TALA o kima kiaiibha kia mu bhita! Jezú ua mu fuá. Ene a mu phaphela ku taka. O jipheleku a ji phaphela ku maku ni ku inama. Mukonda diahi muthu u mesena ku bhanga kiki kua Jezú?

Jezú ua mu fuá

Kia bhitile mukonda kua kexile athu a zembele Jezú. Uejiia se a nanhi? Mukuá, uexile Satanaji o Diabhu, o anju iaiibha. Muéne ua bhangesa Adá ni Eva ku bhukumukina Jihova. Satanaji, muéne ué ua tumina o jinguma ja Jezú ku bhanga o kima kiki kiaiibha.

Ande dia ku phaphela Jezú ku taka, o jinguma jê ja mu bhangele kiá, ima iaiibha. Ua lembalala kioso kiendele mu jaludim ia Ngetesemane ia a mu ambatele? A nanhi exile o jinguma jiji? Ene exile atuameni a jingeleja. Kienhiki, ndoko tu tale se ihi ia bhiti-phe.

Kioso atuameni a jingeleja kiambatele Jezú, o jipoxolo a lengele. Ene a xisa Jezú ubheka ni jinguma, mukonda ene akexile ni uôma. Maji o jipoxolo, Phetele ni Nzuá kendele dikanga. Ene a kaiela Jezú ku dima, phala ku mona se ihi ieji bhita ni Jezú.

Akunji a jingeleja ambatele Jezú ku muadiakimi Hana, o dikota dia akunji. O mundu ki u kexile-ku mu thembu iavulu. Ambata Jezú mu dibhata dia Kaiafa, uexile o mukunji ua dikota. Atuameni avulu a jingeleja endele ué mu dibhata diê.

Mu dibhata dia Kaiafa, ene a mu fundisa. A bheka athu phala ku tanga makutu alungu ni Jezú. O atuameni oso a jingeleja exi: ‘Jezú ua tokala kufuá.’ Kienhiki, ene a mu te mate mu pholo, ni a mu bhana jihuxi.

Kioso ki kia kexile mu bhita, Phetele uakexile bhu kanga. Uexile usuku ua mbambi, kienhiki athu a uikile túbhia. Kioso kia kexile mu kuôta, o selevende ia kilumba ua mono Phetele, iu uixi: ‘O diiala didi uakexile ué ni Jezú.’

Phetele ua tambuijila. ‘Kana, eme ki nga kexile nê!’

Mu veji jitatu athu a zuela kua Phetele kuma muéne uakexile ni Jezú. Maji Phetele uixi mu veji jitatu, makutu. Phetele ua ditunu dingi, mu veji ia katatu, Jezú u sakuka iu ua mu mono. Kienhiki, Phetele ua diela kiavulu mu ku tanga makutu, iu ua tundu bhu kanga ni kudila.

Ki kuákie, kia Sesa, o akunji a jingeleja ambata Jezú mu kididi kia ku fundisa. Bhenhobho, ene a zuela se ihi ia-nda mu bhanga. Kienhiki, a mu ambata kua Ponsiu Pilatu, o nguvulu ia mbanza ia Judeia.

Akunji ambela Pilatu, ‘Iú muthu uaiibha.’ ‘Muéne ua tokala ku mu jibha.’ Kia zubha ku ibhuidisa Jezú, Pilatu uixi: ‘Eme ki nga mon’ami kituxi kia te muéne.’ Kienhiki, Pilatu ua tumikisa Jezú kua Helode Antipa. Helode o nguvulu ia Ngalileia, uakexile mu Jeluzaleme. Helode ka muene kikuma kua Jezú kia bhingile ku mu jibha, kienhiki muéne ua mu vutukisa kua Pilatu.

Pilatu ua mesene kueha Jezú. Maji o jinguma ja Jezú a bhingile phala kueha muthu uéngi bhu kididi kiê. O diiala diexile o muii Balaba. Kiexile kiá mu kaxaxi ka kizuua, inga Pilatu uambata Jezú bhu kanga. Muéne uambela o mundu: ‘Talenu! O sobha ienu!’ Akunji a dikola: ‘Mu ambatenu! Mu jibhienu! Mu jibhienu!’ Kienhiki, Pilatu uehela Balaba, ene ambata Jezú phala ku mu jibha.

Kia Sesa, mu kaxaxi ka kizuua, Jezú a mu phaphela ku taka. Tu tena ku mu mona mu fikula, maji kala mbandu ia Jezú kua kexile kifumbe, a a tele ué ku taka phala kufuá. Ande dia Jezú kufuá, kifumbe kia mukuá uixi: ‘Ngi lembalale kioso ki ua-nda bokona mu utuminu uê.’ Kienhiki, Jezú ua tambuijila: ‘Nga mu ku kanena kuma, ua-nda kala n’eme mu Palaízu.’

O kikanenu kiki kia uabha, ki kiene? O palaízu ia zuela Jezú ua ijiia? O palaízu ia bhangele Nzambi mu dimatekenu, ia kexile kuebhi? Ia kexile mu ixi. Kioso Jezú kia-nda kala sobha mu diulu, muéne ua-nda bheka o diiala didi ku muenhu phala ku kala mu Palaízu iobhe mu ixi. Ki tua tokala ku sanguluka ni maka enhá?

Matesu 26:57-75; 27:1-50; Luka 22:54-71; 23:1-49; Nzuá 18:12-40; 19:1-30.



Ibhuidisu

  • Nanhi uexile o mukuá kikuma ku u fuilu ua Jezú?
  • Ihi ia bhangele o jipoxolo kioso o atuameni a jingeleja kiambatele Jezú?
  • Ihi ia bhitile mu dibhata dia Kaiafa, o mukunji ua dikota?
  • Mukonda diahi Phetele ua tundile ni ku didila?
  • Kioso kia vutuka ni Jezú kua Pilatu, ihi ia kexile mu dikola o akunji a dikota?
  • Ihi ia bhitile ni Jezú kia Sesa mu ngoloxi, ni kikanenu kiahi kia bhangele ku kifumbe uakexile mu taka bhu mbandu iê?
  • Kuebhi kua-nda kala o Palaízu ia zuelele Jezú?

Ibhuidisu ia mukua

  • Tanga Matesu 26:57-75.

    Kiebhi o adiakimi a kiônge kia dikota kia Jijudé edikisa kuma akexile ni mixima iaiibha? (Mat. 26:59, 67, 68)

  • Tanga Matesu 27:1-50.

    Mukonda diahi tu tena ku zuela kuma o ku diela kua Juda ki kuexile kua kidi? (Mat. 27:3, 4; Marku 3:29; 14:21; 2 Kol. 7:10, 11)

  • Tanga Luka 22:54-71.

    Disá diahi di tu dilonga kioso Phetele kia ditunine Jezú mu usuku kia mu kutile ni kia mu ambatele mu kaleia? (Luka 22:60-62; Mat. 26:31-35; 1 Kol. 10:12)

  • Tanga Luka 23:1-49.

    Ihi ia bhangele Jezú mu ima ioso iaiibha ia bhitile na-iu, ni ihi i tu dilonga ni íii? (Luka 23:33, 34; Lom. 12:17-19; 1 Phe. 2:23)

  • Tanga Nzuá 18:12-40.

    Sumbala Phetele uakexile ni uôma ua athu mu kithangana kieniókio, ihi idikisa kuma muéne ua kituka poxolo iambote? (Nzuá 18:25-27; 1 Kol. 4:2; 1 Phe. 3:14, 15; 5:8, 9)

  • Tanga Nzuá 19:1-30.

    Kiebhi kiedikisa Jezú kuma uakexile ni ukexilu uambote ua lungu ni jimbote? (Nzuá 2:1, 2, 9, 10; 19:23, 24; Mat. 6:31, 32; 8:20)

    Kiebhi kiedikisa o izuelelu ia sukina ia Jezú kuma muéne ua zokela o utuminu ua Jihova? (Nzuá 16:33; 19:30; 2 Phe. 3:14; 1 Nzuá 5:4)