Ku bokona mu madisá

Ku bokona mu madisá

Musoso 98: Ku Mulundu Ua Midiva

Musoso 98: Ku Mulundu Ua Midiva

IÚ Jezú ku Mulundu ua Midiva. O maiala kiuana ala nê, o jipoxolo jê. O jiphange, Mandele ni Phetele, Tiiaku ni Nzuá jiphange ué. Iná o tembulu ia Nzambi mu Jeluzaleme, ua mu i mona kuná.

Kua bhitile kiá izuua iiadi, tundé Jezú kia bokuene mu Jeluzaleme ku thandu dia bulu. Kiexile kiá, kia Tersa. Mu kimene kia selu mu kizuua kieniókio, Jezú uakexile mu tembulu. O akunji a jingeleja a mesene ku kuata Jezú phala ku mu jibha. Maji akexile ni uôma, ua athu a zolele Jezú.

Jezú ni maxibulu mê

Jezú uexana atuameni a jingeleja. ‘Enu mu jinhoka, mu ana-madiuta!’ Kienhiki, Jezú uambe kuma Nzambi ua-nda ku a kaxtikala, mukonda dia ima ioso iaiibha ia bhangele. Anga, Jezú u banda ku Mulundu ua Midiva, kuenhoko, o jipoxolo jê jiuana a mu ebhuidisa. Eie uejiia se ene ebhula ihi kua Jezú?

O jipoxolo ebhula maka alungu ni ima ia-nda kuíza ku pholo. Ene ejidile kuma Jezú, ua-nda zubha o ima ioso iaiibha mu ixi. Maji a mesene kuijiia kizuua kiebhi ki ia-nda bhita. Thembu kuxi, Jezú ia-nda kuíza dingi phala ku tumina kála Sobha?

Jezú uejidile kuma o akaiedi’ê mu ixi, ka-nda tena ku mu mona kioso kia-nda vutuka dingi. Mukonda muéne ua-nda kala ku diulu, inga ene keji tena ku mu mona. Kienhiki, Jezú uambela o jipoxolo jê ima ia mukuá ia-nda bhita mu ixi, kioso muéne kia-nda tumina kála Sobha mu diulu. Ima iahi iambe?

Jezú uambe kuma kua-nda kala ita iavulu, mundu uavulu ua-nda kata, kua-nda kala nzala, o ima iaiibha ia-nda dimendala kiavulu, o ixi ia-nda tunguta. Jezú uambe ué kuma o njimbu iambote ia utuminu ua Nzambi, a-nda i boka mu ixi ioso. Tua i muene kiá, o ima íii mu thembu ietu? Kiene! Mukonda dia kiki, etu tuala ni kixikinu kuma Jezú ua mateka ku tumina mu diulu. Kua kambe ngó, muéne ua-nda zubha o ima ioso iaiibha mu ixi.

Matesu 21:46; 23:1-39; 24:1-14; Marku 13:3-10.



Ibhuidisu

  • Mu fikula, Jezú nanhi, iá ala nê a nanhi?
  • Ihi akunji ia fikisa ku bhanga kua Jezú mu tembulu, ni ihi ia ambela muéne?
  • Ihi iebhula o jipoxolo kua Jezú?
  • Mukonda diahi Jezú ua tangela o jipoxolo o ima ia-nda bhita mu ngongo, kioso kia-nda mateka ku tumina kála Sobha ku diulu?
  • Ihi iambe Jezú ia-nda bhita ande dia ku zubha ni kuiibha kuoso mu ixi?

Ibhuidisu ia mukua

  • Tanga Matesu 23:1-39.

    Sumbala o Mikanda ikôla idikisa kuma ku kala ni majina a ujitu ki maka, o izuelu ia Jezú mu divulu dia Matesu 23:8-11, idikisa ihi ia lungu ni ku kala ni majina a unvuama mu kilunga kia Jikidistá? (Ikalakalu 26:25; Lom. 13:7; 1 Phe. 2:13, 14)

    Ihi ia bhangele o Jifalizeu phala ku fidisa athu ku kala Jikidistá, ni kiebhi atuameni a jingeleja a bhanga ué kienhiki mu thembu ietu? (Mat. 23:13; Luka 11:52; Nzuá 9:22; 12:42; 1 Tes. 2:16)

  • Tanga Matesu 24:1-14.

    Kiebhi o valolo ia ku kolokota kia i tendelesa mu divulu dia Matesu 24:13?

    Ihi ilombolola o kizuelu “dizubhilu” mu divulu dia Matesu 24:13? (Mat. 16:27; Lom. 14:10-12; 2 Kol. 5:10)

  • Tanga Marku 13:3-10.

    Kizuelu kiahi mu divulu dia Marku 13:10, kidikisa kuma tua tokala kuboka o njimbu iambote ni lusolo, ni kiebhi o kizuelu kiki kia Jezú tua tokala tu ki kumbidila? (Lom. 13:11, 12; 1 Kol. 7:29-31; 2 Tim. 4:2)