PHALA ku tu kuatekesa kuijiia o Mexiia, Jihova Nzambi ua tumina o nzumbi iê ikôla ku jipolofeta ja Bibidia ku soneka ijimbuete ia lungu ni uvualukilu, ni ukunji, ni ufuilu ua Mubhuludi a mu kanena. O isoneku ioso íii ia Bibidia, ia di kumbidila kua Jezú Kristu. O isoneku íii madiuanu a kidi. Phala ku londekesa, tu tale o isoneku ia tange izulukutu ia lungu ni uvualukilu, ni undenge ua Mexiia.

O polofeta Izaia uambe kuila o Mexiia, ueji tunda ku muiji ua Sobha Davidi. (Izaia 9:7) Kiene muene ki kia bhiti, Jezú a mu vualela ku muiji ua Davidi.—Matesu 1:1, 6-17.

O polofeta ia mukuá ia Nzambi, Mikeia, ua tange kuila o mona iú, ueji kala nguvulu, eji mu vualela mu mbanza ia “Beleme dia Efrata.” (Mikeia 5:2) Mu thembu ia vuala Jezú, kuexile mbanza jiiadi ja kexile ni dijina dia Beleme. Imoxi ia zukamene kua Nazalé ku thunda dia ixi, o ia mukuá ia zukamene ku Jeluzaleme mu Judá. O Beleme ia zukamene ku Jeluzaleme, m’okulu akexile ku ixana Efrata. Jezú, a mu vuala mu mbanza ienioió, kála kia tange muene o isoneku!—Matesu 2:1.

O isoneku ia mukuá ia Bibidia, iambe kuma, o Mona Nzambi eji mu ixana “mu Ijitu.” Jezú kioso kiexile hanji mona ndenge, a mu ambatele ku Ijitu. Ia vutuka nê ngó, kioso kiafú Helode, mu kiki, o isoneku ia di kumbidila.—Hozeia 11:1; Matesu 2:15.

O ibatulu i moneka mu kaxa ia lungu ni ‘Kisoneku’ i tanga maka a lungu ni Mexiia. Tua ku dióndo, sokesa o ibatulu ni ‘Ki kumbidilu.’ O ku bhanga kiki kua-nda suínisa o kixikinu kiê, mu Maka a Nzambi.

Kioso ki u tanga o ibatu íii, ia mikanda ikôla, eie ua tokala ku di lembalala kuila o isoneku íii, a isoneka jihama ja mivu, ande dia uvualukilu ua Jezú. Jezú uambe: “Ima ioso ia bhingi i bhita, iòsoneke mu Kitumu kia Mozé, ni mu madivulu a Jipolofeta, ni mu Jisalamu, ia ngi tokala eme.” (Luka 24:44) Kála ki u tena ku tanga mu Bibidia iê, o isoneku ioso ia di kumbidila muene—kála kia ki tange!

ISONEKU IA LUNGU NI MEXIIA
KIZULUKUTU KISONEKU KIKUMBIDILU
A mu vualela mu muiji ua Juda Dimatekenu 49:10 Luka 3:23-33
A mu vuala ku muzeletete Izaia 7:14 Matesu 1:18-25
Mbutu ia Sobha Davidi Izaia 9:7 Matesu 1:1, 6-17
Jihova uambe kuma, Mon’ê Jisálamu 2:7 Matesu 3:17
Ka mu xikine Izaia 53:1 Nzuá 12:37, 38
Ua bokona mu Jeluzaleme ku thandu dia bulu Zakadiia 9:9 Matesu 21:1-9
A mu sumbisa kua kamba diê Jisálamu 41:9 Nzuá 13:18, 21-30
A mu sumbisa mu 30 a kitadi kia phalata Zakadiia 11:12 Matesu 26:14-16
Ua di xibha ku pholo ia jinguma jê Izaia 53:7 Matesu 27:11-14
A te jisorte ku izuatu iê Jisálamu 22:18 Matesu 27:35
A mu nuisa mvindangele Jisálamu 22:7, 8 Matesu 27:39-43
Ka mu bukula kifuba Jisálamu 34:20 Nzuá 19:33, 36
A mu fundu mu mbila ia jimvuama Izaia 53:9 Matesu 27:57-60
A mu katula k’alunga sé ku mu sekumuka Jisálamu 16:10 Ikalakalu 2:24, 27
A mu zangalala ku mbandu ia madilu ma Nzambi Jisálamu 110:1 Ikalakalu 7:56

← Tanga o kibandekesu kia bhingi o kibatulu