Ku bokona mu madisá

Ku bokona mu madisá

Jimbangi ja Jihova

Select language Kimbundu

Musoso 41: O Nhoka ia Kóbidi

Musoso 41: O Nhoka ia Kóbidi
Mozé ni nhoka ia kóbidi

KI IA difuangana muene ni nhoka ia kidi ia di nhingi ku muxi? Ki iene. O nhoka io bhange ni kóbidi. Jihova ua tumina Mozé ku iudika o nhoka, ni ku itula ku muxi phala kioso athu kia tala-ku a bhuluka. Maji o ji nhoka ja kamúkua jala bhoxi ja kidi. Jene ja numatene athu, ia a bhangesa ku kata. Uejiia mukonda diahi?

Mukonda akua Izalaiele a zuelele kiaiibha kua Nzambi ni Mozé. Ene a ditende: ‘Mukonda diahi ua tu katula mu Ijitu phala tu fué mu kikangalakata mumu? Ki muala kúdia né menha. Ki tua-ndala kudia dingi o maná.’

Maji o maná iexile kúdia kuambote. Jihova ua a bhanene mu madiuanu. Muéne ua a bhanene ué menha mu madiuanu. Maji o mundu ka kexile mu sakidila Nzambi mu ku a tambula konda. Kienhiki, Jihova ua tumikisa jinhoka ja madiuta phala ku kaxtikala akua Izalaiele. O jinhoka ja kexile mu a numata, kienhiki avulu a fuile.

Akua Izalaiele a mu numata ku jinhoka

Mu kusukáko, athu eza kua Mozé ni exi: ‘Tua te kituxi, mukonda tua zuela kiaiibha kua Jihova ni eie. Kindala sambela kua Jihova phala ku katula o jinhoka jiji.’

kienhiki, Mozé ua sambela phala o mundu, kala kia mu bhingi. Inga Jihova ua tumina Mozé ku bhanga nhoka ia kóbidi. Muéne ua tumina ku itula ku muxi, oso a mu numata ua tokalele ku i tala. Mozé ua bhange kála kia mu zuelele Nzambi. Athu oso a a numatene, kia tale ku nhoka, a disanzele.

Didi disá phala etu. Etu oso tuala kála akua Izalaiele a a numatele ku jinhoka. Etu oso tuala mu ukexilu umoxi ua ku kumbama. Tala ku mundu lelu, ua-nda mona kuma athu a kuka, a kata, ni a fuá. Mukonda dia diiala dia dianga ni muhatu, Adá ni Eva a bhukumukina Jihova, etu tu an’ê. Maji Jihova ua bhange kima phala etu tu kale ni muenhu ua kalelaku.

Jihova ua tumikisa Mon’ê, Jezú Kristu, mu ixi. Jezú a mu phaphela ku taka, mukonda athu avulu a banzele kuila muéne muthu uaiibha. Maji Jihova ua tumikisa Jezú phala ku tu bhulula. Se tu mu kaiela, tua-nda kala ni muenhu ua kalelaku. Maji tua-nda dilonga dingi maka alungu ni muéne.

Dialuilu 21:4-9; Nzuá 3:14, 15.



Ibhuidisu

  • Mu fikula, ihi ia dinhingi ku muxi, ni mukonda diahi Jihova ua tumina Mozé ku i tula ku muxi?
  • Kiebhi kiedikisa o mundu o ku kamba o kisakidilu mu ioso ia kexile mu ku a bhangela Nzambi?
  • Ihi ia bhingi o mundu kua Mozé kioso kia tumikisa Jihova o jinhoka ja madiuta phala ku a kaxtikala?
  • Mukonda diahi Jihova ua tumina Mozé ku bhanga o nhoka ia kóbidi?
  • Disá diahi di tu longa o musoso iú?

Ibhuidisu ia mukua

  • Tanga Dialuilu 21:4-9.

    Kiebhi o ku dikola kua akua Izalaiele kua lungu ni kúdia kua kexile ku a bhana Jihova, ku sidivila phala ku tu dimuna? (Dia. 21:5, 6; Lom. 2:4)

    Mu ukulu, ihi ia kexile mu bhanga akua Izalaiele ni nhoka ia kóbidi, ni ihi ia bhange o Sobha Ezekiia? (Dia. 21:9; 2 Jis. 18:1-4)

  • Tanga Nzuá 3:14, 15.

    Kiebhi o nhoka ia kóbidi io tudile ku muxi, ia sidivila phala ku tu dimuna, ilondekesa kiambote Jezú Kristu a mu phaphela ku taka? (Nga. 3:13; 1 Phe. 2:24)