Ku bokona mu madisá

Ku bokona mu madisá

Musoso 112: Kuboba mu Kizanga

Musoso 112: Kuboba mu Kizanga

TALA! o naviio iala mu ibhidi! Ia mu bukujuka! Ua mu mona athu a tuka mu menha? A kamúkua a bhixila kiá mu palaia. O kuila Phaulu uala bhabha? Tu tale ihi ia mu bhita ni muéne.

Athu a bhuluka mu kizanga

Lembalala kuma, Phaulu ua bhitile mivu iiadi mu kaleia, mu Sezaleia. Kuenhoko, muéne ni jipelêzu ja kamúkua a a tele mu naviio ia a tumikisine mu Loma. Kioso kia kexile mu bhita mu kizanga kia Keleta kua moneka kitembu. O kitembu kia suínine kiavulu, katé ué o endexi katenene ku endesa o naviio. Ka tenene ku mona o muanha, né o jithéthembua mu usuku. Mu kusukáko, kua bhitile izuua iavulu, ene ka tenene ku xikina kuma a-nda bhuluka.

Kienhiki Phaulu uambe: ‘Ki bhua-nda kala muthu ua-nda fuá; o naviio ngó ia-nda jimbila. Saí usuku kua ngi monekene o anju ia Nzambi ia ngi tangela kiki, “Ku kale ni uôma, Phaulu! Mukonda eie ua tokala kuimana bhu pholo ia Sézalu o nguvulu ia Loma. Talesa-phe Nzambi mu mbote iê ua ku bhana kiá oso u uala kuendela nâ, kumoxi mu naviio.”’

Mu kaxaxi ka usuku mu 14 a izuua kioso kia mateka o kitembu, o a endexi a mono kuma o menha a mu sosoloka! Ene kandalele ku di bunda ku matadi mu usuku mukonda dia kitembu, kienhiki a takula o jingunji. Mu kimene a mono kizanga. Ene a fikisa kuambata o naviio ku palaia.

Kioso ene kia zukama ku mavu, o naviio ia di bundu ku mulundu ua museke ni ia naminina. O mafuta a mateka ku bula o naviio. O kabhitangu uambe: ‘Uoso uejiia ku zóua a zóue katé ku palaia. A kamúkua a tuka ué ni a kuate ku mabaia a naviio ni a zóue.’ Kiki kiene kia bhangele. Kienhiki, 276 a athu akexile mu naviio a bhuluka kála kia kanena o anju.

O kizanga a ki xana Melita. Athu bhenhobho, exile athu ambote, ene a tambula konda ia athu oso akexile mu bhobha ni naviio. Kioso kia bhiti o ibhidi Phaulu a mu ambata mu naviio iéngi, katé ku Loma.

Ikalakalu 27:1-44; 28:1-14.



Ibhuidisu

  • Ihi ia bhitile ni naviio mua kexile Phaulu, kioso kia kexile mu bhita mu kizanga kia Keleta?
  • Ihi ia zuela Phaulu kua ió akexile nê mu naviio?
  • Mukonda diahi o naviio ia kexile mu bukujuka?
  • Ihi ia tumina ku bhanga o kabhitangu ka masoladi, ni athu akuxi a bhulukile?
  • Kiebhi kiexanene o kizanga kua kexile, ni ihi ia bhitile ni Phaulu kioso o kitembu ki kia tululuka?

Ibhuidisu ia mukua

  • Tanga Ikalakalu 27:1-44.

    Kiebhi o kidielelu kietu ki kolokota mu kidi kia Bibidia kioso ki tu tanga o musoso ua lungu ni njila ia Phaulu mu Loma? (Ikalakalu 27:16-19, 27-32; Luka 1:3; 2 Tim. 3:16, 17)

  • Tanga Ikalakalu 28:1-14.

    Se akua ixi ia Melita, a tenene ku bhanga o mbote kua poxolo Phaulu ni ió akexile nê, ni ‘henda ioso,’ o Jikidistá lelu a tokala ué kuidikisa ihi, ni kiebhi? (Ikalakalu 28:1, 2; Jih. 13:1, 2; 1 Phe. 4:9)