Ku bokona mu madisá

Ku bokona mu madisá

Musoso 102: Jezú U Kala Ni Muenhu

Musoso 102: Jezú U Kala Ni Muenhu

MUHATU iú, ni maiala aiadi ua ejiia? O muhatu Madiia dia Manda, kamba dia Jezú. O maiala ni izuatu ia zele, ji-anju. O kididi kia mu tala Madiia, o kididi kia tele o kimbi kia Jezú. A ki xana mbila. Maji o kimbi kia jimbidila! Nanhi ua kiambata? Ndoko tu tale.

Ji-anju ja mu zuela ni Madiia dia Manda

Kioso kiafú Jezú, o akunji a jingeleja ambela Pilatu: ‘Jezú kia kexile hanji ni muenhu uambele kuma ua-nda fukunuka mu kizuua kia katatu. Kienhiki tumina ku langa o mbila. Kiki o maxibulu mê ka-nda tena ku nhana o kimbi kiê, né kuamba kuma muéne ua fukunuka!’ Kienhiki, Pilatu uambela akunji a jingeleja phala ku tumina masoladi ku langa o mbila.

Maji kiafú Jezú, mu kizuua kia katatu, mu kimene kia selu, o anju ia Jihova iéza. Iene ia katula o ditadi dia jikile o mbila. O masoladi akexile ni uôma. Mu kusukáko, ene kioso kia tale moxi a mbila, a mono kuila o kimbi ki kiexile-mu dingi! Saí masoladi endele mu mbanza mu tangela akunji a jingeleja. Uejiia o kima kiaiibha kia bhangele akunji a jingeleja? Ene a futu o masoladi phala ku tanga makutu. O akunji a jingeleja ambela o masoladi, ‘Zuelenu kuila o maxibulu mê ejile mu usuku kioso ki mua kexile mu zeka, ia a nhana o kimbi.’

Mu kithangana kieniókio makamba a ahatu a Jezú endele ku mbila. Ene a diuanene mukonda ka sangele-mu kima! Mu kithangana kieniókio, kua moneka anju jiiadi ni izuatu i bhenha. Ene ebhula, ‘Mukonda diahi mua mu sota Jezú bhabha?’ ‘Muéne ua fukunuka. Ndenu ni lusolo mu a tangele o maxibulu mê.’ Ahatu ai ni lusolo luoso! Maji mu njila mua moneka diiala ua emanesa. Uejiia se nanhi? Jezú! Muéne uixi, ‘Ndenu mu tangele maxibulu’ami.

Kioso ahatu kia tangela o maxibulu kuila Jezú uala ni muenhu, ni ene a mu mono, o maxibulu ka ki xikanene. Phetele ni Nzuá a lengela ku mbila phala ku tala se kidi muene, maji mu mbila ka sange-mu kima! Kioso Phetele ni Nzuá kia tundu, Madiia dia Manda ua xalele hanji ku dima. Kienhiki, muéne ua mono anju jiiadi.

Uejiia ihi ia bhitile ni kimbi kia Jezú? Nzambi ua ki jimbidisa. Nzambi ka fukunuine Jezú kála muthu mu xitu. Ua bhana Jezú muenhu uobhe mu nzumbi kála o ji-anju ku diulu. Maji phala ku di dikisa ku maxibulu mê, kuma muéne uala ni muenhu, Jezú ua moneka mu xitu, phala athu ku tena ku mu mona, kála ki tua-nda dilonga ku pholo.

Matesu 27:62-66; 28:1-15; Luka 24:1-12; Nzuá 20:1-12.



Ibhuidisu

  • Nanhi o muhatu mu fikula, a nanhi o maiala aiadi, ene ala kuebhi?
  • Mukonda diahi Pilatu ua zuela ku akunji a jingeleja phala a tumikise masoladi ku langa o mbila ia Jezú?
  • Ihi ia bhangele o anju mu kimene kia selu, mu kizuua kia katatu kia u fuilu ua Jezú, ni ihi ia bhangele akunji a jingeleja?
  • Mukonda diahi ahatu endele ku mbila a Jezú a diuanene?
  • Mukonda diahi Phetele ni Nzuá a lengela katé ku mbila ia Jezú, ni ihi ene ia sange-mu?
  • Ihi ia bhitile ni kimbi kia Jezú, maji ihi muéne ia bhange phala kuidikisa ku maxibulu mê kuma muéne uala ku muenhu?

Ibhuidisu ia mukua

  • Tanga Matesu 27:62

    Kiebhi atuameni a jingeleja o Jifalizeu, ni adiakimi, a te kituxi ku nzumbi ikôla mu difukunukinu dia Jezú? (Mat. 12:24, 31, 32; 28:11-15)

  • Tanga Luka 24:1

    Kiebhi o musoso ua lungu ni difukunukinu dia Jezú, uidikisa kuma Jihova u mona ahatu kala jimbangi ja tokala kidielelu? (Luka 24:4, 9, 10; Mat. 28:1-7)

  • Tanga Nzuá 20:1

    Kiebhi o divulu dia Nzuá 20:8, 9 di tu kuatekesa ku mona kuma tua tokala ku tululuka, se ki tua ki tendela o kikumbidilu kia kikanenu kia Bibidia? (Jisa. 4:18; Mat. 17:22, 23; Luka 24:5-8; Nzuá 16:12)