Ihi Izuela o Bibidia ia Lungu ni Utuminu ua Nzambi?

Ihi ia-nda bhanga o Utuminu ua Nzambi?

Thembu kuxi, o Utuminu ua Nzambi ua-nda bhanga o vondadi iê mu ixi?

JIMIDI ja athu mu ngongo ioso ejiia o musambu a uixana Tata Ietu, mba Musambu ua Ngana. O majina aiadi iâ, a londekesa o musambu ua fuma ua xisa Jezú Kristu. O musambu iú, uala ni valolo ia dikota, o ku di longa ia lungu ni ibhingilu itatu iala-mu, ia-nda ku kuatekesa kuijiia dingi se mu kidi ihi i longa Bibidia.

2 Mu dimatekenu dia musambu, Jezú ua longo o jingivuidi jê: “Kienhiki, mu kusamba kuenu, muila kala kiki: Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:9-13) Ihi ilombolola o ibhingilu itatu íii?

3 Tua di longo kiá ima iavulu ia lungu ni dijina dia Nzambi, Jihova. Tua mono kiá ué se iebhi o vondadi ia Nzambi—ni ihi iene mu bhanga muéne ni ia-nda bhanga hanji kua athu. Maji ihi Jezú ia mesenene ku zuela kioso kia tu longo o kusamba: O “Utuminu ué uize”? O Utuminu ua Nzambi ihi? Kiebhi kia-nda zelesa o dijina dia Nzambi? Kiebhi o kuíza kua Utuminu kua-nda bhanga o vondadi ia Nzambi?

O UTUMINU UA NZAMBI IHI?

4 O Utuminu ua Nzambi, o unguvulu ua Jihova Nzambi, uala ni Sobha a mu solo kuala Nzambi. Nanhi o Sobha ua Utuminu ua Nzambi? Jezú Kristu. O Sobha Jezú, uala ku thandu dia jinguvulu joso ja ngongo, inga a mu ixana “Sobha ia jisobha, Ngana ia jingana.” (1 Timote 6:15) Muéne uala ni kutena kua ku bhanga o mbote, o jinguvulu ja ngongo ndenge, né muene ió ua di tundu mudiâ.

5 Kuebhi kua-nda tumina o Utuminu ua Nzambi? Kuebhi kuala Jezú? Eie Ua-nda di lembalala kuila muéne a mu jibha ku taka, ni a mu fukununa. Ki kua bhiti kithangana kiavulu, muéne ua bande ku diulu. (Ikalakalu 2:33) Kuenhoko, kuene kuala o Utuminu ua Nzambi—ku diulu. Mukonda dia kiki o Bibidia u uixana o ‘utuminu ua diulu.’ (2 Timote 4:18) Sumbala o Utuminu ua Nzambi uala ku diulu, maji uene ua-nda tumina o ixi ioso.—Dijingunuinu 11:15.

6 Ihi i bhangesa Jezú ku kala Sobha ia dikota? Mukonda muéne nuka ua-nda fuá. Mu disokesa ni jisobha ja ngongo, o Bibidia izuela kuma Jezú ‘Muéne ngó ubhek’élele uê, uavu o muenhu ki uene mbambe. Ua tunga mu mukengeji ki u xikina ku u bhixila.’ (1 Timote 6:16) Kiki kilombolola kuma o ima ioso iambote ia-nda bhanga Jezú, ia ka kala katé ku hádia. Muéne ua-nda bhanga ima iavulu iambote.

7 Tanga hanji o kikanenu kia Bibidia kia lungu ni Jezú: “Anga o nzumbi ia Jihova ia kà mu tula ku thandu diê, iene o nzumbi ia unjimu ni kutetuluka, nzumbi ia phangu ni ndongo, ifikidila muthu, iene nzumbi i bhekela muthu o kuijiia ni kukala ni uoma ua Jihova. Mu uoma ua Jihova muene mu mu kala kusanguluka kuê; ka [xikina] kufundisa mulonga kala kia u mono ku mesu mê, ka [xikina] ue kubazela kima kivu ngó ku mátui mê. Maji ua kà fundisa jingadiama ni kidi kioso; oso a belesela bhoxi’abha ua kà a bazela sé ngó katungu. Maji oxi ua kà i nemeka ni mbangala ia dikanu diê, mukua-phulu ua ká mu jibha ni muha ua dikanu diê.” (Izaia 11:2-4) O kikanenu kiki kilombolola kuma Jezú ua-nda tumina athu mu ixi kála Sobha ia iuka, ni henda. Ua mesena ku kala ni nguvulu kála iú?

8 O kidi kia mukuá kia lungu ni Utuminu ua Nzambi kiki: Jezú ka-nda tumina o bheka-ué. Muéne ua-nda tumina ni jisobha ja mukuá. Mu kifika, o poxolo Phaulu uambela Timote: “Se tua jiji ni kukolokota mu hadi, tua kà hinga-nê kumoxi o ungana.” (2 Timote 2:12) Kiki-phe, Phaulu ni Timote ni athu a kamúkua a solo kua Nzambi, a-nda tumina ni Jezú mu Utuminu ua diulu. Athu a kuxi a-nda kala ni ujitu iú?

9 Kála ki tua mono mu Kibatulu kia 7 kia divulu didi, o poxolo Nzuá ua mono mu nzoji “Kambudi [Jezú Kristu] uemana ku Mulundu ua Ziione. [o kididi kiê kia u sobha ku diulu] anga ku kala athu kumoxi ni muène, hâma ia midi ni makuinhi auana ni midi jiuana, ala ni dijina diê ni dijina dia Tata iê, òsoneke bhu mabhômo mâ.” O 144.000 iâ, a nanhi? Nzuá ua tambuijila: “Enhá ene a nhenganana Kambudi, ene a nhunga-nê kuoso-kuoso ku a di tela. Enhá ene a a sumbu mu’axaxe ka mundu ua athu mu ngongo, mu kukala ibundu ia kutomona ia bhakuila Nzambi ni Kambudi.” (Dijingunuinu 14:1, 4) Kiene, ene o akaiedi a fiiele a Jezú Kristu, a a solo phala ku tumina-nê ku diulu. Kioso kia-nda ku a fukununa phala o muenhu ku diulu, “ene hinu à kala mù tumina mu ngongo.” kumoxi ni Jezú. (Dijingunuinu 5:10) Tundé mu izuua ia jipoxolo, Nzambi uene mu sola Jikidistá ja kixikinu phala ku tenesa o mixinda ia 144.000.

10 O ku sola Jezú ni 144.000 phala ku tumina o ixi, kima kiambote. Mukonda, Jezú uejiia kiebhi kia kala athu ni kiebhi ki i kala o hadi. Phaulu uambe kuma Jezú “u tena kuivua o malamba metu. Mukonda o Nganga ia Dikota muen’iú, a mu thendalele mu ima ioso kala etu-ene, maji sé ngó ku ta kituxi.” (Jihebeleu 4:15; 5:8) Athu a-nda tumina ni muéne, a talele ué o hadi kála athu mu ixi. Ene a bhânge ni ku kamba o kuiuka ni hadi ni mauhaxi. Kienhiki, ene a-nda tendela o maka ene mu bhita ni athu!

O UTUMINU UA NZAMBI UA-NDA BHANGA IHI?

11 Kioso Jezú kiambe ku maxibulu mê kuma a tokalele kusamba phala o Utuminu ua Nzambi uize, mu kidi, muéne ua kexile mu zuela kuma ene a tokalele kusamba phala o vondadi ia Nzambi ai bhanga ué “bhoxi kala kiala ku i bhanga ku diulu.” Nzambi uala ku diulu, o vondadi iê ene mu i bhanga koko ku ji-anju ja fiiele. Mu Kibatulu 3 kia divulu didi, tua di longo kuma saí anju ia iibha ia xisa ku bhanga o vondadi ia Nzambi, iu ua bhangesa Adá ni Eva ku ta kituxi. Mu Kibatulu 10 tua-nda di longa dingi ia lungu ni ihi i longa o Bibidia ia lungu ni anju íii ia iibha, a ixana Satanaji o Diabhu. Satanaji ni ji-anju ja solo ku mu kaiela—a exana madimonho—a ehela ku kala ku diulu mu kithangana kofele. Kienhiki, saí ji-anju ki ja kexile mu bhanga o vondadi ia Nzambi ku diulu. Eji ku i bhanga ngó kioso o Utuminu ua Nzambi ueji mateka o ku tumina. Jezú Kristu o Sobha, ueji luua ita ni Satanaji.—Dijingunuinu 12:7-9.

12 O ikanenu ia zuela ku ima ieji bhiti: “Anga ng’ívua dízui dia dikota mu diulu, dixi: “Kiki kueza ubhulukilu ua Nzambi ietu! Kiki o Nzambi ietu uedikiza o unéne uê kuila Muéne Sobha! Kiki o Kristu iê, ua londekeza ki kala o ungana uê! Kuma o mutatedi ua jiphange jetu [Satanaji] a mu lundumuna, ua kexile ku a tatela bhu pholo ia Nzambi muanha ni usuku. ” (Dijingunuinu 12:10) Ua mono o ima iiadi ia beta-kota, ia tange mu velusu ia Bibidia? Kia dianga, mu Utuminu ua Nzambi Jezú Kristu ua mateka kiá ku tumina. Kaiiadi, Satanaji a mu kaie ku diulu iu a mu lundumuina mu ngongo.

13 Ihi ia bheka o izulukutu iiadi íii? Ia lungu ni kima kia bhiti ku diulu, tu tange: “Kala kiki, ku madiulu-phe tanenu-ku, ni enu oso mua tunga momo!” (Dijingunuinu 12:12) Kiene, o ji-anju ja fiiele ku diulu a sangulukile, mukonda dia ku kaia Satanaji ni madimonho mê a lundumuna mu ngongo, kienhiki kia bhekela o ji-anju joso ku diulu ku kála jifiiele kua Jihova Nzambi. Kuenhoko kuala kutululuka kuoso. O vondadi ia Nzambi ene mu i bhanga kiá ku diulu.

14 Maji ihi iene mu bhita mu ixi? O Bibidia izuela: “Lamba dienu mu ngongo ni ku musanza! Mukonda Diabhu ua mi tulukila ni njinda iavulu, kuma muène uejiia kuila o thembu iê ia butu kia.” (Dijingunuinu 12:12) Satanaji uala ni jinda, mukonda dia ku mu kaia ku diulu, ni mu k’jiia kuma o thembu iê ia butu kiâ. Ni njinda ioso, muéne ua mu bheka “malamba,” mu ixi. Tua-nda di longa dingi ia lungu ni “malamba” iá mu kibatulu ku pholo. Maji mu banza kienhiki, ki tu bhangesa kuibhula se kiebhi o Utuminu ua Nzambi ua-nda bhanga kuila o vondadi ia Nzambi a i bhanga mu ixi?

15 Ua lembalala iebhi o vondadi ia Nzambi ia lungu ni ixi? Tua di longo kiá ia lungu ni maka enhá mu Kibatulu 3. Mu Edene, Nzambi uedikisa kuma ua mesena kuila o ixi i kale palaízu mua tunga athu aiuka sé kufuá. Satanaji ua bhangesa Adá ni Eva ku ta kituxi, kiki kia bhangesa kuila o vondadi ia Nzambi ia lungu ni ixi ki i dikumbidile, maji ka i lungulula. O vondadi ia Jihova iemana hanji phala o “ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.” (Jisálamu 37:29) O Utuminu ua Nzambi ua-nda bhanga kiki. Kiebhi-phe?

O ku kaia Satanaji ni madimonho mê ku diulu, kia bheka ibhidi mu ixi. O ibhidi ienii ia-nda bhua kiá

Ita, ujibhangânga ni nzala

16 Tanga o kikanenu mu divulu dia Daniiele 2:44. Tu tange-mu: “Maji, mu izuua ia jisobha jenhiji, o Nzambi ia diulu ua kà bheka-ku o utuminu ki u xikina dingi ku u jikinisa; o utuminu iú, kà u ehela ku bhita dingi bhu maku ma miji iéngi; uene kiá, ua kà sasujula o mautuminu moso’ama anga a-bhua-ku, maji o uene ua kà xalela ni kutumina mu thembu joso katé ku hádia ni hádia.” Íii i tu longa ihi ia lungu ni Utuminu ua Nzambi?

17 Kia dianga, íii i tu longa kuma o Utuminu ua Nzambi ueji tumina “mu izuua ia jisobha jenhiji” mba mu thembu ia kuila o jisobha ja mukuá, ji tumina hanji. Kaiadi, íii i tu longa kuma o Utuminu ua-nda kala katé ku hádia. Uene, ua-nda bhingana o jinguvulu jiji. Katatu, kua-nda bhita ita bhu kaxi ka Utuminu ua Nzambi ni mautuminu a ngongo íii. O Utuminu ua Nzambi ua-nda nganhala. Mu disukilu, uene ngó ua-nda kala-ku mu ixi ioso. Kienhiki-phe, athu a-nda sanguluka ni unguvulu ua beta-kota, o ja kexile-ku ndenge.

18 O Bibidia izuela maka avulu alungu ni ita ia sukina mu kaxi ka Utuminu ua Nzambi ni jinguvulu ja ngongo íii. Mu kifika, iene i longa kuma ni dizubhilu dia zukama, o jinzumbi jaiibha ja-nda fumanesa makutu phala ku nganala o “jisobha mu ngongo.” Phala’hi? “Mu ku a kasa [o jisobha] ku ita ia kizuua kia Dikota kia Nzambi o Muteni-a-Ioso.” O jisobha ja ngongo a-nda ku a ongeka “bhu kididi a k’ixana mu mbimbi ia Hebeleu exi Alumajedone.” (Dijingunuinu 16:14, 16) Kála kia ki tange mu velusu jiiadi jiji, o ita ia sukina mu kaxi ka jinguvulu ja athu ni Utuminu ua Nzambi, a ixana ita ia Alumajedone.

19 Ihi ia-nda bhanga o Utuminu ua Nzambi mu kaxi ka Alumajedone? Xinganeka dingi se iebhi iexile o vondadi ia Nzambi phala o ixi. Jihova Nzambi ua mesenene kuila mu kale athu a iuka mu Palaízu, na mu sidivile. Mukonda diahi kiki ki kia mu dikumbidila lelu? Kia dianga, mukonda tu akua ituxi, tuene mu kata ni kufuá. Tua di longo mu Kibatulu 5, kuma Jezú uafú ko kuetu phala tu kale ni muenhu ua kalelaku. Nange eie ua di lembalala ia izuelelu íii, mu Njimbu ia Nzuá: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”—Nzuá 3:16.

20 O maka a mukuá ene mu bhita, mukonda athu avulu a bhanga ima ia iibha. Ene a tanga makutu, a nganala ni a bhanga o ndumbu. Ene ka-ndala ku bhanga o vondadi ia Nzambi. Athu a bhanga ima ia iibha, Nzambi ua-nda ku a buika mu ita ia Alumajedone. (Jisálamu 37:10) O kima kiéngi ki bhangesa kuila o vondadi ia Nzambi ka mu i bhanga mu ixi, mukonda o jinguvulu kene mu suínisa o mundu ku i bhanga. Jinguvulu ja mukuá kala ni kutena, a bhanga ia iibha. O Bibidia izuela ni kidi kioso: “Muthu u kala mu kutumina mukuá phala ngó ku mu sengulula.”—Ndongixi 8:9.

21 Kioso kia-nda bhita o ita ia Alumajedone, athu a-nda kala ngó ni unguvulu imoxi, o Utuminu ua Nzambi. O Utuminu iú ua-nda bhanga o vondadi ia Nzambi, ni ku bheka mabesá avulu. Mu kifika, ua-nda buika Satanaji ni madimonho mê. (Dijingunuinu 20:1-3) Kienhiki, kua-nda kala o kutena kua sata ia Jezú, athu ka-nda kata dingi né ngó kufuá. mu unguvulu ua Utuminu, ene a-nda kala katé ku hádia. (Dijingunuinu 22:1-3) O ixi ia-nda kituka palaízu. Kienhiki, o Utuminu ua Nzambi ua-nda bhanga kuila o vondadi iê a i bhanga mu ixi, o dijina dia Nzambi a di xile. Íii ijimbulula ihi? Íii ijimbulula kuma ku Utuminu ua Nzambi athu oso a-nda ximana o dijina dia Jihova.

O UTUMINU UA NZAMBI UA MATEKA THEMBU KUXI?

22 Kioso Jezú kia zuelele ku akaiedi iê, kuma a tokalele kusamba phala, “utuminu uize,” uedikisa kuma o Utuminu ki ua bhixile luua mu thembu ienioió. O kuila ua bhixile kioso Jezú kia bande ku diulu? Kana, mukonda Phetele ni Phaulu ambe kuma kioso Jezú kia fukunuka, kiene kia dikumbidila o Jisálamu 110:1: “Jihova ua ki ambe kua Ngana iami, uixi: Xikama ku mbandu iami ia madilu, katé ki ngi ku bhanga o jinguma ji kala kibaka kié kia kutula inama. ” (Ikalakalu 2:32-35; Jihebeleu 10:12, 13) Kua kexile kithangana kia ku kinga.

Mu unguvulu ua Utuminu, o vondadi ia Nzambi a-nda ku i bhanga mu ixi kála kiene mu i bhanga ku diulu

Dikumbi di boba

23 Kueji bhita thembu ikuxi ia ku kingila? Mu 19 dia hâma ja mivu, o alongixi a Bibidia a ki tendela kuma o thembu íii ieji bhixila katé mu 1914. (kia lungu ni muvu iú, tanga o Kibandekesu) O izulukutu mu ngongo, ia mateka tundé mu 1914, iedikisa kuma o alongixi a Bibidia a zuelele o kidi. O ki kumbidilu kia ikanenu ia Bibidia kidikisa kuma mu 1914, Kristu a mu tula Sobha, mu Utuminu ua Nzambi ku diulu, ua mateka o ku tumina. Kienhiki, tuala mu “thembu ia butu” ia subhukila Satanaji. (Dijingunuinu 12:12; Jisálamu 110:2) Tu tena ué kuzuela ni kidi kioso kuma o Utuminu ua Nzambi, ua-nda bhanga kuila o vondadi ia Nzambi ai bhanga mu ixi. O kuila njimbu íii ia ku uabhela? Eie u xikina kuma kiki kidi? O kibatulu ku pholo kia-nda ku kuatekesa kuijiia kuma o Bibidia i longa o ima íii.

IHI I LONGA O BIBIDIA

  • O Utuminu ua Nzambi, o unguvulu ia diulu, Jezú Kristu muéne o Sobha, mu kaxi ka athu mu ixi a solo-bho 144.000 phala ku tumina nê.—Dijingunuinu 14:1, 4.
  • O Utuminu ua mateka ku tumina mu 1914, kioso Satanaji kia mu lundumuna mu ngongo.—Dijingunuinu 12:9.
  • O Utuminu ua Nzambi, ua-nda buika o jinguvulu ja ngongo, o ixi ia-nda kituka palaízu.—Dijingunuinu 16:14, 16.

Ibhuidisu

1. Musambu uahi ua fuma u tua-nda di longa kindala?

2. Jimbulula ima itatu ia longo Jezú ku maxibulu mê kusamba?

3. Ihi i tua tokala kuijiia ia lungu ni Utuminu ua Nzambi?

4. O Utuminu ua Nzambi ihi, o Sobha iê nanhi?

5. O Utuminu ua Nzambi ua-nda tumina kuebhi, iu ua-nda tumina nanhi?

6, 7. Ihi i bhangesa Jezú ku kala Sobha ia beta-kota?

8. Nanhi ua-nda tumina ni Jezú?

9. Athu akuxi a-nda tumina ni Jezú, ni thembu kuxi Nzambi ua mateka ku a sola?

10. Mukonda diahi kima kiambote ku sola Jezú ni 144.000 phala ku tumina o ixi?

11. Mukonda diahi Jezú uambe kuma o maxibulu a tokalele kusamba phala o vondadi ia Nzambi a i bhanga ku diulu?

12. Izulukutu iiadi iahi ia beta-kota iosoneke mu divulu dia Dijingunuinu 12:10?

13. Ihi ia bhiti ku diulu tundé kia kaie Satanaji?

14. O ku kaia Satanaji ku diulu katé bhoxi, ia bhekesa ihi mu ixi?

15. Iebhi o vondadi ia Nzambi ia lungu ni ixi?

16, 17. Ihi i tu longa o divulu dia Daniiele 2:44 ia lungu ni Utuminu ua Nzambi?

18. Kiebhi k’ixana o ita ia sukina mu kaxi ka Utuminu ua Nzambi ni jinguvulu ja ngongo íii?

19, 20. Mukonda diahi o vondadi ia Nzambi ka mu i bhanga luua mu ixi?

21. Kiebhi o Utuminu ua Nzambi ua-nda bhanga o vondadi iê mu ixi?

22. Kiebhi ki tuejiia kuma o Utuminu ua Nzambi ki ua mateka kioso Jezú kia kexile mu ixi, mba kioso kia mu fukununa?

23. (a) O Utuminu ua Nzambi ua mateka ku tumina thembu kuxi? (b) Ihi i tua-nda di longa mu kibatulu ku pholo?