jinganga

UA MU mona o théthembua iná ia mu bhenha, ia mu kuidikisa o maiala iâ? O théthembua ia moneka kioso kia tundu mu Jeluzaleme. O maiala iâ akua Mutundila-kumbi, akexile mu dilonga o jithéthembua. Ene a fika kuma o théthembua iobhe íii ia-nda ku ambata katé ku muthu uonene.

Kioso o maiala kia bhixila mu Jeluzaleme, ene ebhula: ‘O mona ua-nda kala o sobha ia Jijidé uala kuebhi?’ “Judé” dijina diéngi dia akua Izalaiele. O maiala ambe, ‘Kia dianga, tua mono o théthembua, kioso ki tua kexile hanji ku Thunda,’ ‘etu tueza mu mu bheza.’

Kioso Helode, o sobha ia Jeluzaleme kia kívu, ua thandanganhele kiavulu. Muéne ka mesenene sobha iéngi u mu katula o kididi kiê. Kienhiki, Helode uexana akunji iu ua ebhuidisa: ‘O sobha ia kanena, a-nda mu vualela kuebhi?’ Ene a tambuijila: ‘O Bibidia izuela kuma, a-nda mu vualela mu Beleme.’

Kienhiki, Helode uexana o maiala akua Thunda, iu ua ambela: ‘Ndenu, mu sota o mona. Kioso ki mua ka mu sanga, ngehele-nu ué ngi muijiie. Nga-ndala ué ngia ku mu bheza.’ Maji mu kidi, Helode ua mesenene ku sanga o mona phala ku mu jibha!

Kienhiki, o théthembua iendesa o maiala katé mu Beleme, ni iemana mu kididi bhua kexile o mona. Kioso o maiala kia bokona m’onzo, a sange Madiia ni Jezú. A katula maujitu, ia a bhana kua Jezú. Maji Jihova ua dimuine o maiala mu nzoji phala ka vutuke kua Helode. Kienhiki, ene a ditela njila iéngi ia a vutuka ku ixi iâ.

Kioso Helode kiévu kuma, o maiala a Thunda a mu nganala, njinda ia mu kuata kiavulu. Kienhiki, muéne ua tumina ku jibha an’oso mu Beleme akexile ni mivu iiadi, ni ndenge jâ. Maji Jihova ua dimuna Zuze mu nzoji, kienhiki Zuze ua lengela ni muiji uê mu Ijitu. Anga, kioso Zuze kiévu kuma Helode uafú kiá, muéne ni Madiia ni Jezú, a vutuka mu Nazalé. Kuene kua kudila Jezú.

Nanhi ua bhangesa o théthembua iobhe ku muika? Lembalala kuma, o maiala endele ngó mu Jeluzaleme kioso kia mono o théthembua. Satanaji o Diabhu ua mesene ku jibha o Mon’a Nzambi, muéne uejidile kuma, o Sobha Helode ia Jeluzaleme ua mesene ku mu jibha. Kienhiki, Satanaji muéne ua bhangesa o théthembua ku muika.

Matesu 2:1-23; Mikeia 5:2.



Ibhuidisu

  • A nanhi o maiala ala mu fikula, ni mukonda diahi umoxi diâ ua mu kuidikisa o théthembua ia bhenha?
  • Mukonda diahi o Sobha Helode ua thandanganhele, ni ihi muéne ia bhange?
  • Katé kuebhi o théthembua i bhenha iendesa o maiala, ni mukonda diahi ene a vutuka ku ixi iâ, mu njila iéngi?
  • Kitumu kiahi kia bhele Helode, ni mukonda diahi?
  • Ihi Jihova ia tumina Zuze ku bhanga?
  • Nanhi ua bhangesa o théthembua ku bhenha, ni mukonda diahi?

Kibhuidisu kia mukua

  • Tanga Matesu 2:1-23.

    Mivu ikuxi ia kexile na-iu Jezú kioso kia mu kundu ku maiala a dilonga o jithéthembua, ni kuebhi kua kexile? (Mat. 2:1, 11, 16)