Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 51: Lute ni Nouemi

Musoso 51: Lute ni Nouemi

MU Bibidia muala o divulu a dixana Lute. Uene o musoso ua muiji ua tungile mu thembu, ia kexile afundixi mu Izalaiele. Lute uexile kilumba kia ixi ia Mouabhe; muéne ka tokalele ku mundu ua Nzambi, Izalaiele. Maji kioso Lute kia dilongo maka alungu ni Nzambi ia kidi, Jihova, muéne ua mu zolele kiavulu. Nouemi uexile kiá muadiakimi, muéne ua kuatekesa Lute kuijiia maka alungu ni Jihova.

Nouemi uexile mukuá Izalaiele. Muéne, ni muadi uê, ni an’ê kiiadi, endele mu tunga mu ixi ia Mouabhe, kioso ki kua kexile nzala mu Izalaiele. Muadi ua Nouemi uafú. Anga, an’a kiiadi kia Nouemi a kazala ni ilumba ia Mouabhe, a exana Lute ni Olofa. Maji, kioso kia bhiti 10 dia mivu, an’a kiiadi kia Nouemi afú. Nouemi ni ilumba iiadi a luualele! Ihi ieji bhanga Nouemi?

Saí kizuua, Nouemi ua mesene ku vutuka ku jindandu jê. Kienhiki, Lute ni Olofa a mesene ku kala nê, kienhiki-phe a mu xinjikila. Anga mu suluka mu njila, Nouemi uambela o ilumba : ‘Vutukenu, kubhata dia mam’enu.’

Nouemi ua bejala o ilumba, iu ua a xalesa. Kienhiki, kiiadi kiá a mateka o kudila, mukonda ene a zolele kiavulu Nouemi. Exi: ‘Kana! Tua-ndala kuia ni eie ku jindandu jê.’ Maji, Nouemi ua tambuijila: ‘An’ami, mua tokala mu vutuka. Kia beta-kota se mu xala kubhata.’ Kiki-phe, Olofa ua vutuka kubhata. Maji, Lute ka vutuka.

Nouemi ua mu ambela: ‘Olofa ua vutuka. Eie ué, vutuka ni muéne.’ Maji, Lute ua tambuijila: ‘Kana ku ngi bhomba phala ku ku xa! Ngehele kuia ni eie. Kuoso kuia, eme ué ngia, kuoso ku ua tungila, kuene ku nga tungila uami. Mundu uê, ua-nda kala mundu uami, Nzambi iê, ia-nda kala Nzambi iami. Kuoso ku u fuila, eme uami kuene ku ngi fuila, kuenhoko a-nda ngi funda.’ Lute kiambe kiki, Nouemi ka mu bhingi dingi ku vutuka kubhata.

Mu kusukáko ene kiiadi kiâ a bhixila mu Izalaiele. Kuene kua tungile. Lute uai mu kalakala mu mábhia, mukonda iexile thembu ia ku bhongolola o masa. O diiala a mu ixana Bouaji ua mu ehela ku bhongolola o masa mu díbhia diê. Uejiia se nanhi uexile manh’â Bouaji? Uexile Lahaba mukuá mbanza ia Jedikó.

Kizuua kimoxi, Bouaji uambela Lute: ‘Ngevu ioso ia lungu ni eie, ni mbote ioso iu ua bhangele kua Nouemi. Ngejiia kuma ua xisa tat’enu, ni mam’enu, ni ixi iê, eie uéza mu tunga kumoxi ni mundu ku uijidile. Jihova ua-nda ku futé!’

Lute ua tambuijila: ‘Eie u diiala dia mbote, ngana. Eie ua ngi sangulukisa kiavulu, mukonda ua ngi zuelela ni henda.’ Bouaji ua zolele kiavulu Lute, ka nangena ene a kazala. Kiki kia sangulukisa Nouemi! Maji, Nouemi ua betele dingi kota mu sanguluka, kioso Lute ni Bouaji kia vuala o mona ua dianga, a mu luku Obede. Obede uexile kuku ia Davidi, kála ki tua-nda dilonga dingi ku pholo.

Lute ni Nouemi

Divulu dia Lute.



Ibhuidisu

  • Mukonda diahi Nouemi uai ku ixi ia Mouabhe?
  • A nanhi exile Lute ni Olofa?
  • Kiebhi kia tambuijila Lute ni Olofa kioso Nouemi kia ambela phala ku vutuka ku jindandu jâ?
  • Nanhi uexile Bouaji, ni kiebhi kia kuatekesa Lute ni Nouemi?
  • Kiebhi kiexanene o mon’a Bouaji ni Lute, ni mukonda diahi tua tokala ku mu lembalala?

Ibhuidisu ia mukua

  • Tanga Lute 1:1-17.

    Ihi ia zuela Lute iedikisa o kuzola kua kidi? (Lute 1:16, 17)

    Kiebhi o ukexilu ua Lute, uedikisa kiambote o ukexilu ua “jimbudi ja kamúkua” ua lungu ni iâ a undu, ala hanji mu ixi? (Nzuá 10:16; Zak. 8:23)

  • Tanga Lute 2:1-23.

    Kiebhi o ia bhange Lute phangu iambote phala o ilumba ia lelu? (Lute 2:17, 18; Jisa. 23:22; 31:15)

  • Tanga Lute 3:5-13.

    Kiebhi Bouaji kia mono o ukexilu ua Lute, ua ku kazala nê, mu veji ia diiala dia muzangala?

    Ihi i tu longa o ukexilu ua Lute ua lungu ni kuzola kua kidi? (Lute 3:10; 1 Kol. 13:4, 5)

  • Tanga Lute 4:7-17.

    Kiebhi kia tena o maiala a Jikidistá lelu ku kála kala Bouaji? (Lute 4:9, 10; 1 Tim. 3:1, 12, 13; 5:8)