Ku bokona mu madisá

Ku bokona mu madisá

Musoso 60: Abingaíle Ni Davidi

Musoso 60: Abingaíle Ni Davidi

OMUHATU ua mu kuíza mu disanga ni Davidi ua muijiia? Dijina diê, Abingaíle. Muéne uakexile ni kífua kiambote, ua fidisa Davidi ku bhanga kima kiaiibha. Ande dia ku dilonga maka alungu ni muéne, ndoko tu tale ihi ia bhiti ni Davidi.

Kioso Davidi kia lenge Saúlu, muéne ua disuekele mu dibanda. O jiphange ni muiji uê, a diongeka kua muéne. En’oso a tenesa 400 ja maiala eza kua muéne, kienhiki Davidi uakexile o mutuameni uâ. Davidi uendele kua sobha ia Mouabhe iu uambe: ‘Nga ku dióndo ehela tat’jami ku kala ni eie, katé ki ngi tale se ihi ia-nda bhita ni eme.’ Kienhiki, Davidi ni maiala mê a disuekele mu milundu.

Kienhiki, kiene Davidi kia dijiia ni Abingaíle. O muadi uê Nabale uexile kitanji. Muéne uakexile ni 3.000 ja jimbudi ni 1.000 ja jihombo. Nabale uexile muthu uaiibha. Maji o muhatu’ê, Abingaíle uakexile muthu uambote. Muéne uejidile ué ku bhanga o mbote. Kizuua kimoxi, muéne ua bhulula o muiji uê. Ndoko tu tale kiebhi.

Davidi ni maiala mê a bhangele o mbote kua Nabale. Ene a mu kuatekesa mu kuinga o jimbudi jê. Saí kizuua Davidi ua tumu o maiala mê, ku bhinga ki kuatekesu kua Nabale. O maiala a Davidi a bhixile kua Nabale, kioso muéne ni akuatekexi’ê, akexile mu bhuta o jimbudi jê. Kiexile kizuua kia fesa, Nabale uakexile ni ima iavulu phala kudia. O maiala a Davidi ambe: ‘Etu tua ku bhange o mbote. Ki tua nhan’etu né ngó mbudi imoxi, maji tua ku kuatekesa mu kuinga o jimbudi. Tua ku dióndo, tu bhane kúdia.’

Nabale uixi, ‘Eme ki nga-nda bhana kúdia kuami ku maiala kala enu.’ Muéne ua zuelele ima iaiibha, iu ua zuela ué kiaiibha kua Davidi. Kioso o maiala kia vutuka ni a tangela Davidi, Davidi ua dizangalele kiavulu. Muéne ua tumina o maiala, ‘Kuatenu mu jixibhata jenu!’ Inga muéne uia ni maiala mê mu jibha Nabale.

Saí diiala dia Nabale, kievu o maka aiibha a zuela Nabale, ua tangela Abingaíle ioso ia bhiti. Kienhiki, Abingaíle ua lenguluka, ua katula makúdia. Muéne ua a kutila ku bulu, iu ua mateka o njila. Kioso kia takajana ni Davidi, ua tuluka ku bulu, ua fukama iu uambe: ‘Nga ku dióndo, ngana, kana kuívua muadi uami Nabale. Muéne kióua, u bhanga ngó ima ia uóua. Nga ku bhekela ujitu. Nga ku dióndo tambula-u, tu loloke ku ima ia bhiti.’

Abingaíle u bhekela ujitu kua Davidi

Davidi ua tambuijila, ‘Eie u muhatu ua dimuka.’ ‘Ua ngi fidisa ku jibha Nabale mu ku mu futila o kituxi kiê. Vutuka kubhata ni paze.’ Kioso Nabale kiáfu, Abingaíle ua kituka muhatu ua Davidi.

1 Samuuele 22:1-4; 25:1-43.



Ibhuidisu

  • Kiebhi kiexanene o muhatu uala mu fikula, ua múia mu disanga ni Davidi, muéne muthu uahi?
  • Nanhi uexile Nabale?
  • Mukonda diahi Davidi ua tumikisa o maiala mê ku bhinga favolo kua Nabale?
  • Ihi iambe Nabale ku maiala a Davidi, ni kiebhi kia tambuijila Davidi?
  • Kiebhi Abingaíle kiedikisa kuma muhatu ua unjimu?

Ibhuidisu ia mukua

  • Tanga 1 Samuuele 22:1-4.

    Kiebhi o muiji ua Davidi phangu iambote i tua tokala ku kaiela mu ku di kuatekesa mu ilunga ietu ia Jikidistá? (Jisa. 17:17; 1 Tes. 5:14)

  • Tanga 1 Samuuele 25:1-43.

    Mukonda diahi Nabale a mu tange kála muthu uaiibha? (1 Sam. 25:2-5, 10, 14, 21, 25)

    Kiebhi ahatu a Jikidistá lelu a tokala ku dilonga o phangu ia Abingaíle? (1 Sam. 25:32, 33; Jisa. 31:26; Efe. 5:24)

    Abingaíle ua fidisa Davidi ku bhanga ima iiadi iahi iaiibha? (1 Sam. 25:31, 33; Lom. 12:19; Efe. 4:26)

    Kiebhi o kuívua Davidi o dízui dia Abingaíle ki kuatekesa o maiala ku talatala ahatu kála ki bhanga Jihova? (Ikalakalu 21:8, 9; Lom. 2:11; 1 Phe. 3:7)