JOZIIA uakexile ngó ni dinake dia mivu, kioso kia kituka sobha ia madiembu aiadi a luiji a Izalaiele. Uexile hanji muzangala phala ku kala sobha. Mu dimatekenu, adiakimi a mu kuatekesele ku tumina o diembu.

Kioso Joziia kiexile kia sobha mu sambuadi dia mivu, ua mateka ku sidivila Jihova. Muéne ua kaiela o njila ja jisobha ja mbote kala Davidi, Jozafate ni Ezekiia. Kienhiki, kioso kiexile hanji muzangala, Joziia ua bhangele kima kia suína.

Sobha Joziia ni maiala mê a mu buika o iteka

Mu ithangana iavulu, saí akua Izalaiele a bhangele ima iaiibha. Ene a bhezele jinzambi ja makutu. Ene a fukamene ku iteka. Kienhiki, Joziia ni maiala mê a mateka ku buika o ubhezelu ua jinzambi ja makutu mu ixi. Kiki kiexile kikalakalu kiavulu, mukonda kua kexile athu avulu akexile mu bheza jinzambi ja makutu. Eie ua mu mona Joziia, ni maiala mê, bhobha mu bula o iteka.

Mu kusukáko, Joziia ua tumina maiala atatu, ku iudika o tembulu ia Jihova. Ua bhingi athu ku sangela kitadi phala ku futa o maiala eji bhanga o kikalakalu. Kioso kia kiexile mu ku kalakala, o mukunji Hilikiia ua sange-mu kima kia valolo. Kexile o divulu dionene dia itumu, ia tumine Jihova kua Mozé ku di soneka. Kua bhitile kiá mivu iavulu tundé ki dia jimbidile.

O divulu didi a diambata kua Joziia, muéne ua bhingi phala ku mu tangela na-diu. Kioso kia di tange, Joziia uejidile kuma athu ka kexile mu belesela o itumu ia Jihova. Kienhiki, muéne ua dizangalele kiavulu, iu ua tandula o izuatu iê, kala ki ua mu mona mumu. Muéne uambe: ‘Jihova ua dizangala n’etu, mukonda tata jetu ka belesele o itumu io soneke mu divulu didi.’

Hilikiia ni Sobha Joziia

Joziia ua tumu o mukunji Hilikiia phala ku tungununa se ihi Jihova ia-nda ku a bhanga. Hilikiia uai ku muhatu polofeta Hulda, iu ua mu ibhula. Muéne ua mu tangela o njimbu ia tundu kua Jihova phala ku i tangela Joziia: ‘Jeluzaleme ni athu oso a-nda ku a kaxtikala, mukonda akexile mu bheza jinzambi ja makutu, o ixi iezalele ni ituxi. Maji mukonda eie, Joziia ua bhange ima iambote, o kaxtiku kaka ka-nda kuíza ngó, mu kufuá kuê.’

2 Malunda 34:1-28.



Ibhuidisu

  • Joziia uakexile ni mivu ikuxi kioso kia kexile sobha, ni ihi ia mateka ku bhanga kioso kiexile kiá sobha mu sambuadi dia mivu?
  • Mu fikula ia dianga, Ihi ia mu bhanga Joziia?
  • Ihi ia sangele o mukunji ua dikota kioso o maiala akexile mu iudika o tembulu?
  • Mukonda diahi Joziia ua mu tandujula o izuatu iê?
  • Njimbu iahi ia tundu kua Jihova ia bhanene o polofeta Hulda kua Joziia?

Ibhuidisu ia mukua

  • Tanga 2 Malunda 34:1-28.

    Phangu iahi ia xisa Joziia, phala o mizangala a kulu ni ibhidi iavulu? (2 Mal. 33:21-25; 34:1, 2; Jisá. 27:10)

    Ima iahi iambote ia bhangele Joziia phala ku kolokotesa o ubhezelu ua kidi mu utuminu uê mu 8, 12 ni 18 dia mivu? (2 Mal. 34:3, 8)

    Disá diahi dia tu xisa o Sobha Joziia ni Mukunji ua Dikota Hilikiia, dia lungu ni ku iudika o ididi ietu ia ubhezelu? (2 Mal. 34:9-13; Jisa. 11:14; 1 Kol. 10:31)