EIE UEJIIA mukonda diahi o diiala didi ua mu samba kua Jihova? Mukonda diahi o mikanda ua izale ku pholo ia kalatódio ka Jihova? O diiala didi Ezekiia. Muéne uexile sobha ia madiembu aiadi a luiji lua Izalaiele. Muéne uala ni ibhidi iavulu. Mukonda diahi?

Sobha Ezekiia ua mu samba

Mukonda o kifuxi kia masoladi kia Sídia kia buikile o 10 dia diembu dia thunda. Jihova uehela ku bhita o ima íii, mukonda ene exile athu aiibha. Kienhiki, o kifuxi kia masoladi kia Sídia, ejile mu bhânga ni utuminu ua madiembu-aiadi.

O sobha ia Sídia ua tumikisa mikanda kua Sobha Ezekiia. O mikanda íii iene iedikisa Ezekiia kua Nzambi. Mu mikanda ene a xonguena Jihova, ni a tumina Ezekiia ku bhuila. Kienhiki, kiene kia sambe Ezekiia kua Jihova: ‘Jihova tu bhulule ku sobha ia Sídia. Kienhiki, o diembu dia-nda kijiia kuma eie ngó o Nzambi.’ O kuila Jihova uévu Ezekiia?

Ezekiia uexile sobha iambote. Muéne ka difuanganene ni jisobha jaiibha ja 10-dia diembu dia Izalaiele mba kála tat’ê, o Sobha Akâji. Ezekiia ua belesele o itumu ioso ia Jihova. Kienhiki, kioso Ezekiia kia zubha ku samba, o polofeta Izaia ua mu tumikisa njimbu ia tundu kua Jihova: ‘O sobha ia Sídia ka-nda tena ku bokona mu Jeluzaleme. Né disoladi dimoxi dia-nda zukama-mu. Ene ka-nda takula sosa mu mbanza.’

Tala mu fikula ku mbandu ia mukuá. O masoladi afú ua ejiia? Ene akua Sídia. Jihova ua tumikisa o anju iê mu usuku, o anju ia jibha 185.000 kia masoladi akua Sídia. Kienhiki, o sobha ia Sídia ua lenge, iu ua vutuka kubhata.

masoladi akua Sídia afú.

O utuminu ua madiembu-aiadi a u bhulula, o mundu-phe ua tululukile mu ithangana iofele. Maji, kioso kiafú Ezekiia, o mon’ê Manasa, ua kituka sobha. Manasa ni mon’ê, Amone, exile jisobha jaiibha. O ixi ia kexile dingi ni ituxi ni usuéia. Kioso o Sobha Amone kia mu jibha ku jiselevende jê, o mon’ê Joziia a mu bhange sobha ia madiembu-aiadi a utuminu.

2 Jisobha 18:1-36; 19:1-37; 21:1-25.



Ibhuidisu

  • Nanhi o diiala mu fikula
  • Mikanda iahi Ezekiia ia mu kuidikisa kua Nzambi
  • Ezekiia uexile sobha iahi
  • Ihi ia bhangele o anju ia Jihova ku akua Sídia
  • Sumbala o utuminu ua madiembu-aiadi akexile ni paze mu kithangana kofele

Ibhuidisu ia mukua

  • Tanga 2 Jisobha 18:1-36.

    Kiebhi kia mesene Labesake o mukunji ua akua Sídia, ku zozesa o kixikinu kia akua Izalaiele? (2 Jis. 18:19, 21; Mak. 5:2; Jisá. 64:3)

    Kioso kia kala ni jinguma, kiebhi o Jimbangi ja Jihova a kaiela o phangu ia Ezekiia? (2 Jis. 18:36; Jisá. 39:1; Jisa. 26:4; 2 Tim. 2:24)

  • Tanga 2 Jisobha 19:1-37.

    Kiebhi o mundu ua Jihova lelu a kaiela o ukexilu ua Ezekiia kia kala mu ibhidi? (2 Jis. 19:1, 2; Jisa. 3:5, 6; Jih. 10:24, 25; Tii. 5:14, 15)

    Mu ita itatu iahi, ia sofelele o Sobha Senakedibe, ni nanhi muéne ua difuanganene? (2 Jis. 19:32, 35, 37; Dij. 20:2, 3)

  • Tanga 2 Jisobha 21:1-6, 16.

    Mukonda diahi tuamba kuma, Manasa uexile sobha iaiibha kinene ua tumine mu Jeluzaleme? (2 Mal. 33:4-6, 9)