TALA o ngoji ia felu kua Phaulu, tala o disoladi dia Loma dia mu mu langa. Phaulu uala pelezu mu Loma. Muéne ua mu kinga Sézalu, se ihi ia-nda mu bhanga. Mu kaleia, athu ejile ku mu kunda.

Mu ku bhita izuua itatu kioso kia bhixila mu Loma, Phaulu ua tumina ku ixana atuameni a Jijudé phala ku zuela nâ. Kienhiki, Jijudé javulu ejile ku mu kunda. Phaulu ua bokela o njimbu ia lungu ni Jezú, ni utuminu ua Nzambi. A kamúkua a xikina ni a kituka Jikidistá, maji a kamúkua kana.

Phaulu mu kaleia

Phaulu ua bokela ué o masoladi akexile ku mu langa. Uakexile mu kaleia mivu iiadi, Phaulu ua boko ué ku athu oso a tenene. Mu kusukáko, katé o muiji ua Sézalu uévu ué o maka alungu ni njimbu iambote ia Utuminu, saí a mukuá a kituka Jikidistá.

Maji o mujitu iú, ua mu soneka bhu meza nanhi? Ua mu lembalala? Xe, muéne Timote. Timote uakexile ué mu kaleia, mukonda dia kuboka o njimbu ia Utuminu, maji muéne a mu katula kiá mu kaleia. Muéne uéza mu kuatekesa Phaulu. Eie uejiia se Timote ua mu soneka ihi? Ndoko tu tale.

Eie ua lembalala o jimbanza ja Filipe ni Efezo mu Musoso ua 110? Phaulu ua a kuatekesele ku mateka o ilunga ia Jikidistá mu jimbanza jâ. Kioso kia kexile hanji mu kaleia Phaulu ua sonekene mikanda phala o Jikidistá jiji. O mikanda iala mu Bibidia, a ixana Efezo ni Filipe. Phaulu ua tangela Timote, ihi ia tokala ku soneka phala o makamba-mê a Jikidistá ku Filipe.

Akua Filipe a bhangele mbote kua Phaulu. A mu tumikisa ujitu mu kaleia, kienhiki Phaulu ua a sakidila. Epafrodito muéne o diiala dia bhekele ujitu. Maji muéne ua katele kiavulu uexile kuaji phala kufuá. Maji mu kusukáko, muéne uakexile kiá kiambote phala ku vutuka kubhata. Muéne ueji kuambata o mukanda ua Phaulu ni Timote kioso kieji vutuka mu Filipe.

Kioso kia kexile mu kaleia Phaulu ua soneka dingi mikanda iiadi iala mu Bibidia. Umoxi phala o Jikidistá ja mbanza ia Kolose. Uejiia kiebhi kia ixana? Kolose. O mukanda ua mukuá phala dikamba diê, a mu ixana Filemone, ua tungile mu Kolose. Mu mukanda mua kexile o maka alungu ni selevende ia Filemone, Onézimo.

Onézimo ua lengele Filemone, iu uendele mu Loma. Kienhiki, Onézimo uévu kuila Phaulu uala mu kaleia. Muéne uai ku mu kunda, inga Phaulu u bokela njimbu kua Onézimo. Kienhiki, Onézimo ua kituka Kidistá. Kiki Onézimo ua diela mu ku lenga. Eie uejiia ihi ia soneka Phaulu mu mukanda ua tumikisa kua Filemone?

Phaulu ua bhingi kua Filemone phala ku loloka Onézimo. Phaulu ua soneka, ‘Nga-nda mu vutukisa kokué.’ ‘Maji muéne ki selevende iê ngó. Muéne Kidistá kiambote, phangi’ê.’ Kioso Onézimo kia vutuka mu Kolose muéne uambatele mikanda iiadi, umoxi phala akua Kolose ni ua mukuá phala Filemone. Tu tena ku xinganeneka kiebhi Filemone kia sangulukile kiévu kuma, o selevende iê ua kituka Kidistá.

Kioso Phaulu kia sonekena ku akua Filipe ni Filimone, muéne ua a tangela njimbu iambote. Phaulu uambela akua Filipe ‘Ngi mi tumikisa Timote.’ ‘Maji eme uami nga-nda mi kunda.’ Muéne ua sonekena ué Filimone: ‘Ngi iudikile kididi phala ngi kale-mu.’

Kioso Phaulu kia tundu mu kaleia, muéne uai mu kunda o jiphange jê ja Jikidistá ja mala ni ja ahatu mu ididi ioso. Maji Phaulu a mu takula dingi mu kaleia, mu Loma. Mu veji íii muéne ua kijidile kuma a-nda mu jibha. Kienhiki, muéne ua sonekena Timote, iu ua mu bhingi phala kuíza ni lusolo. Phaulu ua soneka, ‘Eme ngala ni kixikinu kua Nzambi,’ ‘kuma Nzambi ua-nda ngi futa.’ Kioso kia jibha Phaulu, kua bhitile ngó mivu iofele, Jeluzaleme a i buika dingi mu veji íii ku akua Loma.

Maji mu Bibidia muala dingi maka. Jihova Nzambi ua tumina poxolo Nzuá, ku soneka o madivulu a sukina ni dia Dijingunuinu. O divulu didi, dia Bibidia di zuela maka a-nda kuíza ku pholo. Ndoko tu tale se ihi ia-nda kuíza ku pholo.

Ikalakalu 28:16-31; Filipe 1:13; 2:19-30; 4:18-23; Jihebeleu 13:23; Filimone 1-25; Kolose 4:7-9; 2 Timote 4:7-9.



Ibhuidisu

  • Phaulu ua bokela nanhi kioso kia kexile mu kaleia mu Loma?
  • Mu fikula, nanhi o mujitu ua xikama bhu meza, ni ihi muéne ia mu bhangela Phaulu?
  • Nanhi uexile Epafrodito, ni ihi iambatele muéne kioso kia vutukile mu Filipe?
  • Mukonda diahi Phaulu ua soneka mukanda phala kamba diê, Filimone?
  • Ihi ia bhange Phaulu kioso kia tubhuka mu kaleia, ni ihi ia bhitile nê ku pholo?
  • Nanhi a mu tumina kuala Jihova ku soneka o madivulu a sukina a Bibidia, ni ihi i zuela o divulu dia Dijingunuinu?

Ibhuidisu ia mukua

  • Tanga Ikalakalu 28:16-31 ni Filipe 1:13.

    Ihi ia bhangele Phaulu kioso kiexile mu kaleia mu Loma, ni kiebhi kiki kia kuatekesa o kixikinu kia Jikidistá mu kilunga? (Ikalakalu 28:23, 30; Fil. 1:14)

  • Tanga Filipe 2:19-30.

    Kizuelelu kiahi kiauabha kia Phaulu kiedikisa o henda iê kua Timote ni Epafrodito, ni kiebhi tua tokala ku kaiela o phangu ia Phaulu? (Fil. 2:20, 22, 25, 29, 30; 1 Kol. 16:18; 1 Tes. 5:12, 13)

  • Tanga Filemone 1-25.

    Ihi ia kuatekesa Phaulu phala ku suínisa Filimone ku bhanga ima iambote, ni kiebhi kiki ki sidivila kala ilongesu phala adiakimi lelu? (Fil. 9; 2 Kol. 8:8; Nga. 5:13)

    Kiebhi o kizuelu kia Phaulu ki tua sange mu divulu dia Filimone 13, 14, kidikisa kuma muéne uakexile mu xila o kitongoluelu kia akuâ mu kilunga? (1 Kol. 8:7, 13; 10:31-33)

  • Tanga 2 Timote 4:7-9.

    Kála poxolo Phaulu, kiebhi tu tena ku kala ni kidielelu, kuma Jihova ua-nda tu futa se tu kolokota mu kixikinu katé ku dizubhilu? (Mat. 24:13; Jih. 6:10)