TALA o diiala mu menha. Muéne uala mu ibhidi, ki kiene? O mbiji íii iala kuaji phala ku mu minha! Eie uejiia se nanhi o diiala didi? Dijina diê Jona. Tu tale kiebhi muéne kia ditele mu ibhidi íii.

Jona uexile polofeta ia Jihova. Ki kua bhitile luua thembu iavulu, kioso kiafú polofeta Ilizeu, Jihova uambela Jona: ‘Ndé mu mbanza ia dikota ia Ninive. O ituxi ia mundu ió iavulu, eme nga-ndala uia mu zuela nâ, maka alungu ni ituxi iâ.’

Jona ni mbiji ionene

Maji Jona kandalele kuia-ku. Kienhiki, muéne ua sambela ku naviio iéngi, iu uai ku mbandu iéngi ia Ninive. Jihova ka sangulukile mukonda Jona ua lengele. Kienhiki, Muéne ua tumikisa kitembu kia dikota. Kiki kiexile kia dikota, mukonda o naviio iexile mu kiluezu kia ku bhobha. O endexi akexile ni uôma uavulu, ni a bhingi o kikuatekesu ku jinzambi jâ.

Mu kusukáko, Jona uambe: ‘Eme ngi mubhezi ua Jihova o Nzambi ia bhange o diulu ni ixi. Eme nga mu lenga phala ki ngi bhange ia ngi tumina Jihova.’ Kienhiki, o endexi a mu ibhula: ‘Ihi tua tokala ku bhanga phala ku imanesa o kitembu?’

Jona uixi, ‘Ngi takulenu mu kalunga, o kalunga ka-nda tululuka dingi.’ O endexi kandalele ku bhanga kiki, maji o kitembu kia kolokota, kienhiki, ene a takula Jona mu kalunga. Mu kusukáko o kitembu-phe kia bhu, o kalunga ka tululuka dingi.

Kioso Jona kia boba, a mu minha ku mbiji ionene. Maji muéne kafú. Uakexile mu mala dia mbiji, mu izuua itatu, ni usuku mu mala dia mbiji. Jona ua diela kiavulu, mukonda ka belesele Jihova mu kuia ku Ninive. Eie uejiia ihi ia bhange muéne?

Jona ua sambe kua Jihova mu ku bhinga kikuatekesu. Jihova ua bhangesa o mbiji kulusa Jona ku mavu a kukuta. Kienhiki, Jona uai katé ku Ninive. Kiki, ki ki tu longo kuma kia beta-kota ku belesela ioso izuela Jihova?

Divulu dia Jona.



Ibhuidisu

  • Nanhi uexile Jona, ni ihi ia mu tumine Jihova ku bhanga?
  • Ihi ia bhangele Jona kioso kia ditunine kuia kua mu tumine Jihova?
  • Ihi iambele Jona ia tokalele ku bhanga o a endexi a baluku phala ku tululukisa o kitembu?
  • Kála ki ua mu mona mu fikula, ihi ia bhitile ni Jona kioso kia mu takula mu menha?
  • Thembu ikuxi ia bhitile Jona mu mala dia mbiji ionene, ni ihi ia bhangele-mu?
  • 6. Kuebhi kuendele Jona kioso kia tundu mu mala dia mbiji, ni ihi i tu longa?

Ibhuidisu ia mukua

  • Tanga Jona 1:1-17.

    Kiebhi kia divuile Jona, kia lungu ni kikalakalu kiê, kia kubokela akua Ninive? (Jona 1:2, 3; Jisa. 3:7; Ndo. 8:12)

  • Tanga Jona 2:1, 2, 10.

    Kiebhi o kia bhitile ni Jona ki tu bhana kidielelu, kuma Jihova ua-nda tambuijila o misambu ietu? (Jisá. 22:24; 34:6; 1 Nzuá 5:14)

  • Tanga Jona 3:1-10.

    Kikolokotesu kiahi ki tu tambula mu kuijiia kuma Jihova ua sulukile mu ku tumina Jona, sumbala muéne mu dimatekenu ua luezele mu kikalakalu kiê? (Jisá. 103:14; 1 Phe. 5:10)

    O ia bhitile ni Jona ni akua Ninive, i tu longa ihi ia lungu ni ku diangela ku fundisa athu mu diembu dietu? (Jona 3:6-9; Ndo. 11:6; Ikalakalu 13:48)