Ku bokona mu madisá

Ku bokona mu madisá

Musoso 96: Jezú U Saka O Jihaxi

Musoso 96: Jezú U Saka O Jihaxi

KIOSO Jezú kia kexile mu kuende mu madiembu, muéne ua sakele o jihaxi. Kienhiki, o njimbu ia lungu ni madiuanu a ivu mu jisanzala joso, ni mu jimbanza. O mundu a mu bhekele o inema, o ifofo ni mabubu ni jihaxi ja mukuá. Inga Jezú ua a sakele.

Kua bhitile kiá mivu itatu tundé Nzuá kia batizala Jezú. Jezú uambela o jipoxolo jê kuma, ua-ndaia mu Jeluzaleme, kuene kua-nda mu jibha, inga muéne ua-nda fukunuka mu kaxaxi ka ió afú. Mu kithangana kieniókio Jezú ua kolokotele mu ku saka o jihaxi.

Jezú ua mu saka o muhatu ua kate

Saí kizuua Jezú uakexile mu longa kia Sábhalu. O Sábhalu iexile o kizuua kia Jijudé ku nhoha. O muhatu iu ua mu mu mona bhabha, uakexile mu kata kiavulu. Ua katele mu 18 dia mivu sé ku tena kuimana. Mu kienhiki, Jezú ua mu kuata, iu ua mateka kuimana. Inga muéne u disanza!

Kiki kia bhangesa atuameni a jingeleja ku dizangala. Mukuá uambe, ‘Kuala izuua isamanu phala ku kalakala.’ Íii iene o izuua phala ku saka, kia Sábhalu kana!’

Maji Jezú ua tambuijila: ‘Enu mu athu aiibha. Muthu mu kaxaxi kenu u jituna o bulu iê, anga u iambata phala ku i nuisa kia Sábhalu. Ki kia tokala o muhatu iú, ua mu kata kiá mu 18 dia mivu ku mu saka mu Sábhalu?’ O kiambe Jezú kia a kuatesa jisonhi.

Anga, Jezú ni jipoxolo ai katé mu Jeluzaleme. Kioso kia kexile mu mbanza ia Jedikó, o jingadiama ja ifofo, evu kuma Jezú ua mu bhita. Mu kienhiki, ene a dikola: ‘Jezú tu kuatekese!’

Jezú uexana o ifofo, iu ua ebhula: ‘Ihi enu i mua mesena kôkuami?’ Ene exi: ‘Ngana, tu jikule o mesu.’ Jezú ua kuata ku mesu mâ, kienhiki ene a mateka ku mona! Uejiia mukonda diahi Jezú ua bhange o madiuanu oso iâ? Mukonda muéne ua zolele athu, iu ua mesenene kuma ene a kala ni kixikinu kua muéne. Kienhiki, tu tena ku kala ni kixikinu kioso kia-nda tumina kála Sobha, ki mua-nda kala muthu mu ixi ua-nda kata dingi.

Matesu 15:30, 31; Luka 13:10-17; Matesu 20:29-34.



Ibhuidisu

  • Ihi ia bhangele Jezú kioso kia kexile mu kuenda mu ixi?
  • Kia bhiti mivu itatu ia batizu, ihi Jezú ia zuela ku jipoxolo?
  • A nanhi athu mu fikula, ni ihi Jezú ia bhangela ku muhatu?
  • Mukonda diahi o i tambuijilu ia Jezú ku ibhuidisu ia atuameni a jingeleja ia a bhangesa ku kuata jisonhi?
  • Kioso Jezú ni jipoxolo jê kia kexile mu zukama mu Jedikó, ihi ia bhange Jezú ku jingadiama jiiadi ja ifofo?
  • Mukonda diahi Jezú ua bhangele madiuanu?

Ibhuidisu ia mukua

  • Tanga Matesu 15:30, 31.

    Ku tena kuahi kua Jihova kuedikisa mu kaxaxi ka Jezú, ni kiebhi kiki ki tu kuatekesa kuijiia ia kanena Jihova phala o mundu uobhe? (Jisá. 37:29; Iza. 33:24)

  • Tanga Luka 13:10-17.

    Mu ku bhanga o madiuanu mu Sábhalu, kiebhi Jezú kiedikisa o paze ia-nda bheka ku mundu mu Utuminu uê ua Midi ia mivu? (Luka 13:10-13; Jisá. 46:9; Mat. 12:8; Kol. 2:16, 17; Dij. 21:1-4)

  • Tanga Matesu 20:29-34.

    Kiebhi o musoso iú, uedikisa kuma o kikalakalu kia Jezú ki ki mu bhuidisile mu kuatekesa athu? Ihi i tua dilongo ni íii? (Mate. 15:7; Tii. 2:15, 16; 1 Nzuá 3:17)