KUA BHITI 10 dia mivu, tundé o Sobha Nabukodonozolo kiambatele oso a dimuka akua Izalaiele katé mu Babilonha. Tala ihi ia mu bhita-mu! Jeluzaleme a i te túbhia. Akua Izalaiele a subhuka, a ambatele kála abhika mu Babilonha.

Lembalala-kiu kuma íii iene ia dimuine o jipolofeta ja Jihova, kuma ieji bhita se ene ka xisa ku bhanga o ima iaiibha. Maji akua Izalaiele ka beleselele o jipolofeta. Ene a kolokotele kubheza o jinzambi ja makutu, Jihova kana. Kienhiki, o mundu a tokalele ku a kaxtikala. Tua kijiia mukonda o polofeta ia Nzambi Izekiiele ua tu tangele o maka alungu ni ima iaiibha ia bhangele akua Izalaiele.

Uejiia nanhi uexile Izekiiele? Muéne uexile ué muzangala a mu ambatele mu Babilonha kua Sobha Nabukodonozolo, 10 dia mivu ande dia kubuika Jeluzaleme. Daniiele ni makamba mê kitatu, Sadalake, Mizake ni Abede-neko, a ambatele ué kumoxi mu Babilonha.

Kioso Izekiiele kia kexile hanji mu Babilonha, Jihova ua mu idikisa ia kexile mu bhita mu tembulu, mu Jeluzaleme. Jihova ua bhangele kiki mu madiuanu. Izekiiele uakexile hanji mu Babilonha, maji Jihova ua mu ehela ku mona ima ioso ia kexile mu bhanga mu tembulu. O ia mono Izekiiele iexile ima ia xidi!

Jihova uambela Izekiiele, ‘Tala o ima ia dise ia mu bhanga o mundu mu tembulu.’ ‘Tala o jipalelu jezala ni ifikula ia jinhoka, ni iama ia mukuá. Tala, akua Izalaiele a mu ibheza!’ Izekiiele ua tenene ku mona o ima ioso íii, ia kexile mu bhita, iu ua i soneka.

Athu akexile mu kaleia, a xa Jeluzaleme

Jihova uebhula Izekiiele. ‘Ua mu mona ihi ia mu bhanga a tuameni a Izalaiele mu ka suekelu?’ Kiene, muéne ua mono. Mua kexile 70 dia maiala, en’oso akexile mu bheza jinzambi ja makutu. Ene akexile mu zuela: ‘Jihova ka mu mona. Muéne ua xisa o ixi.’

Kienhiki, Jihova uedikisa kua Izekiiele ahatu a kamúkua akexile bhu dibhitu dionene dia thunda dia tembulu. Ene a xikamene koko phala kubheza o nzambi ia makutu Tamuji. Tala o maiala iâ, ala mu njila ia tembulu ia Jihova! Ene exile 25. Izekiiele ua mu a mona. Ene a fukamena ku thunda mu bheza o dikumbi!

Jihova uambe, ‘O mundu iu, kala mu ngi xila.’ ‘Ene ka mu bhanga ngó ima iaiibha, maji a mu i bhanga muene mu tembulu iami!’ Kienhiki-phe, Jihova ua kanena: ‘Ene a-nda mona o nguzu ia njinda iami. Ki nga-nda kala ni henda iâ, kioso kia-nda ku a buikisa.’

Kua bhitile ngó mivu itatu, kioso Jihova kiedikisa kua Izekiiele o ima íii, akua Izalaiele a bhukumukine o Sobha Nabukodonozolo. Kienhiki, muéne uai mu bhânga nau. Kua bhiti muvu ni sambuadi dia mbeji akua Babilonha a bulu o ilumbu ia Jeluzaleme, ni mbanza ioso a i te túbhia. Athu avulu afú, a kamúkua a ambatele kala abhika mu Babilonha.

Mukonda diahi Jihova uehela o kubuika kuku kuonene ku bhita ni akua Izalaiele? Mukonda, ene kévu Jihova, né ku belesela o itumu iê. Íii idikisa kuma, kia beta-kota ku bhanga ioso i zuela Nzambi.

Ku dimatekenu saí athu a ehela ku kala mu ixi ia Izalaiele. O Sobha Nabukodonozolo ua tumina o Judé a mu ixana Jedaliia ku tambula konda ia mundu iú. Maji, saí akua Izalaiele a jibhile Jedaliia. Kienhiki, o mundu uakexile ni uôma kuila akua Babilonha eji kuíza ku a buika, mukonda dia kima kiki kiaiibha kia bhangele. Kienhiki, a jijidika Jelemiia ku lenga nâ mu Ijitu.

O ixi ia Izalaiele ia xala sé athu. Ki mua kexile muthu ua tungile ku ixi íii, katé kia bhitile 70 dia mivu. O ixi iexile ngó. Maji Jihova ua kanena ku vutukisa dingi o mundu uê ku ixi iâ, kioso kieji bhita o 70 dia mivu. Kienhiki, ihi ia kexile mu bhita ni mundu ua Nzambi mu ixi ia Babilonha kua ambatele? Ndoko tu tale.

2 Jisobha 25:1-26; Jelemiia 29:10; Izekiiele 1:1-3; 8:1-18.



Ibhuidisu

  • Kála ki idikisa o fikula, ihi ia mu bhita mu Jeluzaleme ni akua Izalaiele?
  • Nanhi uexile Izekiiele, ni ima iahi ia madiuanu ia mu idikisa Jihova?
  • Mukonda dia akua Izalaiele a kambe ku xila Jihova, ihi muéne ia kanena?
  • Ihi ia bhangele o Sobha Nabukodonozolo kioso akua Izalaiele kia mu bhukumukine?
  • Mukonda diahi Jihova uehela o kibuikilu kiki ku bhita ni akua Izalaiele?
  • Mukonda diahi o ixi ia Izalaiele ia xala sé muthu, ni mu thembu ikuxi?

Ibhuidisu ia mukua

  • Tanga 2 Jisobha 25:1-26.

    Nanhi uexile Zedekiia, ni ihi ia bhitile ni muéne, ni kiebhi kiki kia kumbidila o kikanenu kia Bibidia? (2 Jis. 25:5-7; Ize. 12:13-15)

    Jihova ua tatela nanhi mu ituxi ioso ia bhangele Izalaiele? (2 Jis. 25:9, 11, 12, 18, 19; 2 Mal. 36:14, 17)

  • Tanga Izekiiele 8:1-18.

    Kiebhi o Kidistándade a kaiela akua Izalaiele a xisa o ubhezelu ua kidi, phala kubheza o muanha? (Ize. 8:16; Iza. 5:20, 21; Nzuá 3:19-21; 2 Tim. 4:3)