IU KI mona ua uabha? Dijina diê Samuuele. O diiala dia mu kuata ku mutué, Eli, mukunji ua Izalaiele. Enhá ala nê, tata ni mama a Samuuele, Elikana ni Hana a bhekele Samuuele kua Eli.

Samuuele u disanga ni mukunji Eli

Samuuele uakexile ngó ni mivu iuana mba itanu. Maji muéne ueji kala mu balaka ia Jihova, ni Eli ni akunji a mukuá. Mukonda diahi Elikana ni Hana a bhele Samuuele, o mona-ndenge phala ku sidivila Jihova mu balaka? Ndoko tu tale.

Mivu ku dima, Hana ua luualele kiavulu. Mukonda muéne ka kexile ni mona, iu ua-ndalele kiavulu ku kala ni mona. Kizuua kimoxi kioso Hana kiai mu balaka ia Jihova, muéne ua sambe: ‘Jihova-tata, kana ku ngi jimba! Se u ngi bhana kamona, ngi ku kanena ku u bhana nê, phala u ku sidivila katé ku hádia.’

Jihova ua tambuijila o musambu ua Hana, kia bhiti ji mbeji, Hana ua vuala Samuuele. Hana ua zolele o kamona kê, iu uakexile ku mu longa maka alungu ni Jihova kioso kiexile hanji mona- ndenge. Muéne uambela muadi uê: ‘Kioso Samuuele kia-nda kula, ni kia-nda sumuka, nga-nda mu ambata mu balaka phala ku sidivila Jihova.’

Kiene kia bhangele Hana ni Elikana, kala ki tua mu mona mu fikula. Mukonda Samuuele a mu longo kiambote ku jitata jê, muéne ua sangulukile mu ku sidivila mu balaka ia Jihova. Kala muvu, Hana ni Elikana akexile múia mu bheza mu balaka ia iuka, ni ku menekena o kamona kâ. Kala muvu, Hana uakexile mu bheka mbinza iobhe phala Samuuele.

Kua bhiti mivu ni mivu Samuuele ua kolokotele mu ku sidivila Jihova, mu balaka ia Jihova, o mundu ua mu zolele kiavulu. Maji o an’â mukunji Eli, Hofini ni Finehese exile athu aiibha. Ene akexile mu bhanga ima iaiibha, ia akexile mu bhangesa akua ku bhukumukina Jihova. Eli ua tokalele ku a katula ku ukunji, maji muéne ka ki bhangele.

O muzangala Samuuele kehele kuila o ima iaiibha ia kexile mu bhanga mu balaka i mu fidisa ku kolokota mu ku sidivila Jihova. Maji kuexile athu avulu ka zolele Jihova, kua bhitile kia thembu tundé Jihova kia zuelele ni muthu. Kioso Samuuele kia kulu kia bhitile kiki:

Samuuele uakexile mu zeka mu balaka, kioso kia mu balumuna ku dízui. Muéne ua tambuijila: ‘Ngala bhobha.’ Muéne ua balumuka, iu ua lengela kua Eli, uambe: ‘Eie ua ngi xana, ngala bhobha.’

Maji Eli ua tambuijila: ‘Eme ki nga ku ixana’mi; vutuka ni u zeke. Kienhiki, Samuuele ua vutuka ku hama.

O dízui-phe dia xana mu luiadi: ‘Samuuele!’ Inga Samuuele u balumuka iu ua lengela kua Eli. Muéne uambe, ‘Eie ua ngi xana, eme ngala bhobha.’ Maji Eli ua tambuijila: ‘Eme ki nga ku ixana’mi, mona’mi. Ndé ka zeke dingi.’ Samuuele ua vutuka ku hama.

‘Samuuele!’ o dízui diexana mu lutatu. Samuuele ua lengela kua Eli. Muéne uambe, ‘Ngala bhobha o veji íii ua ngi xana.’ Kienhiki, Eli ua kijidile kuma Jihova uakexile ku mu ixana. O kiki-phe muéne uambela Samuuele: ‘Ndé ka zeke dingi, se muéne u ku ixana dingi lua mukuá, u mu ambela: “Zuela Jihova, selevende iê iu uivua.”’

Kiene kia zuela Samuuele kioso Jihova kia mu ixana dingi. Jihova ua tangela Samuuele kuma ua-nda kaxtikala Eli, ni an’ê. Kienhiki, Ofini ni Finehese afú mu ita, mu ku bhânga ni akua Fidíxia, kioso Eli kíevu ioso ia bhiti, muéne ua lunduka, ku kialu iu ua toloka o xingu iu uafú ué. Kienhiki, o dízui dia Jihova dia di kumbidila.

Samuuele ua kulu, iu uexile o mufundixi ua sukina mu Izalaiele. Kioso kia kuka o mundu ua mu bhingi: ‘Sola o sobha phala ku tumina mu kaxa k’etu.’ Samuuele ka-ndalele ku bhanga kiki, mukonda mu kidi Jihova muene uexile o sobha iâ. Maji Jihova ua mu ambela kuívua o mundu.

1 Samuuel 1:1-28; 2:11-36; 4:16-18; 8:4-9.



Ibhuidisu

  • Diebhi o dijina dia mona mu fikula, a mukuá a nanhi?
  • Kizuua kimoxi, ihi ia bhingi Hana ku musambu kioso kiendele mu kunda o balaka ia Jihova, ni kiebhi kia mu tambuijila Jihova?
  • Mivu ikuxi ia kexile na-iu Samuuele kiai mu sidivila mu balaka ia Jihova, ni ihi ia kexile ku mu bhangela manh’â mivu ioso?
  • Kiebhi kiexanene an’a Eli, ni exile maiala a kífua kiahi?
  • Kiebhi Jihova kiexanene Samuuele, ni njimbu iahi Muéne ia mu bhele?
  • Ihi ia bhange Samuuele kioso kia kulu, ni ihi ia bhitile kioso kia kuka?

Ibhuidisu ia mukua

  • Tanga 1 Samuuele 1:1-28.

    Phangu iahi iambote ia xisa Elikana ku jitata ia lungu ni ku tuamena ku ubhezelu ua kidi? (1 Sam. 1:3, 21; Mat. 6:33; Fil. 1:10)

    Disá diahi dia tu longo Hana kia kexile ni maka a bhonzele ku a batula? (1 Sam. 1:10, 11; Jisa. 55:22; Lom. 12:12)

  • Tanga 1 Samuuele 2:11-36.

    Mukonda diahi tu zuela kuma Eli uabhele dingi kijingu kua an’ê, kua Jihova ndenge, ni kiebhi íii i sidivila phala ku tu dimuna lelu? (1 Sam. 2:22-24, 27, 29; Mate. 21:18-21; Mat. 10:36, 37)

  • Tanga 1 Samuuele 4:16-18.

    Njimbu iahi ia tundu ku ita ia tange o malamba auana, ni kiebhi kia divu Eli?

  • Tanga 1 Samuuele 8:4-9.

    Ihi ia bhange akua Izalaiele ia xingi Jihova, ni kiebhi tu tena kuidikisa kuila tua mesena o Utuminu uê lelu? (1 Sam. 8:5, 7; Nzuá 17:16; Tii. 4:4)