SAÚLU ua mesenene dingi ku kuata Davidi. Muéne uambatele 3.000 ja masoladi mê a nguzu ni endele ku mu sota. Kioso Davidi kiévu kuma eza ku mu sota, muéne ua tumikisa alondi, phala kuijiia se Saúlu ni masoladi mê a zekela kuebhi mu usuku. Kienhiki, Davidi uebhula kiiadi kia maiala mê: ‘Nanhi ua-ndaia n’me mu kilombo kia Saúlu?’

Davidi uixana o Sobha Saúlu

Abisale ua tambuijila, ‘Eme nga-ndaia.’ Abisale mon’a phange a Davidi, Zeluia. Kioso Saúlu ni masoladi mê, kia kexile mu zeka, Davidi ni Abisale a bokona ni ku zomba mu kilombo. Ene a katula o sosa ni mudingi ua Saúlu uakexile bhu mbandu iê. Ki bhua kexile muthu ua a mono, né kua evua, mukonda akexile mu kilu kionene.

Tala Davidi ni Abisale bhabha. Ene a lenge, ni ai ku thandu dia mulundu. Davidi ua dikola ku kabhitangu ka masoladi a Izalaiele: ‘Abinele, mukonda diahi, ku lange o ngana iê, o sobha? Tala! Kuebhi kuala o sosa ni mudingi uê ua menha?’

Saúlu ua balumuka. Muéne uevu o dízui dia Davidi, iu uebhula: ‘Eie muene, Davidi?’ Ua mu mona Saúlu ni Abinele kuná?

Davidi ua tambuijila Saúlu, ‘Xe, ngana iami o sobha.’ Davidi uebhula: ‘Mukonda diahi ua mesena ku ngi kuata? Ima iahi iaiibha Eme nga bhange? O sosa iê iala kuku, sobha. Tumikisa diiala néze mu i takana.’

Sobha Saúlu ni Abinele

Saúlu ua xikina, ‘Eme nga te kituxi.’ ‘Nga bhange ufusa.’ Kienhiki, Davidi uaié, Saúlu-phe ua vutuka kubhata. Maji Davidi ua xinganeka: ‘Saí kizuua Saúlu ua-nda ngi jibha. Kala ngi lenga ku ixi ia akua Fidíxia.’ Kiki kiene kia bhange. Davidi ua tenene ku nganala akua Fidíxia, ua bhangesa ku banza kuma uala ku mbandu iâ.

Mu ku bhita kithangana, akua Fidíxa ai mu bhânga ni akua Izalaiele. Mu ita, Saúlu ni Jonata a a jibha. Davidi ua luualele kiavulu, iu ua soneka o muimbu ua uabha: ‘Nga di kuata mukondo, phange iami Jonata. Nga ku zolele kiavulu!’

Ima ienii ki ia bhiti, Davidi ua vutuka mu mbanza ia Holebe mu Izalaiele. Kua kexile ita mu’axaxi ka maiala a solele o mon’a Saúlu, Ixi-bozete phala ku kala sobha, ni maiala a mukuá a mesene Davidi kála sobha. Mu disukilu o maiala a Davidi a nganhala. Davidi uakexile ni 30 a mivu kioso kia kituka sobha. Muéne ua tumina ku Hebolone mu sambuadi dia mivu ni kaxaxi. Ana a a vualele, a exanene Aminone, Abisalone, ni Adoniia.

Kua bhixila o thembu ia Davidi ni maiala mê kuia mu tambula o mbanza ia uabha a ixana Jeluzaleme. Jouabe mona a mukuá ua phange ia Davidi, Zeluia, uendesa o ita. Kienhiki, Davidi ua sakidila Jouabe mu ku mu bhanga kabhitangu ka masoladi mê. Mu kienhiki, Davidi ua mateka ku tumina mu mbanza ia Jeluzaleme.

1 Samuuele 26:1-25; 27:1-7; 31:1-6; 2 Samuuele 1:26; 3:1-21; 5:1-10; 1 Malunda 11:1-9.



Ibhuidisu

  • Ihi ia bhangele Davidi ni Abisai kioso Saúlu kia kexile mu zeka mu kilombo kiê?
  • Ihi iebhula Davidi kua Saúlu?
  • Kioso kia xisa Saúlu, kuebhi kuendele Davidi?
  • Ihi ia luualesa kiavulu Davidi, ia mu bhangesa ku soneka o muimbu ua uabha?
  • Mivu ikuxi ia kexile na-iu Davidi kioso kia mu bhange sobha mu Hebolone? Kiebhi kiexanene o majina a an’ê?
  • Kuebhi Davidi kua tumine ué kála sobha?

Ibhuidisu ia mukua

  • Tanga 1 Samuuele 26:1-25.

    O izuelelu ia Davidi io soneke mu divulu dia 1 Samuuele 26:11, idikisa o ukexilu uahi ua lungu ni ku iuka kua kilunga kia jikidistá? (Jisá. 37:7; Lom. 13:2)

    Kioso ki tu suína mu ku bhanga o mbote, maji tu sanga o ku kamba o kisakidilu, kiebhi o izuelu ia Davidi mu divulu dia 1 Samuuele 26:23 i tu kuatekesa ku kolokota o ku bhanga o mbote? (1 Jis. 8:32; Jisá. 18:20)

  • Tanga 2 Samuuele 1:26.

    Kiebhi o Jikidistá ja lelu a tena ‘“ku di zola mudiâ”’ kala kia kexile Davidi ni Jonata? (1 Phe. 4:8; Kol. 3:14; 1 Nzuá 4:12)

  • Tanga 2 Samuuele 5:1-10.

    Mivu ikuxi Davidi ia tumina kála sobha, ni kiebhi kia uane o mivu íii? (2 Sam. 5:4, 5)

    Nanhi ua tokalele ku mu bhana o kijingu kia ku tena kua Davidi, ni kiebhi kiki ki sidivila phala ku tu lembalala lelu? (2 Sam. 5:10; 1 Sam. 16:13; 1 Kol. 1:31; Fil. 4:13)