Davidi ua bhulula o kambudi

UA mu mona ihi ia bhiti? O muzangala ua bhulula o kambudi ku úlusu. O úlusu ia kuatele o kambudi phala ku kadia. Maji o muzangala ua lengela ku dima diê, iu ua bhulula o kambudi ku dikanu dia úlusu. Kioso o úlusu ki ia bhetuka, o muzangala ua kuata o úlusu iu ua i jibha! Mu kithangana kia mukuá, muéne ua bhulula o mbudi ku dikanu dia hoji. Muén’iu ki muzangala ua suína? Uejiia se nanhi?

O muzangala iú, Davidi. Muéne ua tungile mu mbanza ia Beleme. O kuku’ê, Obede, mon’a Lute ni Bouaji. Ua a lembalala? Tata ia Davidi, Jese. Davidi uakexile mu kuinga o jimbudi ja tat’ê. Kioso Jihova kia solo Saúlu kála sobha, kua bhiti 10 dia mivu, Davidi a mu vuala.

Saí kizuua Jihova uambela Samuuele: ‘Katula maji a iuka ndé katé ku dibhata dia Jese mu Beleme. Nga sola-bho mona na kale sobha.’ Kioso Samuuele kia mono o mona ua dikota ua Jese, Eliabe, muéne uambe mudiê: ‘Iú muéne a mu solo kuala Jihova.’ Maji Jihova ua mu ambela: ‘Kana ku tala o ku iuka ni ku lebha kuê . Eme ki nga mu sol’ami phala ku kala sobha.’

Kienhiki, Jese uexana mon’ê Abinadabe, iú ua mu bheka kua Samuuele. Maji Samuuele uixi, ‘Kana, Jihova ka mu solo’é.’ Anga, Jese ua mu bhekela mon’ê, Samani. Samuuele uixi, ‘Kana, Jihova ka mu solo’é.’ Jese ua bheka sambuadi dia an’ê kua Samuuele, maji Jihova ka solo-bho né ngó umoxi. Samuuele uebhula. ‘Ene, ngó iâ, o mizangala?’

Jese ua tambuija, ‘Saí hanji o kasule.’ ‘Maji muéne uala bhu kanga mu kuinga o jimbudi.’ Kioso kia bheka Davidi, Samuuele ua mono kuila, muéne muzangala ua iuka. ‘Jihova ua mu ambela, ‘Iú muéne nga mu solo.’ ‘Mu unde.’ Kienhiki, kiene kia bhangele Samuuele. Mu kusukáko, Davidi ua kituka sobha ia Izalaiele.

1 Samuuele 17:34, 35; 16:1-13.



Ibhuidisu

  • Diebhi o dijina dia muzangala mu fikula, ni kiebhi tuejiia kuma muéne ua suínine?
  • Kuebhi kua tungile Davidi, ni kiebhi kiexanene tat’ê ni kuku’ê?
  • Mukonda diahi Jihova uambela Samuuele phala kuia ku dibhata dia Jese mu Beleme?
  • Ihi ia bhitile kioso Jese kia bhekele o sambuadi dia an’ê kua Samuuele?
  • Kioso kia bhekele Davidi ihi ia zuela Jihova kua Samuuele?

Ibhuidisu ia mukua

  • Tanga 1 Samuuele 17:34, 35.

    Kiebhi o musoso iu, u bandekesa o ku suína kua Davidi ni ku dielela kuê kua Jihova? (1 Sam. 17:37)

  • Tanga 1 Samuuele 16:1-14.

    Kiebhi o izuelelu ia Jihova mu divulu dia 1 Samuel 16:7 di tu kuatekesa ku xisa o katômbo? (Ikalakalu 10:34, 35; 1 Tim. 2:4)

    Kiebhi o phangu ia Saúlu idikisa kuma kioso Jihova kia katula o nzumbi iê ikôla ku muthu, o muthu u kala ni nzumbi iaiibha mba u bhanga ima iaiibha? (1 Sam. 16:14; Mat. 12:43-45; Nga. 5:16)