OMUHATU iú ua uabha, Madiia. Muéne mukuá Izalaiele, ua tungile mu mbanza ia Nazalé. Nzambi uejidile kuma, muéne uexile muthu uambote. Mukonda dia kiki, muéne ua tumikisa anju iê, Ngabidiiele, phala ku zuela ni muéne. Uejiia se ihi Ngabidiiele iéza mu tangela Madiia? Ndoko tu tale.

Ngabidiiele uixi, ‘Uazekele kiebhi, eie a ku zediuisa.’ ‘Jihova uala ni eie.’ Madiia nuka ua muene o muthu iú. Muéne ua thandanganhele, mukonda kejidile ihi muéne ia mesene ku zuela. Maji Ngabidiiele ua mu tululukisa.

Madiia

Muéne uambe, ‘Kana ku kala ni uôma, Madiia.’ Jihova ua sanguluka kiavulu ni eie. Mukonda dia kiki, muéne ua-nda ku bhangela ima ia madiuanu. Eie ua-nda vuala mona. Ua tokala u mu ixana Jezú.’

Inga, Ngabidiiele u suluka mu zuela: ‘O mona iú, ua-nda kula, a-nda mu ixana Mon’a Nzambi, Muteni-a-Ioso. Jihova ua-nda mu bhanga sobha, kála kiexile Davidi. Maji Jezú ua-nda kala sobha katé ku hádia, o utuminu uê ki ua-nda bhua!’

Madiia uebhula, ‘Kiki kia-nda bhita kiebhi?’ Eme ki luua ngi kazala. Eme ki ngejiia luua diiala, kienhiki, kiebhi nga-nda kala ni mona?’

Ngabidiiele ua tambuijila, ‘O nguzu ia Nzambi ia-nda tuluka kokué.’ Kienhiki, o mona a-nda mu ixana, Mon’a Nzambi.’ Kienhiki, muéne uambela, Madiia: ‘Lembalala ndandu iê Nzebele. Athu akexile mu zuela kuma muéne ua kuka kiá, phala ku vuala mona. Maji muéne ua-nda vuala mona. Kienhiki, ki kuale kima kia bhonzo phala Nzambi ku ki bhanga.’

Mu kithangana kieniókio, Madiia uixi: ‘Eme ngi mubhika ua Jihova! Ki ngi bhite kála ki ua zuela.’ Kienhiki-phe, o anju iai.

Kienhiki, Madiia ua lenguluka múia mu kunda Nzebele. Kioso Nzebele kiévu o dízui dia Madiia, o mona mu mala dia Nzebele ua tuka ni kisangusangu. Nzebele u kala ni nzumbi ia Nzambi, inga muéne uambela Madiia: ‘Eie a ku zediuisa bhenge-bhenge mu kaxaxi ka ahatu.’ Kienhiki, Madiia uakexile ni Nzebele mu mbeji jitatu, anga u vutuka kubhata mu Nazalé.

Madiia o ukaza uê ua zukamene kiá, ni diiala a mu ixana Zuze. Maji kioso Zuze kiévu kuma Madiia uemita, muéne ka-ndalele dingi ku kazala ni muéne. Kiki-phe, o anju ia Nzambi ua mu ambela: ‘Kana ku kala ni uôma ua ku kala ni Madiia. Nzambi ua mu bhana o mona.’ Kienhiki, Madiia ni Zuze a kazala, ni a kingila o uvualukilu ua Jezú.

Luka 1:26-56; Matesu 1:18-25.



Ibhuidisu

  • Nanhi o muhatu mu fikula?
  • Ihi ia zuela Ngabidiiele kua Madiia?
  • Kiebhi kia jimbulula Ngabidiiele kua Madiia kuma muéne ua-nda vuala mona, se muéne ka kexile ni diiala?
  • Ihi ia bhitile kioso Madiia kiai mu kunda ndandu iê Nzebele?
  • Ihi ia banzele Zuze kiévu kuma Madiia ua-nda vuala mona, ni mukonda diahi muéne ua bhilula o kilunji kiê?

Ibhuidisu ia mukua

  • Tanga Luka 1:26

    Ihi idikisa o divulu dia Luka 1:35, kuma o ku kamba o kuiuka kua Adá mu mala dia Madiia, ki ku bhangesa kima kioso kia tumikisa o muenhu ua Mon’a Nzambi tundé ku diulu? (Aje. 2:11

    Kiebhi Jezú kia tambula o kijingu ande dia ku mu vuala? (Luka 1:41

    Phangu iahi iambote ia xisa Madiia ku Jikidistá ja lelu a tambula kikalakalu kionene mu kilunga? (Luka 1:38, 46

  • Tanga Matesu 1:18

    Tuejiia kuma Jezú ka mu ixanene mu dijina dia Imanuuele, kiebhi o kikalakalu kiê kála muthu, kia lungile ni dijimbuluilu dia dijina didi? (Mat. 1:22, 23; Nzuá 14:8