Ku bokona mu madisá

Ku bokona mu madisá

Musoso 52: Ngidiione ni 300 ja Maiala

Musoso 52: Ngidiione ni 300 ja Maiala

UA MU mona ia mu bhita bhabha? En’oso masoladi akua Izalaiele. O maiala a bhetama, a mu nuá. O Mufundixi uemana bhu mbandu iâ, Ngidiione. Muéne ua mu mona kiebhi ene kia mu nuá o menha.

Tala kiambote kiebhi o maiala kia mu nuá o menha. A kamúkua a mu nuá ni pholo bhoxi. Maji ua mukuá ua mu katula o menha ni maku mê, phala ku tena ku mona ioso ia mu bhita bhu mbandu. Kiki kiambote, mukonda Jihova uambela Ngidiione phala ku sola maiala a kala mu tonginina mu kunuá. Nzambi uixi: A subhuka ua a tumikisa kubhata. Ndoko tu tale mukonda diahi.

Akua Izalaiele akexile dingi ni ibhidi. Mukonda ene ka belesela Jihova. Mundu ua Midiiana a a bhangele abhika ni a kuamene. Kienhiki, Izalaiele a dikola kua Jihova phala ku a kuatekesa, Jihova uévu o ku dikola kuâ.

Jihova uambela Ngidiione phala ku uongeka o masoladi, kienhiki Ngidiione uongeka 32.000 a masoladi. Maji kua kexile 135.000 a midi ia masoladi phala ku bhânga ni akua Izalaiele. Jihova uambela Ngibiione: ‘Eie uala ni maiala avulu.’ Mukonda diahi Jihova uambe kiki?

Mukonda se akua Izalaiele a nganhalele o ita eji banza kuma ene a nganhala o ita mu nguzu iâ. Ene eji banza kuila, ki ku bhingile o kikuatekesu kia Jihova. Kienhiki, Jihova uixi kua Ngidiione: ‘Uambela o maiala oso ala ni uôma a vutuke kubhata.’ Kioso Ngidiione kia bhange kiki, 22.000 a masoladi a vutuka kubhata. Ua subhuka ngó ni 10.000 ia maiala phala ku bhânga ni 135.000 kia masoladi.

Ngidiione ua mu polovala o maiala mê

Maji, ivua! Jihova uixi: ‘Eie uala hanji ni maiala avulu.’ Kienhiki, muéne uambe kua Ngidiione phala ku tumina maiala kunuá mu ka ngiji, uoso ua mu nuá ni pholo bhoxi u mu vutukisa kubhata. Jihova ua kanena, ‘Nga-nda ku bhana o kikoué ni 300 ja maiala a nuine ni ku tonginina.’

Kua bhixila o thembu ia ku bhânga. Ngidiione ua uane o 300 ja maiala mu ibuka itatu. Muéne ua bhana kala diiala ngela imoxi, ni mudingi muala dikongolo dia túbhia. Mu kaxaxi ka usuku, en’oso a diongeka, ni ia kondolokele o kilombo kia jinguma ja masoladi. Mu kithangana kieniókio, en’oso a xiki o jingela ja ni a bulu o midingi iâ, ni a dikola: ‘O xibhata ia Jihova ni ia Ngidiione!’ Kioso o jinguma ja masoladi kia balumuka, ene a sasumukine ia kexile ni uôma. En’oso a mateka ku lenga, akua Izalaiele a nganhala o ita.

Afundixi kibatulu 6 ni 8.



Ibhuidisu

  • Mukonda diahi akua Izalaiele ala mu ibhidi?
  • Mukonda diahi Jihova uambela Ngidiione kuma muéne uala ni maiala avulu mu kifuxi kiê kia masoladi?
  • Maiala akuxi a subhuka kioso Ngidiione kia tumina o maiala akexile ni uôma ku vutuka kubhata?
  • Tonginina kiambote o fikula, ihi ia bhangele Jihova phala ku sosolola o masoladi a Ngidiione, ni bhu xale ngó 300 ja maiala?
  • Kiebhi kia longo Ngidiione o 300 ja maiala mê, ni kiebhi akua Izalaiele kia nganhala o ita?

Ibhuidisu ia mukua

  • Tanga Afundixi 6:36-40.

    Ihi ia bhange Ngidiione phala kuijiia iebhi o vondadi ia Jihova?

    Lelu, kiebhi ki tu tena kuijiia o vondadi ia Jihova? (Jisá. 2:3-6; Mat. 7:7-11; 2 Tim. 3:16, 17)

  • Tanga Afundixi 7:1-25.

    Disá diahi di tu dilonga ku 300 ja maiala a dimukine, ni ió a landukile? (Afun. 7:3, 6; Lom. 13:11, 12; Efe. 5:15-17)

    Kála kia dilongo o 300 ja maiala mu ku tala Ngidiione, kiebhi tu dilonga mu ku tala o Ngidiione ia Dikota, Jezú Kristu? (Afun. 7:17; Mat. 11:29, 30; 28:19, 20; 1 Phe. 2:21)

    Kiebhi o divulu dia Afundixi 7:21, di tu kuatekesa mu ku sanguluka mu ku sidivila kuoso-kuoso kua tu tumina mu kilunga kia Jihova? (1 Kol. 4:2; 12:14-18; Tii. 4:10)

  • Tanga Afundixi 8:1-3.

    Kioso ki bhu kala maka mu kaxaxi ka jiphange, kiebhi kia tu longo Ngidiione mu ku batula o maka ni akua Ifraime? (Jisa. 15:1; Mat. 5:23, 24; Luka 9:48)