UEJIIA o maiala iâ, ni ihi ia mu bhanga? Ene a múia mu ita, o maiala ala ku pholo, a mu kuimba. Maji, eie nange u dibhula: ‘Mukonda diahi o akua kuimbila kala ni jixibhata, né jisosa, phala ku bhânga?’ Ndoko tu tale.

Akua Izalaiele a diongeka phala ku bhânga

Jozafate uexile sobha ia madiembu-aiadi a utuminu ua Izalaiele. Muéne ua tungile mu thembu ia Sobha Akabe, ni Jezabele ia utuminu ua 10-dia diembu dia thunda. Maji, Jozafate uexile sobha iambote, tat’ê Aza, uexile ué sobha iambote. Mu mivu iavulu, o mundu ua utuminu ua madiembu aiadi a luiji, akexile mu ithangana iambote.

Maji-phe, kua bhiti kima kia bhangesa o mundu ku kala ni uôma. Akunji eza mu tangela Jozafate: ‘Kifuxi kia dikota kia mbanza ia Mouabhe, Amone ni Mulundu ua Seíle, a mu kuíza phala ku bhânga ni eie.’ Mundu uavulu ua akua Izalaiele a diongeka mu Jeluzaleme phala ku bhinga kikuatekesu kua Jihova. Ene endele mu tembulu, bhenhobho Jozafate ua sambe: ‘Uá, Jihova Nzambi ietu, ki tuejiia se tua-nda bhanga kiebhi. O kifuxi kia masoladi kiki, kionene phala ku bhânga na-kiu. Tua ku bhingi kikuatekesu.’

Jihova ua muivu, iu ua tumu selevende iê ku tangela o mundu: ‘O ita ki ia mi tokala, maji ia Nzambi. Enu ki mua-nda bhânga. Mua-nda mona ngó kiebhi, Jihova kia-nda mi bhulula.’

Kienhiki, mu kimene kia kaiela-ku, Jozafate uambela o mundu: ‘Dielelenu kua Jihova!’ Muéne ua tumina akua kuimbila ku pholo ia masoladi kioso kia kexile mu kuenda, embile kiximanu kua Jihova. Eie uejiia ihi ia bhiti kioso kia bhixila bhua zukama phala ku bhânga? Jihova ua bhangesa kuila, o jinguma ja masoladi a bhânga mudiâ. Kioso Izalaiele kia bhixila, a sange o jinguma joso ja masoladi jafú!

Jozafate ka dimukine mu ku dielela kua Jihova? Tua-nda dimuka ué se tu dielela kua Muéne.

1 Jisobha 22:41-53; 2 Malunda 20:1-30.


Ibhuidisu

  • Nanhi uexile Jozafate, ni mu thembu iebhi muéne ia tungile?
  • Mukonda diahi akua Izalaiele akexile ni uôma, ni ihi ia bhangele avulu mudiâ?
  • Kiebhi Jihova kia tambuijila o musambu ua Jozafate?
  • Ihi ia bhangele Jihova ande dia ita?
  • Disá diahi di tu dilonga dia lungu ni Jozafate?

Ibhuidisu ia mukua

  • Tanga 2 Malunda 20:1-30.

    Kála kiedikisa Jozafate, ihi ia tokala ku bhanga o jiselevende ja fiiele ja Nzambi, kia kala ni maka a kuatesa o uôma? (2 Mal. 20:12; Jisá. 25:15; 62:1)

    Mu ukulu Jihova uakexile mu zuela ni mundu uê mu kaxaxi ka athu, mu kaxaxi ka nanhi muéne u zuela lelu? (2 Mal. 20:14, 15; Mat. 24:45-47; Nzuá 15:15)

    Kioso Nzambi kia-nda mateka o “ita ia kizuua kia dikota kia Nzambi Muteni-a-Ioso,” kiebhi o ukexilu uetu ua-nda kala kála ua Jozafate? (2 Mal. 20:15, 17; 32:8; Dij. 16:14, 16)

    Mu ku kaiela o ji Levita, kiebhi o aboki ia thembu ioso ni alongixi a kuatekesa mu kikalakalu kia ku bokela o mundu lelu? (2 Mal. 20:19; Lom. 10:13-15; 2 Tim. 4:2)