiki kidi muene.  O jinguvulu kene mu tena ku zubha o ita, usuéia, ku kamba ku fundisa, ni mabhebhu.—Tanga Jelemiia 10:23; Loma 9:17.

O utuminu ua Nzambi ki u difu ni utuminu ua jinguvulu, mukonda o utuminu ua Nzambi ua-nda bhekela mabesá ku athu oso a u xikina. (Izaia 48:17, 18) Kua kambe ngó bhofele Jihova ua-nda buika o jinguvulu joso. Athu oso a xikana Nzambi, ene ngó a-nda kala mu ixi.—Izaia 11:9.—Tanga Daniiele 2:44.

Tala o vidyu Mukonda Dyahi Nzambi Wehela o Hadi?

4. O muanhu ua Nzambi u tu kuatekesa ku bhanga ihi?

Satanaji uambe kuila ki kueji kala muthu ueji sidivila Nzambi ni henda ioso. O kuila u tena kulondekesa kuila muéne mukua makutu? U tena! O muanhu ua Nzambi, u tu kuatekesa ku sola ku tu tumina kua Nzambi, mu veji dia jinguvulu. Tu tena kulondekesa se tua solo ku sidivila nanhi.—Tanga Jobe 1:8-12; Jisabhu 27:11.

5. Kiebhi ki tu tena ku sola ku tu tumina kua Nzambi?

O ima i tu sola, ilondekesa se tua mesena Nzambi kála Nguvulu ietu

Tu tena ku sola Nzambi kala Unguvulu uetu mu ku di longa ni ku bhanga o ubhezelu ua kidi, u tu di longa mu Mak’â Nzambi, o Bibidia. (Nzuá 4:23) Tu tena ku dituna Satanaji, ku kala unguvulu uetu mu ku dituna ku di ta mu maka a jinguvulu, ni ita, kála kia bhange Jezú.—Tanga Nzuá 17:14.

Satanaji u suínisa o ukexilu ua iibha. Saí makamba ni jindandu a tu zukutisa, mba a tu xonguena (1 Phetele 4:3, 4) Phala ku dibhana kiambote ni maka enhá, tua tokala ku sola. O kuila tua-nda di ongeka ni athu a zolo Nzambi? Tua-nda belesela o itumu iê, ni jinjila jê? Se tu bhanga kiki, tua-nda tena kulondekesa kuila Satanaji mukua makutu, kioso kiambe kuila ki kueji kala muthu, ueji tena ku sidivila Nzambi se a mu zukutisa.—Tanga 1 Kolindo 6:9, 10; 15:33.

Nzambi ua zolo o mundu, ua kanena kuila o hadi ni jiphaxi ku hádia ja-nda bhua. Oso a xikina mu kikanenu kiki, a-nda kala ni muenhu ua kalelaku mu ixi.—Tanga Nzuá 3:16.