KIOSO kia zubha ku saka o jingadiama jiiadi ja ifofo, Jezú uai katé mu sanzala bhua zukama mu Jeluzaleme. Muéne uambela o maxibulu mê aiadi: ‘Ndenu mu sanzala, kuenhoko mua-nda sanga-mu bulu. Mu i jituna, inga mu ngi bhekela na-iu.’

Kioso kia mu bhekela o bulu, Jezú ua habe-ko. Kienhiki, muéne uendela-ko katé mu Jeluzaleme. Kioso kia zukama ku mbanza, athu uavulu ejile mu takajana nê. Athu avulu a katula o izuatu iâ, ia izale mu njila. A kamúkua a batula isalale ia maie. Ene a izale mu njila, ia dikolele: ‘Nzambi u zediuisa o sobha ia mu kuíza mu dijina dia Jihova!’

Athu a sangesa Jezú

Mu ukulu, mu Izalaiele o jisobha ja ubhe jakexile mu bokona mu Jeluzaleme ku thandu dia bulu ubhe, phala ku a mona ku mundu. Kiki kiene kia bhangele Jezú. Athu enhá, adikisa kuma a mesene Jezú kála sobha. Maji saí a mukuá ka mesenene. Tua ki mono kioso Jezú kia bokona mu tembulu.

Mu tembulu Jezú ua sake ifofo ni inema. Kioso ana-ndenge kia ki mono, a ximana Jezú. Maji kiki kia bhangesa akunji a jingeleja ku dizangala, inga ene ambela Jezú: ‘Ua mu kuívua, ia mu zuela o tuana?’

Jezú ua tambuijila, ‘Kiene, nga mu kuívua.’ ‘Nuka mu ki tanga mu Bibidia: ‘Diximanu dia Nzambi dia fuama kiéngi mu kanu dia ana-ndenge?” Kienhiki, tuana a kolokota ku ximana o sobha ia Nzambi.

Tua mesena tu kala kála o tuana tutu, ki kiene? Saí athu a kamúkua nange a fikisa ku tu fidisa ku zuela maka alungu ni utuminu ua Nzambi. Maji tua-nda kolokota mu ku tangela akuetu ioso ia lungu ni madiuanu, a-nda bhanga Jezú phala o mundu.

O thembu phala Jezú ku mateka ku tumina mu ixi, ki ia bhixile luua. Ia-nda bhixila thembu kuxi? O maxibulu a Jezú a mesenene ku kijiia. Ku pholo tua-nda tanga o maka iâ.

Matesu 21:1-17; Nzuá 12:12-16.



Ibhuidisu

  • Kioso kia bhixila Jezú mu sanzala ia zukamene mu Jeluzaleme, ihi ia tumina o maxibulu mê ku bhanga?
  • Mu fikula, ihi ia bhitile kioso Jezú kia zukamene mu mbanza ia Jeluzaleme?
  • Ihi ia bhangele ana-ndenge kioso kia mono Jezú ku saka athu exile ifofo ni inema?
  • Ihi ia zuela Jezú ku akunji a dizangalele?
  • Kiebhi tu tena ku kala kála ana-ndenge a ximanene Jezú?
  • Ihi ia-ndalele kuijiia o maxibulu?

Ibhuidisu ia mukua

  • Tanga Matesu 21:1-17.

    Kiebhi o ku bokona kua Jezú mu Jeluzaleme kála Sobha, ki kua difuangana ni ji kabhitangu ja tambuile Loma mu ukulu? (Mat. 21:4, 5; Zak. 9:9; Fil. 2:5-8; Kol. 2:15)

    Disá diahi o mizangala a tena ku dilonga dia mizangala akua Izalaiele kioso kiembile o 118 dia Jisálamu, kioso kia bokona Jezú mu tembulu? (Mat. 21:9, 15; Jisá. 118:25, 26; 2 Tim. 3:15; 2 Phe. 3:18)

  • Tanga Nzuá 12:12-16.

    Ihi ilombolola o isalale ia maie ambatele athu phala ku menekena Jezú? (Nzuá 12:13; Fil. 2:10; Dij. 7:9, 10)