O kukula ihi?

Kiebhi kia u bhana?

Ku jimbulula ihi phala eie?

Kiebhi ki u tena ku londekesa o kisakidilu kiê?

UEBHI o ujitu ua beta-kota u ua tambuile kiá? O ujitu ki ua bhingi kitadi kiavulu, phala ku kala ni valolo. O valolo ia ujitu ua kidi, ki ua bhingi ku u zonga ni kitadi. Se o ujitu u ku sangulukisa, mba u ku kuatekesa, uala ni valolo ia dikota phala eie.

2 O ujitu uoso u tambula, kuala umoxi ua beta-kota. O ujitu ua Nzambi phala athu. Jihova ua tu bhana ima iavulu, maji o ujitu uê ua dikota, o sata ia kukula ia Mon’ê, Jezú Kristu. (Matesu 20:28) Kála ki tua-nda mona mu kibatulu kiki, o kukula o ujitu ua beta-kota u ueji tambula, mukonda u tena ku ku bhekela kisangusangu ni ku kuatekesa mu ibhidi iê ia beta-kota. Mu kidi, o kukula kuidikisa o henda ia dikota ia Jihova ko kuê.

O KUKULA IHI?

3 O kukula, o njila iedikisa Jihova phala ku bhulula athu mu ituxi ni mu kufuá. (Efezo 1:7) Phala ku tendela kiambote o milongi íii ia Bibidia, tua tokala tu lembalala ihi ia bhiti mu jaludim ia Edene. Tua-nda tena ku ki tendela ngó, se mukonda diahi o kukula kima kia valolo, se tu tendela ima iahi ia texi Adá, kioso kia te o kituxi.

4 Kioso Nzambi kia bhange Adá, mu kidi Jihova ua mu bhana kima kia valolo—o muenhu ua iuka. Xinganeka hanji, se kiki kieji jimbulula ihi phala Adá. A mu bhange ni mukutu, ni kilunji kia iuka, muéne nuka ueji kata, ku kuka, mba kufuá. Kála muthu ua iuka, muéne uexile dikamba dia kazola dia Jihova. Kienhiki, o Bibidia i tanga kuma Adá uexile “[mona] dia Nzambi.” (Luka 3:38) Kiki-phe, Adá uakexile ni ukamba ni Jihova Nzambi, kála o ukamba ua tata ni mon’ê ua kazola. Jihova uakexile mu zuela ni mon’ê Adá, iu ua mu bhana ikalakalu, ni ku mu ambela ihi ia tokalele ku bhanga.—Dimatekenu 1:28-30; 2:16, 17.

5 Nzambi ua bhangele Adá ni “kidifuanganu kiê.” (Dimatekenu 1:27) Kiki ki kilombolola kuma Adá ua difuanganene ni Nzambi. Kála ki tua di longo mu Kibatulu 1 kia divulu didi, Jihova, nzumbi. (Nzuá 4:24) Kienhiki, Jihova ki muthu mu xitu. O ku bhanga Adá mu kidifuanganu kia Nzambi, kijimbulula kuma muéne a mu bhange ni ídifua ia Nzambi, kála o henda, unjimu, kuiuka, ni kutena. Adá uexile ué kála Tat’ê mu ukexilu ua mukuá, ua ku kala ni ufôlo ua ku sola ia uabha ni ia iibha. Kienhiki, Adá ka kexile kála makina, i tena ku bhanga ngó ia mu tumina. Maji, muéne ua tenene ku bhanga ioso ia mesenene, o ku sola o ima ia uabha mba o ima ia iibha. Se ua solele ku belesela Nzambi, muéne ueji kala mu Palaízu mu ixi katé ku hádia.

6 Kienhiki, mu ku bhukumukina Nzambi, Adá a mu xindi o kufuá, iu ua futu o kituxi kiê. O kituxi kiê, kia mu bhingi o muenhu uê ua iuka ni mabesá oso. (Dimatekenu 3:17-19) Kiki-phe, Adá ka texi ngó o muenhu uê, maji ni ua muiji uê. O Kizuelu kia Nzambi kiexi: “Kala kiki, mukuâ ni kia bokona o ituxi mu ngongo ku muthu umoxi, [Adá] o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.” (Loma 5:12) Kienhiki, etu enioso tua lundula o kituxi kia Adá. Mukonda dia kiki, o Bibidia i tanga kuma muéne ua di “sumbisa” ni muiji uê kála abhika a ituxi, ni a kufuá. (Loma 7:14) Kiki-phe, Adá ni Eva ka kingila dingi kima, mukonda ene a solo ku bhukumukina Nzambi. Maji o muiji uê-phe, ni etu ué?

7 Jihova ua bhulula o mundu ni kukula. O kukula ihi? O kukula ku jimbulula ima iiadi. Kia dianga, o kukula o kifutu kia bhana phala ku bhulula, mba ku sumba kima. I tena ku disokesa ni kifutu kia bhana phala ku bhulula o disoladi mu kaleia. Kaiadi, o kukula o kifutu kia bhana phala ku futa kima. Ia difu kála kitadi kia futa kioso kia zanga kima. Mu kifika, se muthu u bheka o divua, ua tokala u futa o kitadi kia tokala mu valolo ia kima kia zange.

8 Kiebhi kieji futa o ima ioso ia texi Adá, ni ku tu bhulula ku ubhika ua ituxi ni mu kufuá? Ndoko tu di longe ia lungu ni kukula kua bhana Jihova, ni ihi íii i tena ku jimbulula phala eie.

KIEBHI KIA BHANA JIHOVA O KUKULA

9 Tundé kia texi o muenhu ua iuka, seku muthu mu xitu ueji tena ku tu bhulula. (Jisálamu 49:7, 8) Kua bhingile o kifutu kia soko phala ku futa o muenhu ua texi. Kiki kiene kimoxi ni ufundisu ua iuka, ki tu sanga mu Dízui dia Nzambi, diambe: “muenhu mu muenhu.” (Matendelelu 19:21) Mu kiki-phe, ihi ieji futa o valolo ia muenhu ua iuka ua texi Adá? O ‘kukula kua bhingile’ muenhu ua mukuá uaiuka.—1 Timote 2:6.

Jezú uafú phala ku tu kula

Jihova ua bhana o Mon’ê umoxi-élele kála sata bhu kididi kietu

10 Kiebhi kia bhana Jihova o kukula? Muéne ua tumikisa mon’ê ua iuka, mu ixi. Maji Jihova ka tumikisa ngó muthu uoso-uoso mu nzumbi. Muéne ua tumikisa o Mon’ê umoxi-élele. (1 Nzuá 4:9, 10) O Mona iú mu vondadi iê, ua xisa o kididi kiê ku diulu. (Filipe 2:7) Kála ki tua di longo mu kibatulu ku dima mu divulu didi, Jihova ua bhange madiuanu kioso muéne kia tumikisa o muenhu ua Mona iú, mu mala dia Madiia. Muaxaxi ka nzumbi ikôla ia Nzambi, Jezú a mu vuala kala muthu ua iuka, sé kituxi.—Luka 1:35.

11 Kiebhi o muthu umoxi ueji bhulula jimidi ja athu? Kiebhi o jimidi ja athu, eza mu kala mu ituxi? Lembalala kuma, mukonda dia Adá ku ta kituxi, muéne ua texi o muenhu uê ua iuka. Kienhiki, muéne keji tena ku u bhana ku muiji uê. O kima kieji bhana ngó o kituxi ni kufuá. Jezú a mu ixana mu Bibidia “Adá ia sukidila-ku,” uakexile ni muenhu ua iuka, nuka ua tele kituxi. (1 Kolindo 15:45) Jezú ua bhingana bhu kididi kia Adá phala ku tu bhulula. O ku bhana o muenhu uê mu sata mu ku belesela Nzambi, Jezú ua futu o kituxi kia Adá. Kienhiki, Jezú ua bheka o kidielelu ku muiji ua Adá.—Loma 5:19; 1 Kolindo 15:21, 22.

12 O Bibidia i tanga o hadi ia talele Jezú, ande dia kufuá. Muéne a mu beta kiavulu, iá a mu papela ku taka katé kiafú. (Nzuá 19:1, 16-18, 30; Kibandekesu) Mukonda diahi Jezú ua tokalele ku tala o hadi iavulu? Mu kibatulu ku pholo kia divulu didi, tua-nda di longa kuma Satanaji uambe kuila o jiselevende ja Jihova keji kolokota jifiiele se a bhita mu iluezu. Mukonda dia kixikinu kiê, kioso kia kexile mu tala hadi, Jezú ua kolokota iu ua londekesa kiambote kuma Satanaji mukuá makutu. Jezú ua londekesa kuma o muthu ua iuka u tena ku kolokota mu kixikinu kua Nzambi, mu ioso i mu bhanga Diabhu. Jihova ua sangulukile kiavulu ni Mon’ê ua kazola!—Jisabhu 27:11.

13 Kiebhi kia futu o kukula? Mu 14 a Nisã, mu mbeji ia Jijudé mu 33 K.K. (Kithangana kia Kristu) Jihova uehela kuila o Mon’ê ua iuka, a mu jibhe. Kienhiki, Jezú ua sate o muenhu uê ua iuka, “lumoxi ngó kuabhu.” (Jihebeleu 10:10) Kioso kiafú Jezú, mu kizuua kia katatu Jihova ua mu fukununa kála muthu mu nzumbi. Kioso kia bande ku diulu, Jezú uedikisa kua Nzambi o valolo ia muenhu uê ua iuka, ua satela mu kukula o muiji ua Adá. (Jihebeleu 9:24) Jihova ua xikina o valolo ia sata ia bhana Jezú, phala ku bhulula athu ku ubhika, ua ituxi ni kufuá.—Loma 3:23, 24.

O KUKULA KU JIMBULULA IHI PHALA EIE

14 Sumbala tu akua ituxi, maji tu tena ku tambula mabesá, mukonda dia ku tu kula. Ndoko tu di longe ia lungu ni mabesá a ujitu ua Nzambi, u tu tena ku tambula lelu ni ku hádia.

15O muloloki ua ituxi ietu. Mukonda dia ku lundula o ituxi, ku bhanga o kima kiambote kia tu bhonzo. Etu enioso tuene mu ta ituxi, mu ku zuela mba mu ku bhanga o ima. Maji mukonda dia sata ia Jezú tu tena ku tambula “o muloloko ua ituxi ietu.” (Kolose 1:13, 14) Phala ku tu loloka, tua tokala kudiela o ituxi ietu. Kioso ki tu bhinga o muloloki kua Jihova, tua tokala ku dionda ni ku lenduka, mu ku bhinga o muloloki ni kuidikisa o kixikinu kietu mu sata ia kukula kua Mon’ê.—1 Nzuá 1:8, 9.

16O muxima ua zele ku pholo ia Nzambi. O muxima ua neme u bhangesa o muthu ku kamba o kixikinu kiê, u tu bhangesa ué ku divua kála tu athu ka sidivila kima. Mukonda tu akua ituxi, mu kukula, Jihova u tu bhana o nguzu ia ku mu bheza ni muxima ua zele, sumbala tu akua ituxi. (Jihebeleu 9:13, 14) Íii i tu bhana nguzu ia ku zuela ni Jihova. Kienhiki tu tena ku zuela nê sé hele mu kusamba. (Jihebeleu 4:14-16) O ku kala ni muxima ua zele, ku tu bhana ku tululuka, ku bhangesa ué kuila eie u di zola mudiê, ku bheka ué kisangusangu.

17O ku kinga kua muenhu ua kalelaku mu palaízu mu ixi. O divulu dia Loma 6:23 dizuela kuma, “O futu ia ituxi kufua.” O velusu íii izuela ué: “Maji o ujitu-phe ua Nzambi muenhu ki uabhua, mua Kristu Jezú, Ngana ietu.” Mu Kibatulu 3 kia divulu didi, tua tange ia lungu ni mabesá mu Palaízu mu ixi. (Dijingunuinu 21:3, 4) O mabesá oso iá kála o muenhu ua kalelaku, ni sauidi ia iuka, a-nda kala kidi, mukonda Jezú ua fuila bhu kididi kietu. Phala ku tambula o mabesá iá, tua tokala ku londekesa kuma tua zolo o ujitu ua kukula.

KIEBHI KI U TENA KUIDIKISA O KISAKIDILU KIÊ?

18 Mukonda diahi tua tokala ku sakidila Jihova mu ku tu bhana o kukula? O ujitu u beta-kota, se ua bhingi hadi, nguzu, ku ió ua u bhana. Etu tu sanguluka, kioso ki tu mona kuma o ujitu iú, a tu bhana-u ni henda. O kukula, uene o ujitu ua beta-kota ua tu bhana Nzambi. “Mbata Nzambi ua zola o mundu, katé kia suku mu kubhana Mon’ê umoxi-èlele,” kála kiambe o divulu dia Nzuá 3:16. O kukula kuidikisa o henda ia Jihova ko kuetu. Kuidikisa ué o henda ia Jezú, mukonda muéne ua tu bhana muenhu mu vondadi iê. (Nzuá 15:13) Kiki-phe o ujitu ua kukula ua tokala ku tu xikinisa kuila Jihova ni Mon’ê a tu zolo.—Ngalásia 2:20.

19 Kiebhi-phe, eie u tena kuidikisa o kisakidilu kiê kua Nzambi mu kukula? Kia dianga, di longe dingi kia lungu ni Mubhani ua Dikota, Jihova. (Nzuá 17:3) O ku di longa o Bibidia ni kikuatekesu kia divulu didi, kia-nda ku kuatekesa kuijiia dingi. Kioso ki u bandekesa o kuijiia kuê kua lungu ni Jihova, ua-nda beta ku mu zola. O henda íii ia-nda ku bhangesa ku mu belesela ni ku bhanga o vondadi iê.—1 Nzuá 5:3.

O muhatu ua mu tanga o Bibidia

O ku bandekesa o kuijiia kuê kua Jihova, ukexilu phala eie kuidikisa o kisakidilu kiê, ku ujitu ua ku kukula

20Kala ni kixikinu mu sata ia kukula ia Jezú. Jezú uambe ia lungu ni muéne: “Uoso ua xikana o Mona, uala ni muenhu ki uábhua.” (Nzuá 3:36) Kiebhi-phe ki tu tena kuxikina kua Jezú? O kixikinu kiki, ka ki idikisa ngó mu izuelu. O divulu dia Tiiaku 2:26 diambe kiki, “O kuxikana, kua di kalela sè ima ia kubhanga, kuafu.” Kienhiki, o kixikinu kia kidi a kidikisa mu “ima ia kubhanga” mba mu ikalakalu ietu. Phala ku londekesa kuma tuala ni kixikinu kua Jezú, tua tokala ku bhanga kala kia bhange muéne, mu izuelu ni mu ikalakalu ietu.—Nzuá 13:15.

21Ndé mu kilunga phala ku mona o Seialu ia Ngana. Mu usuku ua 14 a Nisã, ia 33 K.K., Jezú ua mateka o kizuua kia fuma a kixana mu Bibidia “o Seialu ia Ngana.” (1 Kolindo 11:20; Matesu 26:26-28) O fesa íii ilembalala o kufuá kua Kristu. Jezú ua bhangele kiki, phala ku kuatekesa o jipoxolo jê ni Jikidistá ja mukuá, kuijiia kuila Jezú mu kufuá kuê, ua bhana o muenhu uê phala ku tu kula. Mu fesa ienii, Jezú ua tumina: “Bhangenu jinga kienhiki mu ku ngi banza eme.” (Luka 22:19) O Seialu i tu lembalala o henda ionene iedikisa Jihova ni Jezú, mu ku tu kula. Tu tena ku dikisa o kisakidilu kietu mu kukula, mu kuia mu Seialu mu mivu ioso, phala ku lembalala o kufuá kua Jezú.*

22 O kukula kua tu bhana Jihova, ujitu ua dikota. (2 Kolindo 9:14, 15) O ujitu iu ua dikota u tena ku kuatekesa ué athu afú kiá. Mu Kibatulu 6 ni 7, ia-nda jimbulula se kiebhi.

IHI I LONGA O BIBIDIA

  • O kukula o njila iedikisa Jihova phala ku bhulula athu mu ituxi ni mu kufuá. —Efezo 1:7.
  • Jihova ua bhana o kukula, mu ku tumikisa o Mon’ê umoxi-élele mu ixi, phala ku fuila bhu kididi kietu.—1 Nzuá 4:9, 10.
  • Mukonda dia kukula, a tu loloka o ituxi ietu, tu kala ni mixima ia zele, tu kingila ué o muenhu ua kalelaku.—1 Nzuá 1:8, 9
  • Tu londekesa o kisakidilu kietu mu kukula, mu ku bandekesa o kuijiia kuetu kua lungu ni Jihova, mu kala ni kixikinu ku sata ia kukula kua Jezú, ni kuia mu fesa ia Seialu ia Ngana mivu ioso.—Nzuá 3:16.

*  Phala kuijiia dingi ia lungu ni kijimbuluilu kia Seialu ia Ngana, tanga o Kibandekesu


Ibhuidisu

1, 2. (a) Ujitu uahi ua beta-kota phala eie? (b) Mukonda diahi tu zuela kuma o kukula o ujitu ua beta-kota u ueji tambula?

3. O kukula ihi, ni ihi i tua bhingi ku tendela phala ku bhana valolo ku ujitu iú ua beta-kota?

4. O ukexilu ua iuka ua muenhu ua Adá, ueji mu jimbulula ihi?

5. O Bibidia ijimbulula ihi, kioso ki izuela kuma Nzambi ua bhange Adá mu “kidifuanganu kiê”?

6. Ihi ia texi Adá mukonda dia ku bhukumukina Nzambi, íii ia bhekela ihi ku muiji uê?

7, 8. O kukula kua bhingi ima iiadi iahi?

9. Kukula kuahi kua bhingile?

10. Kiebhi kia bhana Jihova o kukula?

11. Kiebhi kieji tena o muthu umoxi ku bhulula jimidi ja athu?

12. Ihi ia londekesa o hadi ia tale Jezú?

13. Kiebhi kia futu o kukula?

14, 15. Phala ku tambula “o muloloko ua ituxi ietu,” Ihi i tua tokala ku bhanga?

16. Ihi i tu bhangesa kubheza Nzambi ni muxima ua zele, ni valolo iahi iala na-iu o muxima ua zele?

17. Mabesá ahi tua-nda kala nau, mukonda dia Jezú ku fuila bhu kididi kietu?

18. Mukonda diahi tua tokala ku sakidila Jihova mu ku tu bhana o kukula?

19, 20. Kiebhi-phe eie u tena kuidikisa o kisakidilu kiê kua Nzambi mu ujitu ua kukula?

21, 22. (a) Mukonda diahi tua tokala o kuia mu Seialu ia Ngana mivu ioso? (b) Ihi tua-nda di longa mu Kibatulu 6 ni 7?