KIOSO akua Izalaiele kia kexile mu ibhidi, ene a dikola kua Jihova. Jihova ua tambuijila mu ku a bhana atuameni a suína phala ku a kuatekesa. O Bibidia ixana atuameni iâ, afundixi. Josuué uexile o mufundixi ua dianga, ni afundixi a kamúkua a exanene Otoniiele, Ehudi, ni Sangale. Maji athu kiiadi a kuatekesa Izalaiele, exile ahatu a exanene Debola, ni Jaiele.

Debola ua mu zuela ni Balake

Debola uexile polofeta. Jihova ua mu bhanene o njimbu ia lungu ku hádia, muéne uexile mu tangela athu oso, iexile mu zuela Jihova. Debola uexile ué mufundixi. Muéne uakexile mu xikama bhoxi dia diié ku mulundu, athu akexile mu kuíza kua muéne phala ku a kuatekesa ku maka.

Mu thembu ienioió, Jabine uexile sobha ia Kanana. Muéne uakexile ni 900 ia makalu a ita. O masoladi mê exile akua nguzu, saí akua Izalaiele a a jijidikile ku kala abhika a Jabine. O mutuameni ua masoladi a Sobha Jabine, a mu ixana Xixela.

Kizuua kimoxi, Debola ua tumu ku ixana o Mufundixi Balake, iu ua mu ambela: ‘Jihova uixi: ‘Ndé uongeke 10.000 dia maiala ku Mulundu ua Tabola. Kuene ku nga-nda ku bhana Xixela. Ni masoladi mê ni nga-nda ku bhana kikoué.’’

Balake uixi kua Debola: ‘Nga-ndaia, se eie uia n’eme.’ Debola uai nê, maji muéne uambela Balake: ‘Eie kua-nda katula-ku kijingu, mukonda Jihova ua-nda bhana Xixela ku lukuaku lua muhatu.’ Kiki kiene kia bhitile.

Balake uai ku Mulundu ua Tabola mu disanga ni masoladi a Xixela. Mu kithangana kieniókio, Jihova ua nokesa nvula ionene, o jinguma ja masoladi a bhobha. Maji Xixela ua tuluka mu dikalu diê, iu ua lenge.

Balake, Jaiele, ni Xixela

Kua bhiti thembu, Xixela ua bhixila mu balaka ia Jaiele. Muéne ua mu tumina ku bokona, iu ua mu bhana lete. Íii ia mu zekesa, kienhiki muéne uai ku kilu kionene. Mbe, Jaiele ua kuata ku taka ia balaka, inga u i papela ku mutué ua diiala diaiibha. Kioso kia bhixila Balake, muéne ua mu idikisa o kimbi kia Xixela! Kienhiki-phe, ua tenene ku mona kuila Debola ua zuelele kidi.

Mu kusukáko Sobha Jabine uafú ué, kienhiki akua Izalaiele akexile dingi ni kutululuka.

Afundixi 2:14-22; 4:1-24; 5:1-31.



Ibhuidisu

  • A nanhi exile afundixi, ni kiebhi kiexanene akamukuá diâ?
  • Kikalakalu kiahi kiexile na-kio Debola, ni ihi ilombolola?
  • Kioso o Sobha Jabine ni kabhitangu kê ka masoladi, Xixela, akexile mu kuatesa uôma ku akua Izalaiele, njimbu iahi ia tangela Debola kua mufundixi Balake ia tundile kua Jihova? Nanhi Muéne uambe kuma, ua tokalele ku tambula o kijingu?
  • Kiebhi kiedikisa Jaiele kuma muhatu ua suína?
  • Ihi ia bhiti kioso kiafú Sobha Jabine?

Ibhuidisu ia mukua

  • Tanga Afundixi 2:14-22

    Kiebhi akua Izalaiele a di sotela o njinda ia Jihova, ni disá diahi di tu dilonga ni íii? (Afun. 2:20; Jisa. 3:1, 2; Ize. 18:21-23)

  • Tanga Afundixi 4:1-24.

    Disá diahi dia kixikinu ni ku kolokota kua ahatu a Jikidistá ja lelu a tena ku dilonga ku phangu ia Debola ni Jaiele? (Afun. 4:4, 8, 9, 14, 21, 22; Jisa. 31:30; 1 Kol. 16:13)

  • Tanga Afundixi 5:1-31.

    Mukonda diahi tuamba kuma, o muimbu ua kikoué ua Balake ni Debola, u tena ku kala kála musambu ua lungu ni ita ia Alu-Majedone ia-nda kuíza? (Afun. 5:3, 31; 1 Mal. 16:8-10; Dij. 7:9, 10; 16:16; 19:19-21)