NDOKO tu vutuke ku mivu ia bhiti, ande ia Ejidala kuia mu Jeluzaleme. Moledekai ni Estere akua Izalaiele, exile athu onene mu utuminu ua Pélesa. Estere uexile mvuale, mona ua sekulu’ê, Moledekai uexile muthu ua kaiadi mu utuminu. Ndoko tu tale kiebhi ki kia bhitile.

O jitata ja Estere afú kioso muéne kiexile hanji mona-ndenge, Moledekai muéne ua mu sase. Asuuelu sobha ia mbanza ia Pélesa, uexile ni mbonge mu mbanza ia Suzana, Moledekai uexile selevende iê. Kizuua kimoxi o muhatu a sobha Váxiti ka mu belesele, kienhiki o sobha ua soto muhatu uéngi phala ku kala mvuale. Eie uejiia se nanhi o muhatu a mu solo? Ua solo Estere, o kilumba kia uabha.

Diiala ua teme ni Moledekai

Ua mu mona o diiala didi dia luímbi, mu kaxaxi ka athu ala ku mu fukamena? Muéne Hamane. O Diiala dionene mu Pélesa. Hamane ua mesene kuila Moledekai, ua mu mu mona ua xikama bhobha, u mu fukamena ué. Maji Moledekai ka mu fukamena. Muéne uejidile kuma ka tokalele ku fukamena o diiala didi diaiibha. Hamane ua dizangalele kiavulu. Muéne uai mu bhanga kiki.

Hamane ua tatela akua Izalaiele. Muéne uixi, ‘Ene athu aiibha, ka belesele o itumu iê.’ Ene a tokala ku a jibha.’ Asuuelu ka kijidile kuma muhatu’ê Estere mukuá Izalaiele. Kienhiki, uévu Hamane iu ua bhana o kitumu phala ku jibha akua Izalaiele.

Kioso Moledekai kiévu o kitumu kiki, muéne ua tandanganha. Muéne ua tumikisa njimbu kua Estere: ‘Ua tokala u zuela ni sobha phala ku tu bhulula.’ Ku zuela ni sobha sé ku ku ixana kiexile kituxi mu kitumu kia akua Pélesa. Maji Estere uendele sé ku mu ixana. O sobha ua mu sunuina o mbangala iê ia ulu, phala ka mu jibhe. Estere uexana sobha ni Hamane phala kudia kumoxi. Bhenhobho, o sobha uebhula Estere se ihi ia mesene. Estere uambe kuma, ua-nda zuela ngó se muéne ni Hamane a xikana kudia né mu kizuua kia kaiela.

Kienhiki, mu kizuua kieniókio muéne uambela sobha: ‘Eme ni mundu uami a-nda tu jibha.’ O sobha ua dizangala kiavulu. Muéne uebhula, ‘Nanhi ua-nda bhanga kiki?’

‘Estere ua tambuijila. ‘O nguma, o diiala didi diaiibha Hamane!’

Sobha Estere u tatela o diiala

O sobha njinda ia mu kuata. Mu kiki, ua tumina ku jibha Hamane. Kienhiki, o sobha ua bhange Modelekai muthu uonene ua kaiadi mu utuminu. Moledekai ua tumikisa kitumu kiobhe phala akua Izalaiele ku bhângela o mienhu iâ mu kizuua kia mesenene ku a jibha. Mukonda Moledekai diiala dionene, athu avulu a kuatekesa Izalaiele, ene a a bhuluile ku jinguma jâ.

Divulu dia Estere.



Ibhuidisu

  • A nanhi exile Moledekai ni Estere?
  • Mukonda diahi o Sobha Asuuelu ua mesene muhatu uéngi, ni nanhi muéne ua solo?
  • Nanhi uexile Hamane, ni ihi ia mu bhangesa ku dizangala kiavulu?
  • Kitumu kiahi kia bhangele, ni ihi ia bhangele Estere kioso kiévu o njimbu ia Moledekai?
  • Ihi ia bhitile ni Hamane, ni Moledekai?
  • Kiebhi akua Izalaiele a a bhulula ku jinguma jâ?

Ibhuidisu ia mukua

  • Tanga Estere 2:12

    Kiebhi kiedikisa Estere o valolo ia ku kala ni “kutululuka kua muxima”? (Estere 2:15; 1 Phe. 3:1-5)

  • Tanga Estere 4:1

    Kála kia bhangele Estere mu ku zokela o ubhezelu ua kidi, kiebhi ki tua tokala lelu kuidikisa o henda ni kixikinu kua Jihova? (Estere 4:13, 14; Mat. 5:14-16; 24:14)

  • Tanga Estere 7:1

    Kiebhi o mundu ua Nzambi lelu, ene ué mu di bhakula o muenhu kála kia bhitile ni Estere? (Estere 7:4; Mat. 10:16-22; 1 Phe. 2:12)