MU KUBHITA izuua Jezú ua monekena ku akaiedi’ê, mu veji javulu. Saí kizuua, 500 ja maxibulu a mu mono. Kioso kia monekena, eie uejiia se ihi Jezú ia ambela? O utuminu ua Nzambi. Jihova ua tumina Jezú mu ixi phala ku longa ia lungu ni Utuminu. Muéne ua kolokota mu ku bhanga íii, katé muene ku difukunukinu diê.

Jezú u vutuka ku diulu

Eie ua lembalala se utuminu ua Nzambi ihi? Kiene, o Utuminu o nguvulu ia kidi ia Nzambi uala ku diulu, Jezú muéne a mu solo Kua Nzambi phala ku kala sobha. Kála ki tua dilongo kia Jezú uedikisa kuma, ua-nda kala sobha iambote, kioso kia disa akua nzala ni ku saka o jihaxi, katé ué muéne ua bheka athu ku muenhu!

Kienhiki, kioso Jezú kia-nda tumina kála sobha mu diulu mu midi ia mivu, o ixi ia-nda kala kiebhi? Kiene, o ixi ioso ia-nda kituka palaízu ia iuka. Ki mua-nda kala dingi ita mba usuéia, mba mauhaxi, mba kufuá. Tuejiia kuma kiki kia-nda kala kidi mukonda Nzambi ua bhange o ixi phala ku kala palaízu, phala athu ku kala-mu ni ku sanguluka. Mukonda dia kiki mu dimatekenu muéne ua bhange o jaludim ia Edene. Jezú ua-nda bhanga ioso ia-ndala Nzambi, mu kusukáko, íii ia-nda di kumbidila.

Kua bhixila o thembu ia Jezú ku vutuka ku diulu. Jezú ua di dikisa ku maxibulu mê mu 40 a izuua. Kienhiki, ene akexile ni kixikinu kuma muéne uala dingi ni muenhu. Maji ande dia ku xisa o maxibulu mê, muéne ua ambela: ‘Kalenu mu Jeluzaleme, katé ki mua-nda tambula o nzumbi ikôla.’ O nzumbi ikôla, o nguzu ia tenena ia Nzambi, ia difu kála mulenge u bhusa, íii ia-nda kuatekesa o akaiedi’ê, phala ku bhanga o vondadi ia Nzambi. Mu kusukáko Jezú uixi: ‘Enu mua tokala kuboka maka alungu ni eme mu ixi ioso katé ku maxokololo.’

Kioso Jezú kia zubha ku zuela, kua bhiti madiuanu. Muéne ua mateka ku banda ku diulu, kála ki ua mu mona bhabha. Kienhiki, o dituta dia mu xiti, o maxibulu katenene dingi ku mona Jezú. Jezú uai ku diulu, kuenhoko muéne ua mateka ku tumina mu kaxaxi ka akaiedi’ê mu ixi.

O maxibulu a mona ku diulu

1 Kolindo 15:3-8; Dijingunuinu 21:3, 4; Ikalakalu 1:1-11.



Ibhuidisu

  • Mu kizuua kimoxi maxibulu akuxi a monene Jezú
  • O Utuminu ua Nzambi ihi
  • Mu izuua ikuxi ia monekena Jezú ku maxibulu mê
  • Ande dia ku xisa o maxibulu mê
  • Ihi ia mu bhita mu fikula

Ibhuidisu ia mukua

  • Tanga 1 Kolindo 15:3

    Mukonda diahi o poxolo Phaulu ua tenene ku zuela ni kidielelu kioso kia lungu ni difukunukinu dia Jezú? Lelu o Jikidistá a tokala ku zuela ia lungu ni ihi ni kidielelu kioso? (1 Kol. 15:4, 7, 8; Iza. 2:2, 3; Mat. 24:14; 2 Tim. 3:1-5)

  • Tanga Ikalakalu 1:1

    Katé kuebhi kua bhixila o kikalakalu kia kuboka, kála kia ki tange mu divulu dia Ikalakalu 1:8? (Ikalakalu 6:7; 9:31; 11:19-21; Kol. 1:23)