Ku bokona mu madisá

Ku bokona mu madisá

Musoso 63: O Njimu Sobha Solomá

Musoso 63: O Njimu Sobha Solomá

SOLOMÁ uexile hanji muzangala kioso kia kituka sobha. Muéne ua zolele Jihova iu ua kaiela o mulongi ua mu bhanene tat’ê Davidi. Jihova ua sangulukile ni Solomá, kienhiki saí usuku, muéne ua mu ibhula mu nzoji: ‘Solomá, ihi ua-ndala i ngi ku bhana?’

Kienhiki, Solomá ua tambuijila: ‘Jihova, Nzambi iami, eme ngi mon’a-ndenge hanji, ki ngejiia-mi ku tumina. Ngi bhane unjimu phala ngi tumine o mundu uê mu njila iambote.’

Jihova ua sangulukile ni ioso ia bhingile Solomá. Kienhiki, muéne uambe: ‘Mukonda ua ngi bhingi unjimu, ki ua ngi bhing’ami izuua iavulu ku muenhu, né uenji, Eme nga-nda ku bhana unjimu uonene, kuma né ngó muthu umoxi uala nau. Maji nga-nda ku bhana ué ima ku ngi bhingi-iu, jimbongo ni kiximanu.’

Mu kithangana, ahatu kiiadi eza kua Solomá ni maka. Mukuá ua zuela, ‘O muhatu iú, n’eme tua tungila dibhata dimoxi.’ ‘Eme nga vuala mona, mu ku bhita izuua iiadi, muéne ua vuala ué mona. Mu usuku o mon’ê uafú. Maji kioso nga kexile mu zeka, muéne ua tula o mon’ê o kimbi bhu mbandu iami, iu ua katula o mon’ami. Kioso nga balumuka, nga mono o mona uafú, nga mu tekula muene kiambote, ki muéne o mon’ami.’

Kienhiki o muhatu ua mukuá uxi: ‘Kana! O mona uala ku muenhu, mon’ami, o uáfu, uê muene!’ O muhatu ua dianga ua tambuijila: ‘Kana! O uáfu, mon’ê o uala ku muenhu o uami!’ Kiki kiene kia kexile mu dikuata ahatu. Ihi ia tokalele ku bhanga Solomá?

Muéne ua tumina ku bheka o xibhata, kioso kia i bheka muéne uixi: ‘Uana o mona uala ni muenhu mu mbandu jiiadi, kala muhatu u mu bhana mbandu iê.’

‘Kana! o mama ia kidi ua dikola. ‘Nga mi dióndo, kana ku jibha o mona. Mu u bhane kua muéne!’ Maji o muhatu ua mukuá uixi: ‘Kana ku tu bhane nê; mu uane mu mbandu jiiadi.’

Sobha Solomá u batula maka a bhonzo

Mu kusukáko, Solomá uambe: ‘Kana ku jibha o mona! Mu bhane ku muhatu ua dianga. Muéne o mama ia kidi.’ Solomá ua bhange kiki, mukonda uejidile kuma o mama ia kidi ua zolele kiavulu o mon’ê, iu ua solo ku mu bhana ku muhatu uéngi, phala ka mu jibhe. Kioso o mundu kiévu kia batula Solomá o maka, ene a sangulukile mu ku kala ni sobha íii ia dimuka.

Mu utuminu ua Solomá, Nzambi ua zediuisile o mundu, mu ku bhanga o ixi ku sabhuka tiliku iavulu, ni sevada, ni jiuva, ni jifiku, ni makúdia akamúkua. O mundu uakexile mu zuata kiambote, ni akexile ni jinzo jauabha. Mua kexile ima ia soko, ni iambote phala o mund’uoso.

1 Jisobha 3:3-28; 4:29-34.



Ibhuidisu

  • Ihi iebhula Jihova kua Salomá, ni kiebhi muéne kia tambuijila?
  • Mukonda muéne ua sangulukile ni ia bhingile Salomá, ihi ia kanena Jihova ku mu bhana?
  • Maka ahi a bhonzele ambatele ahatu kiiadi kua Solomá?
  • Kála ki ua mu mona mu fikula, kiebhi kia batula Solomá o maka?
  • O utuminu ua Solomá, ua difuangana ni ua nanhi, ni mukonda diahi?

Ibhuidisu ia mukua

  • Tanga 1 Jisobha 3:3-28.

    Ihi ia dilonga o maiala a tambula o ikalakalu mu kilunga kia Nzambi lelu, ia lungu ni izuelu ia kidi kia Solomá kio soneke mu divulu dia 1 Jisobha 3:7? (Jisá. 119:105; Jisa. 3:5, 6)

    Mukonda diahi o ia bhingi Solomá i tu bhana phangu iambote ia lungu ni ima ia soko i tua tokala ku bhinga mu misambu? (1 Jis. 3:9, 11; Jisa. 30:8, 9; 1 Nzua 5:14)

    O ukexilu ua Solomá, ua ku batula o maka mu kaxaxi ka ahatu aiadi, i tu bhana kidielelu kiahi kia lungu ni sobha ia-nda kuíza-ku, o Solomá ia Dikota Jezú Kristu? (1 Jis. 3:28; Iza. 9:6, 7; 11:2-4)

  • Tanga 1 Jisobha 4:29-34.

    Kiebhi kia tambuijila Jihova o musambu ua Solomá, kia bhingi o muxima ua belesela? (1 Jis. 4:29)

    Mu ku mona o nguzu ia kexile mu bhanga athu phala kuívua o unjimu ua Solomá, ukexilu uahi u tua tokala ku kala nau ua lungu ni ilongesu ia Maka a Nzambi? (1 Jis. 4:29, 34; Nzuá 17:3; 2 Tim. 3:16)