Ku bokona mu madisá

Ku bokona mu madisá

Musoso 39: O Mbagala ia Alá Isabhuka Ithulu

Musoso 39: O Mbagala ia Alá Isabhuka Ithulu

TALA o ithulu, ni ji aménduaa, jabhi ku mbangala íii. Íenii o mbangala ia Alá. O ithulu íii ni ji améndua ja sabhukile ku mbangala ia Alá mu usuku! Ndoko tuejiie mukonda diahi.

Mozé ua mu bhana o mbangala ia ithulu kua Alá

Akua Izalaiele akexile mu nhunga hanji mu kikangalakata. Saí athu ka mesene kuila Mozé u kala mutuameni, o Alá mukunji. Umoxi diâ, Kola, ua banzele kienhiki, ni Datane ni Abilamu ni 250 a a tuameni a mundu. Ene oso endele mu zuela ni Mozé: ‘Mukonda diahi eie ua mu di ta ku thandu diet’oso?’

Mozé uambela Kola ni oso exile ku mu kaiela: ‘Mungu mu kimene kuatenu o imuikinu ia uasu mu tule-ku mubafu. Muize mu kalatódio ka Jihova. Tua-nda mona se Jihova ua-nda sola nanhi.’

Mu kizuua kia kamúkua Kola ni 250 a akaied’ê, a bhixila bhu kalatódio. A kamúkua endele ué mu ku a kuatekesa. Jihova ua temene kiavulu. Mozé uixi, ‘Sondolokenu mu ji balaka ja maiala iâ aiibha.’ ‘Ki mu kuate ku ima ia a tokala.’ Kienhiki, o mundu ua belesela, ni a sondoloka mu ji balaka ja Kola, ni Datane, ni Abilamu.

Kienhiki Mozé uixi: ‘Kiki-phe mua-nda kuijiia se Jihova ua-nda sola nanhi. O mavu a-nda jikuka ni a-nda minha o maiala iâ a iibha.’

Kioso Mozé kia zubha ku zuela, o mavu a jikuka. O balaka ia Kola ni ima iê ioso, ni Datane ni Abilamu, ni oso akexile nâ, a a minha ku mavu. Kioso athu kiévu o jingololo ja ió akexile ku a minha ku mavu, ene a dikola: Tu lenge! Sumba o mavu a-nda tu minha uê!

Kola ni 250 a akaiedi a zukamene hanji bhu kalatódio. Kiki Jihova ua tumikisa túbhia, ene oso a jokota. Anga, Jihova uambela mon’a Alá, Eliiazale, ku katula o imuikinu ia uasu ia maiala afú, phala ku bhanga izuatu ia iuka phala o kalatódio. O izuatu íii ia kalatódio ieji dimuna Akua Izalaiele, kuma ki bhuale muthu uéngi, ki kala ngó Alá, ni an’ê, a tokalele ku kalakala kála akunji phala Jihova.

Maji Jihova ua mesenene kuidikisa kiambote kuila muéne ua solele ngó Alá, ni an’ê phala ku kala akunji. Muéne uambela Mozé: ‘Tumina atuameni a madiembu a akua Izalaiele a bheke o mbangala jâ. Ku diembu dia Levi, tuma Alá ku bheka o mbangala iê. Kala mbangala u i tula ku kalatódio, ku pholo ia álaka ia kikutu. O mbangala ia diiala di nga solo kála mukunji ia-nda sabhuka ithulu.’

Mu kimene kiéngi kioso Mozé kiai mu tala, ua sange o mbangala ia Alá ia sabhuka o ithulu íii, ni ji améndua! Kindala uejiia kiá, mukonda diahi Jihova ua bhangesa o mbangala ia Alá ku sabhuka ithulu?

Dialuilu 16:1-49; 17:1-11; 26:10.



Ibhuidisu

  • A nanhi a xibhakele o ungana ua Mozé ni Alá, ni ihi ia zuela kua Mozé?
  • Ihi ia tumina Mozé kua Kola ni 250 a akaiedi’ê ku bhanga?
  • Ihi ia zuelele Mozé ku mundu, ni ihi ia bhitile kioso kia zubha o ku zuela?
  • Ihi ia bhitile ni Kola ni 250 a akaiedi’ê?
  • Ihi ia bhange Eliiazale mona Alá, ni imuikinu ia uasu ia maiala afú, ni mukonda diahi?
  • Mukonda diahi Jihova ua bhangesa o mbangala ia Alá ku sabhuka ithulu? Tala o fikula.

Ibhuidisu ia mukua

  • Tanga Dialuilu 16:1-49.

    Ihi ia bhange Kola ni akaiedi’ê? Mukonda diahi íii iexile kima kia ku xibhakela Jihova? (Dia. 16:9, 10, 18; Iji. 10:1, 2; Jisa. 11:2)

    Ndunge iahi iaiibha ia kexile na-iu Kola ni 250 a “adiakimi a kiônge”? ( Dia. 16:1-3; Jisa. 15:33; Iza. 49:7)

  • Tanga Dialuilu 17:1-11 ni 26:10.

    Ihi iedikisa o ku sabhuka kua mbangala ia Alá, ni mukonda diahi Jihova ua tumina ku ibhaka mu álaka? (Dia. 17:5, 8, 10)

    Disá diahi dia mbote di tua dilongo mu kijimbuete kia mbangala ia Alá? (Dia. 17:10; Ikalakalu 20:28; Fil. 2:14; Jih. 13:17)