UÁ UÁ! Tua mu mona kuma Daniiele uala mu ibhidi. Maji o jihoji ki ji mu jibha! Mukonda diahi? Nanhi ua takula Daniiele ku jihoji joso jiji? Ndoko tu tale.

O sobha ia Babilonha, uexile o diiala a mu ixanene Ndala. Muéne ua zolele kiavulu Daniiele, mukonda Daniiele uexile muthu uambote ni njimu. Ndala ua solo Daniiele phala ku kala nguvulu mu utuminu. Maiala a kamúkua mu utuminu akexile ni luímbi lua Daniiele, ene a bhange kiki.

Ndala

Ene ai katé kua Ndala, ni exi: ‘Sobha, tua mesena kuma, ua tokala ku bhana kitumu ki zuela kuma, ki bhu kala muthu u bheza nzambi iéngi, kala eie ngó U sobha, mu 30 a izuua. Uoso ka belesele, a tokala ku mu takula mu dikungu dia jihoji.’ Maji, Ndala kejidile mukonda diahi o maiala iê, a mesenene o kitumu kiki. Muéne ua banzele kuma iexile ndunge iambote, iu ua tumina ku i soneka. Mu kienhiki, keji tena dingi ku i lungulula.

Kioso Daniiele kia kívu, uai kubhata iu ua sambe kála kiexile mu bhanga kiá. O athu aiibha a kijidile kuma Daniiele ka-nda kueha ku samba kua Jihova. Ene a sangulukile mukonda o ndunge iâ, ia ku jibha Daniiele ia tundile kiambote.

Kioso o Sobha Ndala kiévu ioso ia-ndalele ku bhanga athu ni kitumu kiê, muéne ua luualele kiavulu. Maji ka tenene ku lungulula dingi o kitumu, kienhiki muéne ua tumina ku takula Daniiele mu dikungu dia jihoji. Maji o sobha uambela Daniiele: ‘Nga kinga kuma o Nzambi iê, i ua sidivila a ku bhulule.’

Mukonda dia kiki, Ndala ka tenene ku zeka usuku uoso. Mu kamene, muéne uai ni lusolo mu tala mu dikungu dia jihoji. U tena ku mu mona bhabha. Muéne ua dikola: ‘Daniiele selevende ia Nzambi ia muenhu! Nzambi iê i ua mu sidivila u tena ku ku bhulula ku jihoji?’

Daniiele mu dikungu dia jihoji

Daniiele ua tambuijila, ‘Nzambi ua tumikisa o anju iê, iu ua jika o makanu ma jihoji, phala ki ji ngi jibhe.’

O sobha ua sanguluka kiavulu. Muéne ua tumina ku katula Daniiele mu dikungu. Kienhiki, muéne ua tumu athu aiibha, a mesenene ku jibha Daniiele ku a takula ku jihoji. Ande dia ku tula mu dikungu, o jihoji ja akambuidila ia a jibha.

Kienhiki, o sobha Ndala ua sonekena ku athu oso mu utuminu uê: ‘Eme ngi tumina kuma en’oso, a kale ni kijingu kua Nzambi ia Daniiele. Muéne u bhanga madiuanu onene. Muéne ua bhulula Daniiele phala ka mudiê ku jihoji.’

Daniiele 6:1-28.



Ibhuidisu

  • Nanhi uexile Ndala, ni ihi ia banzele ia lungu ni Daniiele?
  • Ihi o maiala a luímbi a fuinhisa Ndala ku bhanga?
  • Ihi ia bhangele Daniiele kioso kiévu kia lungu ni kitumu kiobhe?
  • Mukonda diahi Ndala ua thandanganhele kiavulu sé ku tena kuzeka, ni ihi muéne ia bhangele mu kimene kia mukuá?
  • Kiebhi kia tambuijila Daniiele kua Ndala?
  • Ihi ia bhitile ni athu aiibha a fikisa ku jibha Daniiele, ni ihi ia soneka Ndala phala athu oso mu utuminu uê?

Ibhuidisu ia mukua

  • Tanga Daniiele 6:1-28.

    Kiebhi o kikutu kia bhangele kua Daniiele ki tu lembalala ioso iene mu bhanga o jinguma phala ku fidisa o kikalakalu kia Jimbangi ja Jihova lelu? (Dan. 6:7; Jisá. 94:20; Iza. 10:1; Lom. 8:31)

    Kiebhi o jiselevende ja Nzambi lelu, a kaiela o phangu ia Daniiele, mu ku kolokota mu belesela “o maungana”? (Dan. 6:5, 10; Lom. 13:1; Ikalakalu 5:29)

    Kiebhi tu tena ku kaiela o phangu ia Daniiele mu sidivila Jihova mu “ithangana ioso”? (Dan. 6:16, 20; Fil. 3:16; Dij. 7:15)