ATHU ala bhabha akaiedi a Jezú. Ene a belesela, ia kingila mu Jeluzaleme. Kioso kia kexile mu kinga, evu jibuia javulu m’onzo ioso. Kála mbimbi ia kitembu kionene. Kienhiki, madimi a túbhia a moneka ku thandu a mitué ia maxibulu. Utena ku mona o túbhia ku mitué iâ? Ihi i lombolola ioso íii?

Nzumbi ikola ku maxibulu ku hama ia dianga

Madiuanu! Jezú ua vutukile ku diulu kua Tat’ê, kienhiki muéne uakexile mu tumikisa o nzumbi ikôla ia Nzambi ku akaiedi’ê. Uejiia se o nzumbi íii ia a bhangesa o ku bhanga ihi? En’oso a mateka ku zuela mazui mengi.

Athu avulu mu Jeluzaleme evu o jibuia jexile kála kitembu, ene ejile mu tala se ihi ia kexile mu bhita. Saí athu akua jixi jengi, ene ejile ku fesa ia Pendekoxi, ia akua Izalaiele. O ajitu enhá a sasumukine! Ene evu o maxibulu ku zuela mu mazui mâ, maka alungu ni ima ia mu bhanga Nzambi.

O ajitu ambe, ‘Athu iâ, akua Ngalileia.’ ‘Kiebhi, ene a mu zuela mu dízui dietu?’

Kienhiki, Phetele uemana phala ku a tangela. Muéne ua zuela ni dízui dia suína, ua tangela athu kiebhi kiafú Jezú, ni kioso Jihova kia mu fukununa mu kaxaxi ka ió afú. Phetele uambe, ‘Kindala Jezú uala bhu lukuaku lua kadilu lua Nzambi.’ ‘Muéne ua tumikisa o nzumbi ikôla ia kanene. Mukonda dia kiki, mua mu mona ni kuívua o madiuanu enhá.’

Kioso Phetele kiambe o ima íii athu avulu a luualele mukonda dia ima ioso iaiibha ia bhangele kua Jezú. Ene ebhula, ‘Ihi i tua tokala ku bhanga?’ Phetele ua ambela: ‘Kala mu eha o ima ioso iaiibha, ni a mi batizale.’ Mu kizuua kieniókio, 3.000 ja athu a a batizala, ia kituka akaiedi a Jezú.

Ikalakalu 2:1-47.



Ibhuidisu

  • Kála kidikisa o fikula, ihi ia bhitile ni akaiedi a Jezú akexile mu kingila mu Jeluzaleme?
  • Mukonda diahi ajitu mu Jeluzaleme a diuanene?
  • Ihi ia jimbulula Phetele ku athu?
  • Kiebhi kia divuile athu kioso kiévu Phetele, ni ihi ia ambela muéne ia tokalele ku bhanga?
  • Athu akuxi a a batizala mu kizuua kia Pendekoxi ia 33 mu K.K. (Kithangana kia Kristu)?

Ibhuidisu ia mukua

  • Tanga Ikalakalu 2:1-47.

    Kiebhi o izuelu ia Phetele mu divulu dia Ikalakalu 2:23, 36, idikisa kuma o diembu dioso dia akua Judé akexile ni kikuma mu kufuá kua Jezú? (1 Tes. 2:14, 15)

    Kiebhi Phetele ua tu xisa phangu iambote mu ku tongolola ia lungu ni Mikanda ikôla? (Ikalakalu 2:16, 17, 29, 31, 36, 39; Kol. 4:6)

    Kiebhi Phetele kia dianga ku kalakala ni “jisabhi ja utuminu ua diulu,” ja kanena Jezú ku mu bhana? (Ikalakalu 2:14, 22-24, 37, 38; Mat. 16:19)