1. Mbote iahi i ua-nda katula mu ku di longa o Bibidia?

Se-ku phata kuila o milongi i ua di longo ia mu suínisa o henda iê kua Jihova. O henda íii ia tokala ku i bandekesa. (1 Phetele 2:2) Se ua mesena ku tambula o muenhu ua kalelaku, ua tokala ku kolokota o ku di longa o Mak’â Nzambi.​—Tanga Nzuá 17:3; Juda 21.

Kioso ki uia ni ku bandekesa o kuijiia kuê kua lungu ni Nzambi, o kixikanu kiê kua Nzambi kia-nda kola dingi. O kixikanu kia-nda ku kuatekesa ku bhanga o vondadi ia Nzambi. (Jihebeleu 11:1, 6) Kia-nda ku bhangesa ku diela o ituxi iê, ni ku lungulula o ukexilu ku muenhu uê.​—Tanga Ikalakalu 3:19.

2. Se uijiia o Mak’â Nzambi, mbote iahi ia-nda katula akuenu?

Eie u tena ku kala ni ukamba ni Jihova

Ua-nda mesena ku boka akuenu o ima ioso i uene mu di longa​—etu enioso tu sanguluka kiavulu mu ku boka o njimbu iambote. Se u suluka mu ku di longa o Bibidia, ua-nda di longa kiebhi ki u tena ku jimbulula o kixikanu kiê kua Jihova bhu kaxi ka Bibidia, ni ku tula o njimbu iambote.​—Tanga Loma 10:13-15.

Athu avulu a mateka ku boka o njimbu iambote, ku makamba mâ, ni ku jindandu jâ. Zuela kiambote. Kana kuzuela kuila ene mu a longa makutu mu ngeleja iâ, zuela ngó o ikanenu ia Nzambi. Ejiia kuila o athu a beta ku mona o ukexilu uê uambote, o ima i uzuela ndenge.​—Tanga 2 Timote 2:24, 25.

3. O kuila u tena ku kala ni ukamba ni Nzambi?

O ku di longa o Mak’â Nzambi, kua-nda ku kuatekesa ku kula mu nzumbi. U tena ué ku kala ni ukamba ni Jihova. U tena ku tokala ku muiji uê.​—Tanga 2 Kolindo 6:18.

 4. Kiebhi ki u tena ku kolokota ku kula mu nzumbi?

U tena ku kula mu nzumbi se u kolokota o ku di longa o Mak’â Nzambi. (Jihebeleu 5:13, 14) Bhinga Mbangi ia Jihova phala ku di longa n’eie, o divulu Ihi i Tu Longa o Bibidia? Kioso ki uia ni ku di longa o Mak’â Nzambi, ua-nda beta ku zediua ku muenhu uê.​—Tanga Jisálamu 1:1-3; 73:27, 28.

O njimbu iambote ia tokala kua Jihova, o Nzambi ia ku sanguluka. Eie u tena ku mu zukama bhu kaxi ka mundu uê. (Jihebeleu 10:24, 25) Se u kolokota mu ku bhanga ioso phala ku sidivila Jihova, ua-nda tambula o muenhu ua kidi​—o muenhu ua kalelaku. O ku zukama kua Nzambi, kiene o kima kia beta-kota ki ua tokala ku bhanga.​—Tanga 1 Timote 1:11; 6:19.