Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 94: Muéne U Zola Ana-ndenge

Musoso 94: Muéne U Zola Ana-ndenge

TALA Jezú ua kuata ku mona-ndenge. U tena ku mona kuma Jezú mu kidi ua zolele kiavulu ana-ndenge. O maiala a mu mu tala, jipoxolo jê. Ihi Jezú ia mu a zuelela? Tu tale.

Jezú ni maxibulu mê a zubha ku vutuka ku njila ia lebha. Mu njila o maxibulu akexile mu zoka mudiâ. Kienhiki kia bhixila, Jezú ua ebhuidisa: ‘Ihi mua kexile mu zoka mu njila?’ Mu kidi, Jezú uejidile ihi ia kexile mu zoka. Maji muéne ua ebhula phala ku mona se o maxibulu a-nda mu tangela ihi.

Jezú ni ana ndenge

Maji o jipoxolo ka mu tambuijila, mukonda ene akexile mu zoka se nanhi uexile o dikota mu kaxaxi kâ. Saí jipoxolo a-ndalele ku beta-kota mu kaxaxi kâ. Kiebhi Jezú kia ambela kuma ki kia fuama ku mesena ku kala o dikota mu kaxaxi kâ?

Muéne uexana o mona-ndenge, iu ua mu tula ku pholo iâ. Kienhiki muéne uambela maxibulu mê: ‘Nga-ndala muijiia kuma se ki mu kale kala ana-ndenge ki mua-nda bokona mu utuminu ua Nzambi. O dikota mu utuminu ua Nzambi, io u kala kála o mona-ndenge iú.’ Uejiia mukonda diahi Jezú uambe kiki?

Ana-ndenge ka dibandekesa mu kaxaxi ka akuâ. Mukonda dia kiki o jipoxolo a tokalele ku kala kála ana-ndenge, ka zoko phala ku kala dikota, mba muthu uonene.

Mu ithangana ia kamúkua Jezú uedikisa ué kiebhi kia zolele ana-ndenge. Mu ji mbeji ja kaiela-ku, saí athu a bhekele o tuana tuâ kua Jezú phala ku mu mona. O jipoxolo a mesenene ku a fidisa. Maji Jezú uambela o jipoxolo: ‘Ehelenu o tuana kuíza kôkuami, kana ku a fidisa, mukonda o utuminu ua Nzambi ua tokala athu kála ene.’ Kienhiki, Jezú ua kuata mu lukuaku, iu ua a besoala. Ki kima kiambote kuijiia kuma Jezú ua zolo ana-ndenge?

Matesu 18:1-4; 19:13-15; Marku 9:33-37; 10:13-16.



Ibhuidisu

  • Ihi ia kexile mu zokela o jipoxolo, kioso kia kexile mu vutuka mu njila?
  • Mukonda diahi Jezú uexana o mona-ndenge iu ua mu emanesa bhu kaxaxi ka jipoxolo?
  • Ukexilu uahi o jipoxolo a tokalele ku dilonga ia lungu ni ana-ndenge?
  • Mu ji mbeji ja kaiela, kiebhi kiedikisa Jezú kuma muéne ua zolele ana-ndenge?

Ibhuidisu ia mukua

  • Tanga Matesu 18:1-4.

    Mukonda diahi Jezú uakexile mu longa ni ifika? (Mat. 13:34, 36; Marku 4:33, 34)

  • Tanga Matesu 19:13-15.

    Ifua iahi ia ana-ndenge i tua tokala ku kaiela, se tua-ndala ku tambula o mabesá a Utuminu? (Jisá. 25:9; 138:6; 1 Kol. 14:20)

  • Tanga Marku 9:33-37.

    Ihi ia longo Jezú ku maxibulu mê, ia lungu ni ku mesena ku dibandesa ku thandu dia akuâ? (Marku 9:35; Mat. 20:25, 26; Nga. 6:3; Fil. 2:5-8)

  • Tanga Marku 10:13-16.

    Mukonda diahi tu zuela kuma Jezú uexile muthu uambote, ni kiebhi o adiakimi a Jikidistá a tokala ku dilonga ku phangu iê? (Mar. 6:30-34; Fil. 2:1-4; 1 Tim. 4:12)