Ku bokona mu madisá

Ku bokona mu madisá

Musoso 40: Mozé u Beta ku Ditadi

Musoso 40: Mozé u Beta ku Ditadi

KUA bhitile mivu ni mivu—10, 20, 30, 39, dia mivu! Akua Izalaiele akexile hanji mu kikangalakata. Maji mu mivu ioso íii, Jihova ua tambula konda ia mundu uê. Muéne ua adisa ni maná. Mu muanha muéne ua endesa ni dituta, mu usuku ni mukalakata ua túbhia. Mu mivu ioso íii o izuatu iâ ki ia kukile, ka kexile ni ndolo ku inama.

Kindala ala kiá mu mbeji ia dianga ia 40 a mivu, tundé kia tundu ku Ijitu. Akua Izalaiele a tungile dingi mu Kadexi. Mu Kadexi muenhomo, muene mua tundile o 12 kia alondi, endele mu ixi ia Kanana mu 40 a mivu ku dima. Midiiana phange a Mozé, ua fuila mu Kadexi. Kála mu ukulu, kua moneka ué ibhidi.

Athu ka kexile ni menha. Ene a dikolele kua Mozé: ‘Tamanu se tua fuile. Mukonda diahi ua tu katula ku Ijitu, ua tu bheka bhu kididi kiki, ki ku sabhuka kima? Ki muale masa, né jifiku né jiuva, né ji améndua. Né ngó menha phala kunua.’

Mozé u Beta ku Ditadi

Kioso Mozé, ni Alá, kiendele mu balaka mu samba, Jihova uixi kua Mozé: ‘Bhongolola o mundu uoso. Ku pholo iâ en’oso, zuelela ku ditadi. Kua-nda tunda menha avulu phala o mundu uoso, ni ibhaku iâ.’

Mozé ua bhongolola athu iu ua ambela: ‘Ívue-nu, enu ki mu dielela kua Nzambi! O kuila eme ni Alá tu tena ku tundisa menha ku ditadi didi phala enu?’ Kienhiki, Mozé u beta luiadi ku ditadi ni mbangala, inga ku tunda menha avulu. Menha a sokele phala o mundu’oso ni ibhaku kunua.

Maji, Jihova ua dizangalele ni Mozé ni Alá. Eie uejiia mukonda diahi? Mukonda Mozé, ni Alá, ambele kuma ene a bhangesa ku tunda menha ku ditadi. Maji mu kidi Jihova ua bhangesa kienhiki. Mozé ni Alá ka zuelele o kidi, kienhiki Jihova uambela kuma ua-nda ku a kaxtikala. Muéne uixi, ‘Enu ki mua-nda kuendesa dingi o mundu uami mu Kanana.’

Kienhiki, Izalaiele a xisa Kadexi. Kua bhitile hanji thembu, ene a bhixila ku Mulundu ua Hole. Kuenhoko ku thandu dia mulundu, Alá uafú. Muéne uakexile ni 123 a mivu kioso kiafú. Akua Izalaiele a dikuatele mukondo, a didi kiavulu o kufuá kua Alá, mu 30 a izuua. Mon’ê Eliiazale muéne uexile o mukunji ua akua Izalaiele.

Dialuilu 20:1-13, 22-29; Matendelelu 29:5.



Ibhuidisu

  • Kiebhi Jihova kia tambula konda ia akua Izalaiele kioso kia kexile hanji mu kikangalakata?
  • Ihi akexile ku dikola akua Izalaiele kioso kia kexile hanji mu Kadexi?
  • Ihi ia bhange Jihova phala ku bhana menha ku mundu ni ku iama?
  • Mu fikula, nanhi o diiala dia mu didikisa, ni mukonda diahi muéne ua mu bhanga kiki?
  • Mukonda diahi Jihova ua dizangala ni Mozé ni Alá, ni kiebhi kia a kaxtikala?
  • Ihi ia bhitile ku Mulundu ua Hole? Nanhi ua kituka o mukunji ua dikota mu Izalaiele?

Ibhuidisu ia mukua

  • Tanga Dialuilu 20:1-13, 22-29 ni Matendelelu 29:5.

    Ihi i tua dilongo ku ukexilu ua Jihova ua ku tambula konda ia akua Izalaiele mu kikangalakata? (Mate. 29:5; Mat. 6:31; Jih. 13:5; Tii. 1:17)

    Kiebhi Jihova kia mono o ku lueza kua Mozé ni Alá mu ku kamba ku mu bhana kijingu bhu pholo ia akua Izalaiele? (Dia. 20:12; 1 Kol. 10:12; Dij. 4:11)

    Ihi i tu longa o ukexilu ua Mozé, kioso kia mu kaxtikala kua Jihova? (Dia. 12:3; 20:12, 27, 28; Mate. 32:4; Jih. 12:7-11)