TALA o mona-ndenge ua mu zuela ni adiakimi. Ene jimesene ja tembulu ia Nzambi mu Jeluzaleme. O mona, Jezú. Muéne ua kulu kiá. Uala kiá 12 ia mivu.

O jimesene ja tembulu a diuanene kiavulu kioso kia mono kuma, Jezú uejidile kiavulu maka alungu ni Nzambi, ni ima ia soneka mu Bibidia. Maji, mukonda diahi Zuze ni Madiia kala bhobha? Ene ala kuebhi? Ndoko tu tale.

Muzangala Jezú ua zuela ni alongexi

Mu mivu ioso, Zuze uakexile mu kuambata o muiji uê mu Jeluzaleme phala o fesa ionene, a ixana Phasu. Iexile njila ia lebha, tundé ku Nazalé katé mu Jeluzaleme. Ka kexile ni makalu, né komboio. Mu izuua iná ki mua kexile o ima íii. Athu avulu akexile mu kuendela bhoxi, ni a bhitile izuua itatu phala ku bhixila mu Jeluzaleme.

Maji Zuze uakexile ni muiji uonene. Kienhiki, ua bhingile ku tambula konda ia ji ndenge ja Jezú. Mu muvu uenió, Zuze ni Madiia akexile kiá mu ku vutuka mu Nazalé ni an’a. A fika kuma Jezú uala mu kaxaxi ka akua mu njila. Maji mu disukilu dia kizuua k’emana phala ku nhoha, ka mono Jezú. Ene a mu soto ku makamba ni ku jindandu, maji ka mu sange! Kienhiki, a vutuka mu Jeluzaleme phala ku mu sota.

Ene a sange Jezú ni jimesene. Muéne uakexile mu evua ni mu ebhuidisa. En’oso a diuanene mu ku mona o unjimu ua Jezú. Maji Madiia uixi: ‘Mona-tata, ua tu bhangela-hi kienhiki? Tat’ê ni eme tua kexile mu ku sota.’

Jezú ua tambuijila. ‘Mukonda diahi mua kexile mu ngi sota?’ Ki mua kijiia kuma Eme nga bhingi ngi kala m’onzo ia Tat’etu?’

Jezú ua zolele ku kala bhuoso bhua dilonga maka a Nzambi. Ki tua tokala ku kala ué kála muéne? Kia vutuka mu Nazalé Jezú uakexile múia semana joso mu iônge ia ubhezelu. Mukonda dia kuívua, muéne ua dilongo kiambote o Bibidia. Se tu bhanga ué kála kia bhangele Jezú, tua-nda kala kála muéne.

Luka 2:41-52; Matesu 13:53-56.



Ibhuidisu

  • Mu fikula, Jezú uala ni mivu ikuxi, ni kuebhi kuala muéne?
  • Ihi iexile mu bhanga Zuze ni muiji uê, mivu ioso?
  • Kia bhitile kizuua kia muvimba mu njila mu vutuka kubhata, mukonda diahi Zuze ni Madiia a vutukile dingi mu Jeluzaleme?
  • Kuebhi Zuze ni Madiia kua sangele Jezú, ni mukonda diahi athu bhenhobho a diuanene?
  • Ihi ia zuela Jezú kua manh’â, Madiia?
  • Kiebhi tu tena ku kaiela Jezú mu ku dilonga ia lungu ni Nzambi?

Ibhuidisu ia mukua

  • Tanga Luka 2:41-52.

    Sumbala o Ijila ia zuelele kuma o maiala ngó a tokalele kuia mu ji fesa mivu ioso, phangu iahi ia xisa Zuze ni Madiia ku jitata ja lelu? (Luka 2:41; Mate. 16:16; 31:12; Jisa. 22:6)

    Kiebhi Jezú kia xisa phangu iambote ku mizangala ia lelu ia ku belesela o jitata? (Luka 2:51; Mate. 5:16; Jisa. 23:22; Kol. 3:20

  • Tanga Matesu 13:53-56.

    A nanhi o jiphange jiuana ja Jezú a tange o majina mâ mu Bibidia, ni kiebhi kiiadi kiá a kalakalele mu kilunga kia Jikidistá? (Mat. 13:55; Ikalakalu 12:17; 15:6, 13; 21:18; Nga. 1:19; Tii. 1:1; Juda 1:1)