Ku bokona mu madisá

Ku bokona mu madisá

Musoso 116: Kiebhi Tu Tena Ku Kala Ni Muenhu Ua Kalelaku

Musoso 116: Kiebhi Tu Tena Ku Kala Ni Muenhu Ua Kalelaku

UEJIIA se o mona-ndenge ni makamba mê, a mu tanga ihi? Kiene, o divulu didi di ua mu tanga—Divulu Diami Dia Misoso ia Bibidia. Ene a mu tanga ué o Musoso kála eie—“Kiebhi tu Tena ku Kala ni Muenhu ua Kalelaku.”

Mona ndenge ua mu tanga

Eie uejiia se, ihi ene ia mu dilonga? Kia dianga, tua tokala tu dilonga maka alungu ni Jihova, ni Mon’ê Jezú, phala tu kale ni muenhu ua kalelaku. O Bibidia izuela kuma: ‘Kiki kiene ki tu kala ni muenhu ua kalelaku. Dilonge maka alungu ni Nzambi ia kidi imoxi-élele, ni Mon’ê a mu tumikisa mu ixi, Jezú Kristu.’

Kiebhi ki tu tena ku dilonga maka alungu ni Jihova Nzambi ni Mon’ê Jezú? Kia dianga, tua tokala ku tanga o Divulu Diami Dia Misoso ia Bibidia, tundé ku dimatekenu, katé ku disukilu. Íii i tu tangela maka avulu alungu ni Jihova ni Jezú, ki kiene? I tu longa ué ima iavulu, ia bhange ni ia-nda bhanga. Maji o ku tanga ngó divulu didi ki ki soko, tua tokala ku bhanga dingi.

Bibidia imoxi

Ua mu mona o divulu dia mukuá, diala bhoxi? O Bibidia. Bhinga muthu a tange o ibatu ia Bibidia, izuela ia lungu ni misoso ia divulu didi. O Bibidia i tu bhana o ijimbuete ioso i tua mesena phala ku sidivila Jihova kiambote, ni ku nganhala o muenhu ua kalelaku. Kienhiki, tua tokala ku tanga o Bibidia izuua ioso.

Maji ku dilonga ia lungu ni Jihova Nzambi, ni Jezú, ki ki soko. Tu tena kuijiia kiavulu ia lungu ni ene ni ilongesu iâ, maji né kiki, ki tu tena ku kala ni muenhu ua kalelaku. Eie uejiia se ihi ia kambe dingi?

Tua tokala ué ku belesela ioso i tu dilonga. Ua lembalala Juda dia Kadiota? Muéne uexile poxolo mu 12 kia solele Jezú. Juda uejidile kiavulu ia lungu ni Jihova ni Jezú. Maji, ihi ia bhiti ni muéne? Muéne uakexile ni luímbi, iu ua sumbisa Jezú ku jinguma jê mu 30 a kitadi kia phalata. Kienhiki, Juda ka-nda kala ni muenhu ua kalelaku.

Eie ua lembalala Jeazí, o diiala di tua tange mu Musoso ua 69? Muéne ua-ndalele o izuatu ni kitadi ki kia mu tokalele. Kienhiki, muéne ua tange makutu phala ku kala ni imbamba ienioió. Maji Jihova ua mu kaxtikala. Muéne ua-nda tu kaxtikala ué, se ki tu belesela o itumu iê.

Maji kua kexile athu avulu ambote a sidivile Jihova ni kixikinu. Tua mesena ku kala kála ene, ki kiene? O mona-ndenge, Samuuele phangu iambote phala ku i kaiela. Lembalala kuma, kioso ki tua tange o Musoso ua 55, muéne uakexile ngó ni mivu iuana mba itanu kioso kia mateka ku sidivila Jihova mu balaka iê. Kienhiki, ki bhuale kima se eie o mona-ndenge hanji, eie ku mona-ndenge-élele phala ku sidivila Jihova.

Mu kidi, o muthu u tua-ndala ku mu kaiela, Jezú Kristu. Kioso kiexile hanji mona-ndenge kála kiedikisa o Musoso ua 87, muéne uendele mu tembulu mu zuela ni athu, maka alungu ni Tat’ê ia diulu. Ndoko tu kaiele o phangu iê. Ndoko tu tangele akuetu ia lungu ni Nzambi ietu Jihova, ni Mon’ê Jezú Kristu. Se tu bhanga kiki tua-nda kala ni muenhu mu palaízu ia ubhe ia Nzambi mu ixi.

Nzuá 17:3; Jisálamu 145:1-21.



Ibhuidisu

  • Ihi i tua tokala kuijiia phala ku kala ni muenhu ua kalelaku?
  • Kiebhi tu tena ku dilonga ia lungu ni Jihova Nzambi ni Jezú, kála kidikisa o mona-ndenge ni makamba mê mu fikula?
  • Divulu diebhi dia mukuá di ua mu mona mu fikula, ni mukonda diahi tua tokala ku di tanga izuua ioso?
  • O ku dilonga kia lungu ni Jihova ni Jezú ki kisoko, ihi i tua tokala ku bhanga dingi se tua mesena ku nganhala o muenhu ua kalelaku?
  • Disá diahi tua dilongo mu Musoso ua 69?
  • Phangu iahi iambote ia Samuuele iedikisa o Musoso ua 55?
  • Kiebhi tu tena ku kaiela o phangu ia Jezú Kristu, se tu bhanga kiki ihi tua-nda nganhala ku hádia?

Ibhuidisu ia mukua

  • Tanga Nzuá 17:3.

    Kiebhi kiedikisa o Mikanda ikôla kuma o kuijiia Jihova Nzambi ni Jezú Kristu, ilombolola dingi kuila ki ki soko ngó o kuijiia o misoso? (Mat. 7:21; Tii. 2:18-20; 1 Nzuá 2:17)

  • Tanga Jisálamu 145:1-21.

    Mukonda diahi tua tokala ku ximana Jihova? (Jisá. 145:8-11; Dij. 4:11)

    Kiebhi Jihova “u bhanga mbote ku athu uoso,” ni mukonda diahi kiki kia tokala ku tu zukamesa dingi kua muéne? (Jisá. 145:9; Mat. 5:43-45)

    Se tu zola Jihova ni muxima, ihi tua tokala ku bhanga? (Jisá. 119:171, 172, 175; 145:11, 12, 21)