Ku bokona mu madisá

Ku bokona mu madisá

Jimbangi ja Jihova

Select language Kimbundu

KIBANDEKESU

Mukonda Diahi o Jikidistá ja Kidi Kene mu Bheza o Dikulusu

Mukonda Diahi o Jikidistá ja Kidi Kene mu Bheza o Dikulusu

O DIKULUSU, ene ku di bheza, ni ku dixila ku jimidi ja athu. O Encyclopoedia Britannica i tanga kuma o dikulusu “o kijimbuete kia beta-kota kia ngeleja ia Kidistá.” Maji, o Jikidistá ja kidi kene mu bheza o dikulusu. Mukonda diahi?

Mukonda Jezú Kristu ka fuila ku dikulusu. Mu Ngeleku o dízui “dikulusu” a diamba stau.ros’. O kizuelu kiki kilombolola muxi mba taka.” A Biblia Companheira izuela: “ [Stau.ros’] ki kilombolola mixi iiadi i di bhidika…Se-ku kima mu kisoneku kia Ngeleku, mu Kikutu Kiobhe, kilondekesa mixi iiadi.”

Saí ibatulu mu Bibidia, o asoneki ka soneka-mu dikulusu, a soneka-mu kisoneku kiengi, kioso kia tumbula o kima kua fuila Jezú. O kizuelu kiki mu Ngeleku, a ki xana xy’lon. (Ikalakalu 5:30; 1 Phetele 2:24) O kizuelu kiki kilombolola ngó muxi, mba mbandu ia muxi.”

Phala ku jimbulula se mukonda diahi o ifumbe akexile ku i jibha ku taka, o divulu (A Cruz e a Crucificação), dia Hermann Fulda, dizuela: “Ki bhua kexile mixi bhu kididi kioso-kioso kia sololele phala ku jibha-mu muthu. Kienhiki, akexile mu phaphela kabasa muxi bhoxi. Kuene kua kexile mu kuta o ifumbe, mba ku a phaphela o maku ni inama.”

O kidi kia soko kia lungu ni maka enhá, tu ki sanga mu Maka a Nzambi. Mukonda o poxolo Phaulu uambe: “Maji Kristu-phe ua tu kula ku mázui ma Kitumu, mu ku bhiluka mukua mázui mu kididi kietu. Kuma kiosoneke mu mikanda: ‘Uoso a mu nhenga mu taka, mukua mázui. [“ku muxi,” King James Version].” (Ngalásia 3:13, NW) Bhabha, Phaulu ua tumbula o divulu dia Matendelelu 21:22, 23, dizuela muxi, kana o dikulusu. Kienhiki, mukonda dia ufuilu iú ku bhekela “mázui” ku muthu, o Jikidistá ka tokala ku kala ni iteka ia Kristu a mu phaphela mu tata mu mabhata mâ.

Ki kuala kima kilondekesa kuila mu 300 ja mivu ja dianga, kioso kiafú Kristu, kuila ió akexile mu zuela kuila Jikidistá, akexile mu bheza o dikulusu. Mu hâma jiuana ja mivu ia dianga, o nguvulu Constantino, mukua pagão, kioso kia xikana o Kristianismu ia makutu, ua bandekesa o dikulusu kála o kijimbuete kia kidistá. Kilunji kioso-kioso kia kexile na-kiu Constantino, etu ki tua kijiia, maji o dikulusu ki diala ni kima kia lungu ni Jezú Kristu. Mu kidi, o dikulusu dia tundu ku jingeleja ja makutu. O New Catholic Encyclopedia, diambe: “O dikulusu akexile mu di bheza mu ijila ia dianga ande dia Jikidistá, ni kua ioso kexile Jikidistá.” Saí maungana ene mu funga o dikulusu ni ubhezelu ua muanha, ni ijila ia undumbu, iene mu bhanga o jiphagão.

Mukonda diahi-phe a bandekesa o kijimbuete kiki kia phagão? Nange, phala kiki bhonze o jiphagão ku xikina o “Kristianismu.” Maji o Bibidia, izuela kuma ku bheza o ijimbuete ioso-ioso ia phagão, kituxi. (2 Kolindo 6:14-18) O Mikanda ikôla i fidia ué o ubhezelu uoso ua iteka. (Makatukilu 20:4, 5; 1 Kolindo 10:14) Kienhiki, o Jikidistá ja kidi a bhanga kiambote, mu ku kamba ku bheza o dikulusu.*


*  Phala kuijiia kiambote o maka alungu ni dikulusu, tanga mu jimbandu ja 99-103, mu divulu Raciocínio à Base das Escrituras,a di bhange ku jimbangi ja Jihova

← Tanga o kibandekesu kia bhingi o kibatulu