MOZÉ ua-ndala kuia mu Kanana kumoxi ni akua Izalaiele. Kienhiki, muéne ua bhingi: ‘Jihova ngehele kuzaúka ku sámbua dia Ngiji ia Njolodá, ngi tale o ixi iambote.’ Maji Jihova uixi: ‘Kia soko! Kana ku ngi tangele-kio dingi!’ Eie uejiia mukonda diahi Jihova ua zuela kiki?

Kiki kia bhitile kioso Mozé kia betele ku ditadi. Lembalala kuma, muéne ni Alá ka ximanene Jihova. Ene ka tangela o mundu kuila Jihova ua katuile o menha ku ditadi. Mukonda dia kiki, Jihova ua a tangela kuma ka-nda bokona mu ixi ia Kanana.

Kua bhitile ngó ji mbeji Alá uafú, Jihova uambela Mozé: ‘Ambata Josuué kua Eliiazale o mukunji, ni ku pholo ia mundu. Ku pholo iâ oso, ua tangela kuma Josuué muéne o mutuameni uobhe.’ Mozé ua bhange ia mu tumina Jihova, kála ki ua mu mona mu fikula.

Mozé ua mu bhana ngolokela kuila Josuué mutuameni

Jihova uambela Josuué: ‘Kolokota, kana ku kala ni uôma. Eie ua-nda endesa akua Izalaiele ku ixi ia Kanana i nga a kanena, Eme nga-nda kala ni eie.’

Kienhiki, Jihova ua tumina Mozé ku banda ku Mulundu ua Nebu ku ixi ia Mouabhe. Ku mulundu Mozé ua tenene ku tala o sámbua dia Ngiji ia Njolodá, o ixi ia uabha ia Kanana. Jihova uixi: ‘Íii o ixi I nga kanena an’a Mbalahamu, ni Izake, ni Jakobo. Eme nga kuehela ku i mona, maji kua-nda bokona-mu.’

Mozé ua fuila ku Mulundu ua Nebu. Muéne uakexile ni 120 a mivu. Muéne uakexile hanji ni nguzu, o mesu-mê ka fuile luua. O mundu ua luualele kiavulu ni a didile mukonda dia kufuá kua Mozé. Maji a sangulukile mukonda dia ku kala ni Josuué kála mutuameni uobhe.

Dialuilu 27:12-23; Matendelelu 3:23-29; 31:1-8, 14-23; 32:45-52; 34:1-12.



Ibhuidisu

  • Mu fikula, a nanhi o maiala aiadi ala ni Mozé?
  • Ihi ia zuela Jihova kua Josuué?
  • Mukonda diahi Mozé ua bande ku Mulundu ua Nebo, ni ihi ia mu zuelela Jihova?
  • Mivu ikuxi ia kexile na-iu Mozé kioso kiafú?
  • Mukonda diahi o mundu ua luualele, maji mukonda diahi ene a tokalele ku sanguluka dingi?

Ibhuidisu ia mukua

  • Tanga Dialuilu 27:12-23.

    Kikalakalu kiahi kia bhonzo kia tambula Josuué kua Jihova? Kiebhi Jihova kiene mu tambula konda ia mundu Uê lelu? (Dia. 27:15-19; Ikalakalu 20:28; Jih. 13:7)

  • Tanga Matendelelu 3:23-29.

    Mukonda diahi Jihova kehela Mozé ni Alá ku bokona mu ixi ia kikanenu, ni disá diahi di tua dilongo mumu? (Mate. 3:25-27; Dia. 20:12, 13)

  • Tanga Matendelelu 31:1-8, 14-23.

    Kiebhi kiedikisa o kizuelu kia Mozé, kuma muéne ua xikanene o kibazelu kia Jihova? (Mate. 31:6-8, 23)

  • Tanga Matendelelu 32:45-52.

    Kiebhi o Maka a Nzambi a tokala ku fikila o muenhu uetu? (Mate. 32:47; Iji. 18:5; Jih. 4:12)

  • Tanga Matendelelu 34:1-12.

    Tuejiia kuma Mozé nuka ua muene Jihova, kiebhi kidikisa o divulu dia Matendelelu 34:10, maka alungu ni ukamba uê ni Jihova? (Mak. 33:11, 20; Dia. 12:8)