KUA BHITI kisunji. Nzuá dia Batizu a mu jibha. Helodiia, muhatu a sobha, ua mu zembele. Muéne ua bhingile kua sobha phala ku tumina ku batula o mutué ua Nzuá.

Kioso Jezú kiévu kienhiki, muéne ua luualele kiavulu. Muéne uendele u bheka-uê mu kididi kio bheka. Maji athu a mu kaiela. Kioso Jezú kia mono o mundu, muéne ua a kuatela henda. Kienhiki, muéne ua a tangela ia lungu ni utuminu ua Nzambi, iu ua sake o jihaxi.

Mu usuku o maxibulu’ê, eza ia mu tangela: ‘Kumbi diáfu, o kididi kiki kia ubheka. Tumina o mundu kuia, phala na sumbe kúdia mu jisanzala.’

Jezú u disa athu avulu

Jezú ua tambuijila, ‘Ene ka tokala kuia.’ ‘Mu a bhana kúdia.’ Kienhiki Jezú uebhula Filipe: ‘Kuebhi ku tua-nda sumba kúdia phala athu oso?’

Filipe ua tambuijila, ‘Kua-nda bhinga kitadi kiavulu phala ku sumba kúdia phala o mundu uoso.’ Mandele ua zuela: ‘O muzangala ua mu kuambata o kúdia kuetu, uala ni mbolo jitanu, ni mbiji jiiadi. Maji ki kua-nda soka phala mundu uoso.’

Jezú uambe, ‘Tumina athu ku zukama, a xikame bhoxi.’ Mu kienhiki, muéne ua sakidila Nzambi o kúdia, iu ua mateka kua a uanena. Kiki o maxibulu a bhanene mbolo ni mbiji ku mundu uoso. Kua kexile 5.000 ja maiala ni jimidi ja ahatu ni ana-ndenge. Oso adi, ia ekuta. Kioso o maxibulu kia ongeka o kúdia kua subhukile, kuezalele 12 ia ikumba!

Jezú ua tumu-phe o maxibulu mê ku sambela ku baluku phala kuzaúka o Kalunga ka Ngalileia. Usuku uoso kuexile kitembu, inga o menha a bhangesa o baluku ku i takujula. Kienhiki o maxibulu akexile ni uôma uavulu. Mu kaxaxi ka usuku, ene a mono muthu ua mu kuendela ku thandu a menha. Ene a dikola ni uôma, mukonda k’ejiidile se uexile nanhi.

Jezú uixi, ‘Ki mu kale ni uôma.’ ‘Eme!’ Ene ka ki xikinine. Phetele uixi: ‘Sé eie muene, Ngana, ngi tumine ngende ku thandu a menha katé ku uala.’ Jezú ua tambuijila: ‘Zakunu!’ Phetele ua tuluka iu uende ku thandu a menha! Maji muéne uakexile ni uôma iu ua mateka ku boba, maji Jezú ua mu bhulula.

Kia kaiela, Jezú uadisa dingi midi ia athu. Mu kithangana kieniókio, muéne ua bhange kiki ni sambuadi dia mbolo, ni tu mbiji. Kua kexile ué kúdia kua soko phala athu oso. Kiki ki kiexile madiuanu kioso Jezú kia kexile mu tambula konda ia mundu? Kioso kia-nda tumina kála sobha mu utuminu ua Nzambi, nuka dingi tua-nda thandanganha ni kima!

Matesu 14:1-32; 15:29-38; Nzuá 6:1-21.



Ibhuidisu

  • Kima kiahi kiaiibha kia bhitile ni Nzuá dia Batizu, ni kiebhi kia divuile Jezú kioso kiévu?
  • Kiebhi Jezú kia disa o mundu uakexile ku mu kaiela, ni makúdia akuxi a subhukile?
  • Mukonda diahi o maxibulu akexile ni uôma mu usuku, ni ihi ia bhitile ni Phetele?
  • Kiebhi Jezú kia disa jimidi ja athu mu luiadi?
  • Mukonda diahi kia-nda uabha kioso Jezú kia-nda tumina kala Sobha ia Nzambi mu ixi?

Ibhuidisu ia mukua

  • Tanga Matesu 14:1-32.

    O kizuelu mu divulu dia Matesu 14:23-32, ki tu longa ihi ia lungu ni kífua kia Phetele?

    Kiebhi o kisoneku kia Mikanda ikôla kidikisa kuma Phetele uakexile ni kilunji, iu ua xisa o kífua kiê kia ku thathamana? (Mat. 14:27-30; Nzuá 18:10; 21:7; Ikalakalu 2:14, 37-40; 1 Phe. 5:6, 10)

  • Tanga Matesu 15:29-38.

    Kiebhi kiedikisa Jezú o ku xila ku ima i bhana Tat’ê? (Mat. 15:37; Nzuá 6:12; Kol. 3:15)

  • Tanga Nzuá 6:1-21.

    Kiebhi o Jikidistá ja lelu a tena ku kaiela o phangu ia Jezú ia lungu ni ku xila o maungana? (Nzuá 6:15; Mat. 22:21; Lom. 12:2; 13:1-4)