Ku bokona mu madisá

Ku bokona mu madisá

Musoso 107: Xitevá A Mu Takula Matadi

Musoso 107: Xitevá A Mu Takula Matadi

ODIIALA dia fukama bhabha Xitevá. Muéne dixibulu dia fiiele ia Jezú. Maji tala-phe, ihi ia mu bhita ni muéne! O maiala iâ, a mu mu takula matadi. Mukonda diahi ene a zembele kiavulu Xitevá, ni ala ku mu bhanga o kima kiki kiaiibha? Ndoko tu tale.

Xitevá a mu mu takula matadi

Nzambi ua kuatekesele Xitevá ku bhanga madiuanu. O maiala iâ, ki kia a uabhelele, kienhiki ene a zokele nê, mukonda dia ku longa o kidi ku athu. Maji Nzambi ua bhana kua Xitevá unjimu uavulu, muéne uedikisa kuma o maiala iâ, ene mu longa makutu. Kiki kia a bhangesa dingi ku tema kiavulu. Kienhiki, ene a mu kuata, ia exana athu phala ku tanga makutu alungu ni muéne.

O muadiakimi ua ngeleja uebhula Xitevá: ‘Ima ioso kidi?’ Xitevá ua tambuijila mu ku a bhana dilombuelelu dia Bibidia. Mu kusukáko, muéne ua a tangela kiebhi mu ukulu o maiala iâ aiibha, a zembele o jipolofeta ja Jihova. Kienhiki muéne uambe: ‘Enu mua difuangana kála o maiala ió. Enu mua jibha o selevende ia Nzambi, Jezú, ki mua belesela o itumu ia Nzambi.’

Kiki kia bhangesa dingi atuameni a jingeleja ku dizangala kiavulu! Ene a dikokota o maju mu ku tema kuâ. Maji Xitevá ua bhetuka o mútue, iu uambe: ‘Tala! Eme nga mu mona Jezú ua xikama bhu mbandu ia kadilu ka Nzambi ku diulu.’ Mu kithangana kieniókio, o maiala a xiti o matui inga a kuata Xitevá. Ene a mu koko katé bhu kanga ia mbanza.

Ene a zula o izuatu iâ, ni a i bhana ku muzangala Saúlu phala ku i kuata. Ua mu mona Saúlu? Kienhiki, a kamúkua a mateka ku takula matadi kua Xitevá. Xitevá ua fukama kála ki ua mu mu mona bhabha, muéne ua sambe kua Nzambi: ‘Jihova, kana ku a kaxtikala mu kima kiki kiaiibha.’ Muéne uejidile kuma a kamúkua a a nganala ku atuameni a jingeleja. Anga, Xitevá ufuá.

Kioso muthu kia ku bhanga kima kiaiibha, eie u mu bhanga ué kiaiibha, anga u bhinga kua Nzambi phala ku mu bhanga ué kiaiibha? Xitevá ni Jezú ki kiene kia bhangele. Ene exile athu ambote, katé kua ió a a zembele. Tu kaiele ué ia bhangele.

Ikalakalu 6:8-15; 7:1-60.



Ibhuidisu

  • Nanhi uexile Xitevá, ni ihi Nzambi ia mu kuatekesa ku bhanga?
  • Ihi ia zuela Xitevá ia bhangesa atuameni a jingeleja ku dizangala kiavulu?
  • Kioso o maiala a kokela Xitevá bhu kanga dia mbanza, ihi ene ia mu bhangele?
  • Mu fikula, nanhi o muzangala uemana bhu mbandu ia izuatu?
  • Ande dia kufuá, ihi ia bhingi Xitevá kua Jihova mu musambu?
  • Mu ku kaiela o phangu ia Xitevá, ihi i tua tokala ku bhanga kioso kia tu bhanga kiaiibha ku athu?

Ibhuidisu ia mukua

  • Tanga Ikalakalu 6:8-15.

    Ima iahi iaiibha iene mu bhanga o atuameni a jingeleja phala ku fidisa o kikalakalu kia kuboka kia Jimbangi ja Jihova? (Ikalakalu 6:9, 11, 13)

  • Tanga Ikalakalu 7:1-60.

    Ihi ia kuatekesele Xitevá mu ku zokela o njimbu iambote mu sala ia ku Fundisa, ni ihi tu tena ku dilonga ku phangu iê? (Ikalakalu 7:51-53; Lom. 15:4; 2 Tim. 3:14-17; 1 Phe. 3:15)

    Ukexilu uahi u tua tokala ku kala nau ua lungu ni ió a tatela o kikalakalu kietu? (Ikalakalu 7:58-60; Mat. 5:44; Luka 23:33, 34)