MBANZA javulu ja Kanana a diongeka phala ku bhânga ni akua Izalaiele. Ene a banzele kuila, eji nganhala. Maji, o mundu ua mbanza ia Ngibiione ka banzele kieniókio. Ene a xikinine kuila Nzambi ua mu kuatekesa akua Izalaiele, ene ka-ndalele ku bhânga ni Nzambi. Eie uejiia ihi ia bhangele akua Ngibiione?

Ene a tangele makutu, ambe kuma akua dikanga. Saí maiala a zuata izuatu ia tandujuka ni jisabhatu jakuka. Ene a longela o jibulu jâ ni jisaku ja tandujuka, ni jimbolo j’okulu, ja kukuta. Kienhiki, ai katé kua Josuué, ni ambe: ‘Tua mu tunda dikanga, tuevu ioso ia lungu ni Nzambi ienu ionene, Jihova. Tuevu o madiuanu oso a mi bhangela mu Ijitu. Kienhiki, atuameni etu a tu tumina kuambata kúdia phala o njila, ni kuíza mu zuela ni enu: “Etu tu kala kiá jiselevende jenu. Tenu -phe kiá kikutu ni etu.” Mua mono kuila o izuatu ietu ia kuka mu njila, ni mbolo ietu ia kukuta.’

Josuué ni atuameni a mukuá a fikile kuma kidi kia a tangela akua Ngibiione. Kienhiki, ene a kanena kuma ka-nda bhânga nâ. Kia bhiti izuua itatu, ene evu kuma akua Ngibiione ki akua dikanga kana, a tungile bhua zukama.

Josuué uebhula. ‘Mukonda diahi mua tu tangela makutu, kuila mua akua ixi ia dikanga?’

Akua Ngibiione a tambuijila: ‘Tua bhange kiki mukonda tuejiia kuila Nzambi ienu Jihova ua mi kanena ku mi bhana o ixi ioso ia Kanana. Kienhiki-phe, tua kexile ni uôma, ua ku tu jibha.’ Maji akua Izalaiele a kumbidila o kikanenu kiá, inga ene ka jibha akua Ngibiione. Ene a a bhange abhika

O sobha ia Jeluzaleme ua dizangalele mukonda akua Ngibiione a bhangele paze ni Izalaiele. Muéne uambela o jisobha jiuana: ‘Zenu mu ngi kuatekese mu bhânga ni akua Ngibiione,’ Kiki kiene kia bhange o jisobha jitanu. O kuila akua Ngibiione a dimukine mu ku bhanga paze ni akua Izalaiele, kioso kiejile o jisobha mu bhânga nâ? Tua-nda mona.

Josuué 9:1-27; 10:1-5.

Josuué ni akua Ngibiione


Ibhuidisu

  • Kiebhi o mundu ua Ngibiione ka difuile ni akua Kanana ni jimbanza ja zukamene?
  • Kála kiedikisa o fikula, ihi ia mu bhanga akua Ngibiione, ni mukonda diahi?
  • Ihi ia kanena Josuué ni atuameni a Izalaiele ku akua Ngibiione, maji mu ku bhita izuua itatu, ihi ia tungununa?
  • Ihi ia bhitile kioso o jisobha ja jimbanza ja mukuá evu kuma Ngibiione a bhange paze ni akua Izalaiele?

Ibhuidisu ia mukua

  • Tanga Josuué 9:1-27.

    Tundé kia bhanene Jihova o ilongesu ku diembu dia akua Izalaiele phala ku buika athu oso mu ixi, ukexilu uahi uedikisa mu ku loloka akua Ngibiione? (Josu. 9:22, 24; Mat. 9:13; Ikalakalu 10:34, 35; 2 Phe. 3:9)

    Mu ku kumbidila o kikutu kiê, kia bhangele ni Ngibiione, kiebhi Josuué ua xisa phangu iambote phala o Jikidistá ja lelu? (Josu. 9:18, 19; Mat. 5:37; Efe. 4:25)

  • Tanga Josuué 10:1-5.

    Kiebhi o mundu ua dikota lelu, u kaiela akua Ngibiione, kienhiki ene a kituka jinguma ja nanhi? (Josu. 10:4; Zak. 8:23; Mat. 25:35-40; Dij. 12:17)