Ku bokona mu madisá

Ku bokona mu madisá

Musoso 53: O Kikanenu Kia Jefete

Musoso 53: O Kikanenu Kia Jefete
Mon’a Jefete

UA KANENE kia kima, kia ku bhonzele ku ki kumbidila? Kiki kia bhitile ni diiala didi di ua mu mona mu fikula, mukonda dia kiki, muéne ua luuala. O diiala mufundixi ua suína mukuá Izalaiele, a mu ixana Jefete.

Jefete ua tungile mu thembu kioso akua Izalaiele ka kexile dingi mu bheza Jihova. Ene akexile mu bhanga dingi ima iaiibha. Kienhiki, Jihova uehela o mundu ua Amone, ku a talesa hadi. Kienhiki, akua Izalaiele a dikola kua Jihova: ‘Tua te kituxi. Tua ku dióndo, tu bhulule!’

Jefete ni maiala mê

O mundu ua diela o ima iaiibha ia kexile mu bhanga. Ene edikisa kuma a diela, ni a mesene dingi kubheza Jihova. Kienhiki, Jihova ua a kuatekesa.

O mundu ua solo Jefete phala ku bhânga ni akua Amone exile athu aiibha. Jefete ua mesene kiavulu kuila Jihova u mu kuatekesa mu ita. Kienhiki, muéne ua kanena kua Jihova: ‘Sé u ngi kuatekesa ku nganhala akua Amone, o muthu ua dianga ua-nda tunda mu inzo iami kuíza mu di sanga ni eme, kioso ki nga-nda vutuka ku ita, eme nga-nda ku bhana nê.’

Jihova uévu o kikanenu kia Jefete, iu ua mu bhana o kikoué. Kioso Jefete kia vutuka kubhata, uejiia se nanhi ua dianga ku tunda m’onzo iê, mu kuíza ku disanga ni Jefete? O mon’ê umoxi-élele. ‘Uá, mon’amié! Jefete ua dikola. Ua ngi luualesa. Maji nga kanena kiá kua Jihova, ki ngi tena ku vutuka ku dima.’

Kioso mon’a Jefete kiévu ia lungu ni kikanenu kiki, muéne ua luualele ué. Mukonda ueji xisa tat’ê ni makamba mê. Maji muéne ua mesene ué ku bhita o muenhu uê uoso mu ku sidivila Jihova mu balaka ku Silu. Muéne uambela tat’ê: ‘Se ua bhange kikanenu kua Jihova, kala u ki kumbidila.’

Kienhiki, o mon’a Jefete uai ku Silu, kuene kua kexile mu sidivila Jihova mu balaka iê. O kiki-phe ahatu akua Izalaiele izuua iuana ku muvu, akexile kuia ku mu menekena, ene a bhitile kumoxi ithangana ni ku sanguluka. O mundu ua zolele mon’a Jefete, mukonda muéne uexile mu sidivila kiambote Jihova.

Afundixi 10:6-18; 11:1-40.



Ibhuidisu

  • Nanhi uexile Jefete, ni ua tungile thembu kuxi?
  • Kikanenu kiahi kia bhangele Jefete kua Jihova?
  • Mukonda diahi Jefete ua luualele kioso kia tundu ku ita mu bhânga ni akua Amone?
  • Ihi ia zuela o mon’a Jefete kioso kiévu o kikanenu kia bhangele tat’ê?
  • Mukonda diahi athu a zolele o mon’a Jefete?

Ibhuidisu ia mukua

  • Tanga Afundixi 10:6-18.

    Ku dimuka kuahi ku tua tokala ku kaiela, kioso ki tu dilonga kia lungu ni ku kamba o kixikinu kia Izalaiele kua Jihova? (Afun. 10:6, 15, 16; Lom. 15:4; Dij. 2:10)

  • Tanga Afundixi 11:1-11, 29-40.

    Kiebhi tuejiia kuma, kioso kia bhana Jefete o mon’ê kála sata, ka mu bhanene kála sata ia kuoha mu túbhia? (Afun. 11:31; Iji. 16:24; Mate. 18:10, 12)

    Kiebhi-phe kia bhana Jefete o mon’ê kála sata?

    Ihi i tua dilongo ni ukexilu ua Jefete ua lungu ni kikanenu kiê kua Jihova? (Afun. 11:35, 39; Ndo. 5:4, 5; Mat. 16:24)

    Kiebhi o mona a Jefete ua xisa phangu iambote phala o mizangala ia Jikidistá ja lelu, a mesena ku bokona mu sidivisu ia thembu ioso? (Afun. 11:36; Mat. 6:33; Fil. 3:8)