TALA athu a mu sebhulula o diiala didi. Eie uejiia se muéne nanhi? Dijina diê Jelemiia. Muéne polofeta ia Nzambi.

Athu a mu kuelela Jelemiia

Kioso o Sobha Joziia kia mateka ku bula o iteka mu ixi, Jihova uambela Jelemiia phala ku kala polofeta Iê. Maji, Jelemiia ua banzele kuma muzangala hanji phala ku kala polofeta. Maji Jihova ua mu ambela kuma Muéne ua-nda mu kuatekesa.

Jelemiia uambela akua Izalaiele phala kueha o ku bhanga o ima iaiibha. Muéne uambe, ‘O jinzambi ja kexile mu bheza athu, ja makutu.’ Maji saí a kamúkua, akua Izalaiele a mesenene kubheza jinzambi ja makutu, Jihova o Nzambi ia kidi, kana. Kioso Jelemiia kiambe ku mundu kuma, Nzambi ua-nda ku a kaxtikala mukonda dia kuiibha kuâ, ene a mu elela.

Kua bhita mivu. Joziia uafú, mu ku bhita mbeji jitatu o mon’ê Njouakí a mu bhange sobha. Jelemiia ua kolokota mu zuelela o mundu: ‘Jeluzaleme a-nda i buika se ki muehenu o ima iaiibha.’ O akunji a kuata Jelemiia ni a dikola: ‘Iu ua tokala kufuá, mukonda dia ku zuela o ima íii.’ Kienhiki, a zuela ku jinganga ja Izalaiele: ‘Jelemiia ua tokala kufuá mukonda ua zuela kiaiibha ku mbanza ietu.’

Ihi ia tokalele ku bhanga Jelemiia? Muéne ka kexile ni uôma! Uambela athu oso: ‘Jihova ua ngi tumina ku mi tangela o ima íii. Se ki muehenu ku bhanga ima iaiibha, Jihova ua-nda buika Jeluzaleme. Maji xalenu mu kijiia, kuila se mu ngi jibha, mua-nda jibha diiala ki dia te kituxi.’

O atumini eha Jelemiia ku kala ni muenhu, maji akua Izalaiele ka xisa ku bhanga ima iaiibha. Kienhiki, Nabukodonozolo o sobha ia Babilonha uéza mu bhânga ni akua Jeluzaleme. Mu kusukáko, Nabukodonozolo ua bhange akua Izalaiele abhika. Muéne uambata athu avulu mu Babilonha. Banza ngó, se athu ki ua ejiia a ku katula ku bhata diê, ni a kuambata ku ixi iéngi!

Jelemiia 1:1-8; 10:1-5; 26:1-16; 2 Jisobha 24:1-17.



Ibhuidisu

  • Nanhi o muzangala mu fikula?
  • Ihi ia banzele Jelemiia kioso kiévu kuma ua-nda kala polofeta, ni ihi ia mu tangela Jihova?
  • Njimbu iahi ia kolokota Jelemiia ku zuelela o mundu?
  • Kiebhi o akunji a jingeleja a fikisa ku fidisa Jelemiia, maji kiebhi muéne kiedikisa kuma ka kexile ni uôma?
  • Ihi ia bhitile ni akua Izalaiele kioso kia ditunine o ku xisa o ukexilu uâ, uaiibha?

Ibhuidisu ia mukua

  • Tanga Jelemiia 1:1-8.

    Kála kiedikisa o phangu ia Jelemiia, ihi i bhangesa o muthu ku kala hete phala o sidivisu ia Jihova? (2 Kol. 3:5, 6)

    Kikolokotesu kiahi ki bhana o phangu ia Jelemiia ku mizangala ia Jikidistá lelu? (Ndo. 12:1; 1 Tim. 4:12)

  • Tanga Jelemiia 10:1-5.

    Kifika kiahi kia nguzu kia bhangele Jelemiia phala kuidikisa kuma, ku dielela ku iteka kutobha? (Jel. 10:5; Iza. 46:7; Hab. 2:19)

  • Tanga Jelemiia 26:1-16.

    Kioso ki xika o njimbu ia ku dimuna lelu, kiebhi o ió a a undu a kolokota mu belesela ni muxima, o kitumu kia Jihova kia bhele kua Jelemiia ‘sé ku katula-mu kizuelu’? (Jel. 26:2; Mate. 4:2; Ikalakalu 20:27)

    Phangu iahi iambote ia xisa Jelemiia ku Jimbangi ja Jihova lelu mu ku tula o ngolokela ia Jihova ku ifuxi? (Jel. 26:8, 12, 14, 15; 2 Tim. 4:1-5)

  • Tanga 2 Jisobha 24:1-17.

    Ima iahi iaiibha ia bhitile ni Jijudé mukonda dia ku kamba o kixikinu kua Jihova? (2 Jis. 24:2-4, 14)