UEJIIA se o kilumba kiki ua mu zuela ihi? Muéne ua mu zuela ni ngana, maka alungu ni polofeta ia Jihova, Ilizeu, ni madiuanu a bhangele ni kikuatekesu kia Jihova. O muhatu kejidile maka alungu ni Jihova, mukonda muéne kexile mukuá Izalaiele. Ndoko tu tale mukonda diahi, o kilumba kiki uala kubhata dia muhatu iú.

O muhatu mukuá Sídia. O muadi uê Naamane kabhitangu ka masoladi a Sídia. Akua Sídia a kuatele o kilumba kia mukuá Izalaiele, ni a mu ambatele ku muhatu ua Naamane, phala ku kala selevende iê.

Muhatu ua Naamane ni mubhik’ê

Naamane uakexile ni uhaxi a uixana dibhute. O uhaxi iú, u bolesa o xitu ia muthu. Íii iene ia kexile mu zuela o kilumba ku muhatu a Naamane: ‘Se o ngana iami uia ku polofeta ia Jihova mu Izalaiele, muéne ua-nda mu saka o dibhute diê.’ Kioso muadi uê kia bhixila, a mu tangela ioso ia zuela o kilumba.

Naamane ua mesene kiavulu kuiluka; kienhiki muéne uendele ku Izalaiele. Kioso kia bhixila, muéne uendele katé ku dibhata dia Ilizeu. Ilizeu ua tumina o selevende iê, ku mu ambela kuia mu zoua mu sambuadi dia veji mu Ngiji ia Njolodá. Kiki kia bhangesa Naamane ku dizangala kiavulu, inga muéne uambe: ‘O jingiji ku ixi iami ja beta-kota, o jingiji ku Izalaiele ndenge!’ Kioso kia zubha o ku zuela, Naamane uaié.

Maji, o selevende iê ua mu ambela: ‘Ngana, se Ilizeu ua ku tumine kima kia bhonzo, eie ueji ku ki bhanga. Mukonda diahi, eie ki ua-ndala ku zoua, kala kia zuela muéne?’ Naamane uévu o selevende iê, iu uai mu zoua sambuadi dia veji mu Ngiji ia Njolodá. Kioso kia zouo, muéne ua disanze!

Naamane ua sangulukile kiavulu. Muéne ua vutuka kua Ilizeu, iu ua mu ambela: ‘Kindala nga kijiia kuma o Nzambi ia Izalaiele muéne ngó o Nzambi ia kidi mu ixi ioso. Kienhiki, nga ku dióndo, tambula o ujitu iu phala eie.’ Maji Ilizeu ua tambuijila: ‘Kana, eme ki nga-nda ku u tambula.’ Ilizeu ua kijidile kuma, ku tambula o ujitu phala muéne kituxi, mukonda Jihova muene ua sakele Naamane. Maji o selevende ia Ilizeu, Jeazí, ua mesene o ujitu phala muéne.

Jeazí ua bhange kiki. Kioso Naamane kia tundu, Jeazí ua mu kaiela. Jeazí uambe, ‘Ilizeu ua ngi tumu phala ku kuambela kuma ua mesena o ujitu, mukonda kubhata kueza makamba ku mu menekena.’ Kiki kiexile makutu. Maji Naamane ka kijidile kuma makutu; kienhiki muéne ua bhana o imbamba kua Jeazí.

Kioso Jeazí kia vutuka kubhata, Ilizeu uejidile ioso ia bhangele muéne. Jihova ua mu tangela. Kienhiki muéne uambe: ‘Mukonda diahi ua bhange o kima kiki kiaiibha, o dibhute dia Naamane dia-nda ku vutukila.’ Kiki kiene ki kia bhiti!

Ihi i tua dilongo mu disá didi? Kia dianga, tua tokala tu kala kála o kilumba mu ku zuela maka alungu ni Jihova. Kiki kima kiambote. Kaiadi, ki tu kale tu akua luímbi kala kiexile Naamane, maji tua tokala ku belesela o jiselevende ja Nzambi. Katatu, ki tu tokala ku zuela makutu kala Jeazí. Ki tua dilongo kiavulu mu ku tanga o Bibidia?

2 Jisobha 5:1-27.



Ibhuidisu

  • Mu fikula, ihi ia mu zuela o kilumba kua ngana iê?
  • Nanhi o muhatu mu fikula, ni ihi ia mu bhanga o kilumba ku dibhata dia ngana iê?
  • Ihi ia tumina Ilizeu ku selevende iê ku zuela kua Naamane, ni mukonda diahi Naamane ua dizangalele?
  • Ihi ia bhitile kioso Naamane kiévu o jiselevende jê?
  • Mukonda diahi Ilizeu ua ditunine o ujitu ua Naamane, ni ihi ia bhangele Jeazí?
  • Ihi ia bhitile ni Jeazí, ni ihi i tu tena ku dilonga?

Ibhuidisu ia mukua

  • Tanga 2 Jisobha 5:1-27.

    Kiebhi o phangu ia kilumba kia Izalaiele i kolokotesa o mizangala ia lelu? (2 Jis. 5:3; Jisá. 8:2; 148:12, 13)

    Mukonda diahi tua tokala ku kaiela o phangu ia Naamane kioso ki tu tambula o mulongi ua Mikanda ikôla? (2 Jis. 5:15; Jih. 12:5, 6; Tii. 4:6)

    Disá diahi tu dilonga mu ku mona o phangu ia Ilizeu ki ia difuanganene ni ia Jeazí? (2 Jis. 5:9, 10, 14-16, 20; Mat. 10:8; Ikalakalu 5:1-5; 2 Kol. 2:17)