Ku bokona mu madisá

Ku bokona mu madisá

Musoso 42: O Bulu Izuela

Musoso 42: O Bulu Izuela

UA KIVUILE kiá kuila o bulu izuela? ‘Kana.’ ‘O iama ki izuela.’ Maji o Bibidia i tu tangela kuma saí bulu ia zuela. Ndoko tu tale kiebhi kia bhiti.

Anju

Akua Izalaiele a zukama kia, phala ku bokona mu ixi ia Kanana. Balake, sobha ia Mouabhe uakexile ni uôma ua akua Izalaiele. Kienhiki, muéne ua tumina ku ixana muthu ua dimuka a mu ixana Balamu phala ku bhubhidila akua Izalaiele. Balake ua kanena kitadi kiavulu kua Balamu, kienhiki, Balamu ua habe ku bulu iê, iu uai mu disanga ni Balake.

Jihova ka mesene kuila Balamu u bhubhidila o mundu Uê. Kiki-phe, muéne ua tumikisa anju ni xibhata phala ku fidisa Balamu mu njila. Balamu ka tenene ku mona o anju, maji o bulu iê ia tenene ku i mona. Kienhiki, o bulu ia mesene ku lenga o anju, mu kusukáko ia zeka bhoxi. Balamu ua dizangala kiavulu iu ua beta ku bulu ni mbangala.

Jihova ua bhangesa Balamu kuívua o bulu iê ku zuela. O bulu ia mu ibhula, ‘Ihi i nga ku bhange phala ku ngi beta?’

Balamu ku thandu ia bulu

Balamu uambe, ‘Eie ua ngi tobhesa.’ ‘Sé nga kexile ni xibhata ngeji ku Jibha!’

O bulu iebhula ‘Nga ki bhangele kiá?’

‘Kana,’ Balamu ua tambuijila.

Mbe, Jihova uehela Balamu ku mona o anju iemana ni xibhata mu njila. O anju iambe: ‘Mukonda diahi ua mu beta o bulu iê? Eme ngeza mu ku fidisa o njila iê, mukonda ku tokala kuia mu bhubhidila akua Izalaiele. Se o bulu iê ki ia ngi lengele, Eme hinu ngeji ku jibhe kiá, sé ku kuama o bulu iê.’

Balamu anga u zuela uixi: ‘Nga te kituxi. Eme ki nga kijidile kuila eie uala mu njila.’ O anju iehela Balamu kuia inga Balamu uia mu disanga ni Balake. Muéne ua fikisa hanji ku bhubhidila akua Izalaiele, maji mu veji dia kiki, Jihova ua mu tumu ku zediuisa akua Izalaiele mu veji jitatu dingi.

Dialuilu 21:21-35; 22:1-40; 23:1-30; 24:1-25.



Ibhuidisu

  • Nanhi uexile Balake, ni mukonda diahi muéne uexana Balamu?
  • Mukonda diahi o bulu ia Balamu ia zeka bhoxi?
  • Ihi iévu Balamu o bulu ku zuela?
  • Ihi ia zuela o anju kua Balamu?
  • Ihi ia bhitile kioso Balamu kia fikisa ku ta mázui ku akua Izalaiele?

Ibhuidisu ia mukua

  • Tanga Dialuilu 21:21-35

    Mukonda diahi akua Izalaiele a nganhala o Sobha Sihone ia akua Amone ni Sobha Hoke ia akua Basane? (Dia. 21:21, 23, 33, 34)

  • Tanga Dialuilu 22:1-40.

    Mukonda diahi Balamu ua fikisa ku ta mázui ku akua Izalaiele, ni disá diahi di tua dilongo mumu? (Dia. 22:16, 17; Jisa. 6:16, 18; 2 Phe. 2:15; Juda 11)

  • Mukonda diahi Balamu ua fikisa ku ta mázui ku akua Izalaiele, ni disá diahi di tua dilongo mumu? (Dia. 22:16, 17; Jisa. 6:16, 18; 2 Phe. 2:15; Juda 11)

    Sumbala Balamu ua zuelele kála mubhezi ua Jihova, kiebhi kiedikisa o kuiibha kuê? (Dia. 23:3, 11-14; 1 Sam. 15:22)

  • Tanga Dialuilu 24:1-25.

    Kiebhi o musoso iu ua Bibidia u kolokotesa o kixikinu k’etu mu ki kumbidilu kia vondadi ia Jihova (Dia. 24:10; Iza. 54:17)