O Bibidia ki i tange o kizuua kia vuala Jezú. Iene i tu tangela kuila Jezú, ka mu vuala mu mbeji ia Kaiadi.

Xinganeka ngó kiebhi kia kexile o jithembu mu mbeji íii mu mbanza ia Beleme mua vualela Jezú. O mbeji ia akua Judé ia Quisleu (o jimbeji já Kamoxi ni Kaiadi) iexile mbeji ia mbambi ni ia mvula. O mbeji ia kaiela o mbeji ia Tebete (o jimbeji já Kaiadi ni ia Katatu). Iexile mbeji ia mbambi ia vulu ku muvu, kuexile mbundu ku milundu. Ndoko tu di longo ihi i zuela o Bibidia ia lungu ni jithembu ku ixi ienhoió.

O musoneki ua Bibidia, Ejidala, uambe kuila o mbeji ia Quisleu iexile muene mbeji ia mbambi ni ia mvula. Kioso kia zuela kuila o mundu ua di bhongoluela mu Jeluzaleme “bhu mbeji ia kavua [Quisleu] mu kizuua kia makuinhi aiadi ia mbeji” Ejidala uambe kuila, o mundu uoso ‘akexile mu teketa mukonda dia mvula.’ Mukonda dia jithembu ku bhonza, ku muvu uenhio o mundu a diongekele, ia a di ambela mudiâ: “Kuene ué makumbi ma jimvula ja vulu kinéne, ku kala bhu kanga bhabha, ki ki xikina.” (Ejidala 10:9, 13; Jelemiia 36:22) Ki tua tokala ku di uana kuila o abhidi a tungile kuenhoko akexile bhu kanga mu usuku ni ibhaku iâ mu mbeji ia Kaiadi!

Abhidi ni ibhaku iâ

Kioso kia vuala Jezú, o abhidi ni ibhaku iâ akexile mu mukáu

Maji, o Bibidia iamba kuma, o abhidi akexile mu mikau, mu kuinga o ibhaku mu usuku uenhó kioso kia vuala Jezú. O musoneki ua Bibidia, Luka, uambe kuila mu kithangana kienhokio kua kexile abhidi “a xala mu mukáu, mú langa o ilunga iâ mu usuku” bhua zukama mu Beleme. (Luka 2:8-12) Ejiia nakiu kuila o abhidi a tungile mu mukáu, ka kexile ngó muia-ku um muanha. Ene akexile ni ibhaku iâ, mu mukáu mu usuku. O kuila o ku tunga mu mukáu ku lombolola thembu ia mbambi, mba ia mvula, ia mbeji ia Kaiadi mu Beleme? Kana. O ima ia bhiti kioso kia vuala Jezú ilondekesa kuila, muéne ka mu vuala mu mbeji ia Kaiadi.*

O Maka a Nzambi a tu tangela o kizuua kiafu Jezú, maji ka tu tangela o kizuua kia mu vuala. Kiki, ki tu lembalala o maka a zuela Sobha Solomá ‘Kota o kufumana, unguendu ua uabha o dizumba ndenge; o kizuua ué kia kufuá kota, o kia ku vuala muthu ndenge.’ (Ndongixi 7:1) Mukonda dia kiki, ki tua tokala ku diuana kuila o Bibidia i tu tangela maka a vulu alungu ni ukunji, ni ufuilu ua Jezú, maji u tanga ngó bhofele o kizuua kia uvualukilu uê.


*  Phala kuijiia dingi, tanga o divulu Raciocínio à Base das Escrituras mu jimbandu ja 167-171, a di bhange ku jimbangi ja Jihova.

← Tanga o kibandekesu kia bhingi o kibatulu