Ku bokona mu madisá

Ku bokona mu madisá

Musoso 47: O Muii mu Izalaiele

Musoso 47: O Muii mu Izalaiele
Akane ua mu sueka o imbamba ia nhana

TALA ihi ia mu funda o diiala didi mu balaka iê! O kapote kauabha, ni ulu, ni kitadi kia phalata. Muéne ua i katula mu mbanza ia Jedikó. Maji ihi ia tokalele ku bhanga ni ima ia Jedikó? Eie ua lembalala?

Ene a tokalele ku i buika, o ulu ni phalata ia tokalele ku iambata mu balaka ia Jihova. Athu iâ, a xibhakele Nzambi. Ene a nhana ima ia tokalele kua Nzambi. O dijina dia diiala, Akane, iâ ala nê o muiji uê. Ndoko tu tale ihi ia bhiti.

Kioso Akane kia nhana o ima ienii, Josuué ua tumikisa maiala ku bhânga ni mbanza ia Hai. Maji ene ka nganhala o ita. A kamúkua afú, o a subhuka a lenge. Josuué ua luualele kiavulu. Muéne ua fukama iu ua sambe kua Jihova: ‘Mukonda diahi uehela ima íii ku bhita n’etu?’

Jihova ua tambuijila: ‘Balumuka! Izalaiele ua te kituxi. Ene a katula o ima ia tokalele ku i buika mba ku i bhana mu balaka ia Jihova. Ene a nhana o kapote kauabha ni a ka sueka. Ki nga-nda mi zediuisa katé ki mu buika ió ua katula o imbamba ienii.’ Jihova uambe kuma ua-nda idikisa kua Josuué o muthu uaiibha.

Josuué uongeka o mundu uoso, kienhiki Jihova uedikisa o muii, Akane. Akane uambe: ‘Nga te kituxi. Eme nga mono o kapote kauabha ni ulu ni kitadi kia phalata. Eme nga ia-ndalele kiavulu katé ki nga i katula. Nga i fundu mu balaka iami.’

Kioso kia sange o imbamba íii, a iambata kua Josuué, muéne uebhula Akane: ‘Mukonda diahi ua tu bhekela ibhidi? Kienhiki, Jihova ua-nda ku bhekela ué ibhidi!’ Kienhiki-phe, mundu uoso ua takula matadi kua Akane, ni muiji uê katé kiafú. Kiki, ki ki tu longo kuma ki tua tokala ku katula kima kia ngene?

Izalaiele endele dingi mu bhânga ni Hai. Mu veji íii Jihova ua kuatekesa o mundu uê, ni a nganhala o ita.

Josuué 7:1-26; 8:1-29.



Ibhuidisu

  • Mu fikula, nanhi o diiala dia mu funda o imbamba iambote io katule mu Jedikó, ni a nanhi ala ku mu kuatekesa?
  • Mukonda diahi o ia bhangele Akane, ni muiji uê, kiexile kituxi?
  • Ihi ia tambuijila Jihova kioso Josuué kia mu ibhula se mukonda diahi akua Izalaiele ka nganhala o ita kioso kia bhânge ni akua Hai?
  • Ihi ia bhitile ni Akane ni muiji uê, kioso kia ambatele kua Josuué?
  • Disá diahi dia beta-kota ku tu longa dia ufundisu ua Akane?

Ibhuidisu ia mukua

  • Tanga Josuué 7:1-26.

    Ihi idikisa o musambu ua Josuué ua lungu ni ukamba uakexile nau ni Mubhangi uê? (Josu. 7:7-9; Jisá. 119:145; 1 Nzuá 5:14)

    Ihi idikisa o phangu ia Akane, ni kiebhi íii i sidivila phala ku tu dimuna? (Josu. 7:11, 14, 15; Jisa. 15:3; 1 Tim. 5:24; Jih. 4:13)

  • Tanga Josuué 8:1-29.

    Kikalakalu kiahi ki tuala na-kiu kala muthu mu kilunga kia Jikidistá lelu? (Josu. 7:13; Iji. 5:1; Jisa. 28:13)